CULTURE – ART-Â. Il nît imagjinari di Elena Del Fabbro

Un univiers imagjinari e complès vivût di creaturis «freak», ambiguis, fi de emotivitât intense e istintive de sô autore, Elena Del Fabbro, dal so mont interiôr, che al continue a mudâ. Cuntune rese formâl che e cjape dal repertori de grafiche e dal fumet, la artiste furlane e à spostât, tai agns, la sô atenzion des personis – massime bandonadis, dismenteadis di ducj, ma plenis di dignitât – e di chel che si pues lei de lôr storie cjalantlis, aes lôr relazions, marcadis dal ûs di colôrs impiâts e di formis particolârs tant che une mape mentâl che al jude a leilis. «Mi àn ossessionât i rapuarts e i leams – e conte Del Fabbro –, la dibisugne di calôr e la soference». E cumò, ancjemò plui dai «outsider» i interessin i contescj, plui des relazions tra personis, chês tra ambient e cui che lu vîf.
In cheste suaze, la artiste e confronte il so mont interiôr cun chel di difûr. «O soi inmagade de nature – e conte – e peade ae tiere che e bute: e je tal gno dna». Un leam «ereditât di chest teritori e de sô int» e riscuviert tai agns lontans dal Friûl. In chê suaze, «o ai cjapât cussience de scune li che o vevi vivût i miei prins 20 agns, mi è parût un fogolâr grês, ma bon di vuardâ, stimolant e reâl».
Tai siei paisaçs visionaris – collages digjitâi a dôs dimensions, fats di dissens a man, fotos elaboradis e elements fats al computer che a dan visibilitât ai schemis associatîfs de artiste, ae rêt di relazion che e sta ae fonde dal so percors espressîf –, un puest lu à simpri la figure de mari. E je jê a determinâ, tal ben e tal mâl, la personalitât dai fîs. In «Viola», ultime animazion de artiste furlane, e ven fûr la violence psicologjiche e emozionâl di cualchi mari viers i fîs par vie di patologjiis, disfunzions: «dinamichis di violazion che al è dificil difindisi». E dongje des maris a son cjasis, culinis, arbui, cuarps imperfets, cjavei disgardufâts e ingropâts tant che pinsîrs. Al è il mont di Elena Del Fabbro, che al pant curiositât, energjie creative e capacitât imagjinative. Un mont dut di scuvierzi.
_____________________
DASPÒ MILAN, DI GNÛF IN FRIÛL
Ilustradore e pitore, Elena Del Fabbro e je nassude a Udin tal 1976 e, daspò di une curte parentesi milanese, e je tornade tal cjâf lûc furlan, dulà che e à frecuentât un cors di grafiche multimediâl, imparant a doprâ la rielaborazion grafiche, che e je deventade centrâl tal so percors espressîf. Daspò la menzon speciâl, tal 2006, te suaze dal concors «ManinFesto» inmaneât dal Centri di art contemporanie di Vile Manin di Passarian, che i à valût la partecipazion a une coletive a Monfalcon («Fruz 01»), e à tacât a svilupâ un grum di progjets e a esponi in mostris personâls e coletivis ator pe Italie. Finaliste in cetancj concors, e je stade invidade di resint a partecipâ cuntune opare al calendari pe Associazion donadôrs di orghins dal Friûl-Vignesie Julie e ae mostre relative che si tignarà ae galarie «La Loze» di Udin (scree e presentazion dal calendari ai 27 di Novembar). In curt, la sô animazion «Viola» e vignarà proietade a Rome, li dal Macro Testaccio «La Pelanda», dentri dal «Videoart festival».
ERIKA ADAMI