Sfuei Mensîl Furlan Indipendent
Archivi de Patrie

ATUALITÂT – La Cjargne in place

............

«Pe aghe, pe tiere sin pronts a fâ la vuere», «Jù lis mans de tiere o la Cjargne si ribele»: cussì, vosant a fuart, passe 2.000 personis a àn partecipât ae manifestazion di sabide ai 13 di Novembar, organizade dal Coordenament dai Comitâts de Mont Furlane dutune cun Pro Gailtal de Carinzie. Al someave di viodi un lunc madrac che dal puint di Çurçuvint – Paluce si slungjave sù fin a rivâ inte plaçute, passant denant des vetrinis des buteghis, sieradis par solidarietât ae proteste.
Ducj unîts, “la glesie, i sindics, i comitâts, a rimarcâ il dirit di un teritori di decidi des sieltis che lu cjapin dentri” al à dit Renato Garibaldi di ‘Carnia in movimento’ inte vierzidure dai intervents, daspò vê sintude la ‘Carnorum Regio’ intonade de Corâl Duomo di Paluce. “Vuê, insieme cu la Austrie, par pensâ, par condividi e par resisti. Achì insieme par un doman miôr, fat di partecipazion aes sieltis e di sperance par ducj. Lôr a àn i bêçs e chei a fasin i miracui. Nô, dome il cûr e tante voie di vivi. No sai cemût che e larà a finîle cheste bataie pal dirit e pe dignitât, ma stait sigûrs che i vendarìn cjare la nestre piel.”
GLESIE E SINDICS_ “Il doman” – al à dit pre Agnul Zanella di Tumieç – “ancje in economie al è di cui che al sarà ae avanguardie tal proponi un model gnûf di svilup cence contrarietâts. La dutrine de glesie e domande dome di no ignorâ mai lis domandis di justizie e di impostâ la ativitât economiche e sociâl su la partecipazion des personis inte reciprocitât e no su la contraposizion dai interès.”
I sindics di Çurçuvint De Alti e chel di Paluce, Vezzi, a àn inmò une volte confermade cun fuarce la lôr contrarietât, confuartâts de grande presince di int.
E – a proposit di interès – l’incaricât dal WWF al à rimarcât che, stant ai studis fats, “La Austrie e impuarte energjie eletriche parcè che di diviers agns e prodûs mancul energjie. Se le compre, alore cemût puedie pensâ di podê furnî il Friûl? O vin un grum di centrâls eletrichis in regjon e se dutis a produsessin la energje che a son buinis di produsi, o varessin il 50-60% in plui di ce che si consume in dute le Regjon. Ma no lu fasìn parcè che i industriâi no a àn investît in chescj implants e a àn miôr  impuartâ energjie di altris bandis. Il vêr obietîf di cui che al vûl l’eletrodot al è chel di vendi la energje a la Austrie.”
COMINTÂTS UNÎTS_ E alore? Aldevisi Tibaldi (Friûl Rurâl) al invide a “Supuartâ i sindics che a son par nô. O vin intai comuns une situazion simpri plui in ros e alore cuant che al rive il paron de energjie cun cuatri bêçs al pues comprâ i aministradôrs, i stupits, i plui debui. Inte basse a vevin comprât un pôcs di sindics; a son stadis lis elezions e chei sindics a son lâts a cjase”.
“Jo pardabon no ai capît o o fâs finte di no capî” al dîs Biscosi, conseîr di maiorance a Tumieç, che al à votât cuintri l’eletrodot aerei «parcè che a stedin svendint chest teritori, no dome pal eletrodot, ma ancje pe aghe, e v.i.. Nus àn di dî se o sin intune risierve di cjace o no. Il doman a son chestis personis achì in place (riferintsi ai fruts, ndr). No pues jessi responsabil di sieltis morâls che a laran in dam di lôr”. “Achì al covente un plan di svilup di cheste tiere», al à reont Franceschino Barazzutti (Moviment Mont), “chest eletrodot al pue stâ dentri o fûr dome se al è un plan di svilup.”
E inmò solidarietât e cundivision ai sindics dai diviers paîs presints di bande de musiche di Lino Straulino e Alessio Screm, e dai carinzians che a son daûr a meti adun une proteste di là dal confin.
Une pagjine di storie, chê dal 13 di Novembar, che dal sigûr i Cjargnei no dismentearan; anzit, se al coventarà, a saran pronts a tornâ in place inmò une volte e a bati i pugns par difindi la lôr tiere.
Marta Vezzi

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +