LA INTERVISTE – La scomesse dai Cercaluna

Al è il plui zovin a vê vint il Premi Viareggio di un grum di agns a cheste bande: ma Pierluigi Cappello si è fat i vuès atôr pal Friûl zaromai de seconde metât dai agns ’90, cuant che un sodalizi nassût dal nuie cun Paolo Medeossi, Leonardo Zanier, Alberto Garlini, Federico Tavan e il Teatrin dal Rifo al veve animât une compagnie dal dut particolâr, i Cercaluna. L’impresari di chê fradaie al jere il gjornalist Paolo Medeossi: «Jo e Pierluigi – al conte – si jerin cognossûts pôc timp prin ma pal plasê di stâ dongje un cul altri o vìn metût in pîts cheste esperience torzeone che e à fat plui di 50 spetacui tai cinc agns che e je stade in vore». Dal 1996 al 2000 la scomesse dai Cercaluna e je stade chê di creâ dal nuie un spetacul che al les in sene la prime sabide dal mês di Avost inte place di Scluse. «Di li la esperience si è slargjade a tancj puescj speciâi dal teritori. Mi visarai simpri – si impense Medeossi – i spetacui ae fabriche ocupade de Solari a Pesariis, ae lunete napoleoniche a Palme, inte place di Maran o te miniere bandonade di Cludini di Davâr». In dut chest savoltament culturâl «Pierluigi al jere il vêr dinamitart de situazion, chel che al saveve puartâ la poesie tal mieç de int. Al jere za aromai un poete ancjemò prin di deventâlu: al interpretave cheste funzion ancjemò prin di scomençâ a publicâ i siei prins libris impuartants». Une robe e impressionave soredut Medeossi; «la fuarce che e saltave fûr di chest miscliç di inteletuâi difarents par etât e divignince e rivave drete al cûr. E intai paîs alì che o levin la int nus vignive a viodi e e jere une fieste par ducj. Soredut pai fruts». A son passâts dîs agns e Cappello cumò al è un poete di stature europeane: «l’unic displasê al è che par jessi pardabon capît al à scugnût cjatâ a Milan editôrs e gjornaliscj che a àn capît la sô grandece. In Friûl in tancj no si son inacuarts di lui». E cumò? «La sô cjasute di Tresesin e je vuê plui frecuentade dai palaçs dal podê. In timps cussì puars di ponts di riferiment, il poete al reste un model di veretât. E Pierluigi al fâs poesie cun onestât: e la sô autoritât e ven di chest».
WALTER TOMADA