CULTURE – CUSINE. Trifule

Par rafinatece, e ancje par il presit (parsore dut tes sôs variantis plui raris, tipo il preseât «Bianco d’Alba», che al coste al gram plui dal aur…), la trifule e je considerade par dut come il vêr «dandy» de cusine, l’ingredient par ecelenze che al ven voie di doprâ cuant che si vûl parecjâ une cene «stilose».
INGREDIENT DIFICIL_ No che al sedi facil doprâle: cun chel savôr cussì fuart, che nol plâs a ducj, il riscli al è di tirâ une bote sensoriâl cussì invadente di copâ ducj chei altris savôrs, e il so profum cussì saurît (tant di fâ pensâ ogni tant a une fughe di gas…) al rint un grum dificil il lavôr dal sommelier, clamât a cjatâ un vin che nol sedi «scjafoiât» tai siei bonodôrs.
Dut câs, pai cusinîrs che si sintin avonde sigûrs di frontâ la sfide (confidant di no cjatâsi cun diletants convints che un ingredient costôs al sedi vonde par fâ une cene «di lusso»…), la trifule e je un biel ciment, un alc di doprâ cun maestrie e prudence, buine di regalâ un snait pardabon particolâr al plui comun plat di pastesute o a la plui scontade fetine di manç.
I CONCORINCJ_ In Italie – che si la zuie cu la France te competizion de cusine plui «odorose» – lis variantis di trifule a son tantis, cul za nomenât piemontês Bianco d’Alba a fâ di «star», ogni an vendût intune aste seguide dai media internazionâi, cuant che vips e ristoradôrs di dut il mont (gjaponês, araps, gnûfs miliardaris de Russie…) si contindin lidrîs di dimensions impressionantis a colps di assegns di alte finance.
Ma – lassant pierdi i deliris di «high society» – un grant marcjât lu àn ancje lis altris variantis, chês di Toscane, Piemont e Umbrie, parsore dut de categorie de «trifule nere», chê plui doprade ancje de grande industrie alimentâr par insavorî paste o salsis.
ESEMPLIS FURLANS_ Te gjeografie de Italie des trifulis ancje il Friûl forsit al à alc ce dî: ancje il nestri teritori e i nestris boscs, te aree tra la Pedemontane e la Basse, l’habitat al è tecnichementri perfet, sore dut tai boscs di cjastinârs cul just mix di ombrene, soreli e umiditât.
Forsit, in confront cun altris zonis de Italie, chi e mancje un tic la tradizion: une reson storiche e podarès jessi il fat, climatic e culturâl, di tirâ sù i purcits (grancj discuvierzidôrs di trifule) plui tal sierât, che sot il cîl viert.
In ogni câs, la tradizion e va ben, ma nuie al impedìs di provâ a meti il nestri teritori al servizi di gnovis prospetivis e la trifule e pues jessi une interessante gnove oportunitât.
Une considerazion che e cjate fint dal 2002 un ciert seguit, tant che proprit in chel an e je nassude la «Associazione Tartufai del F-VG», realtât che e met dongje, cence fin di vuadagn, passionâts de coltivazion, de racuelte e de culture de trifule, une associazion che e à vût fin di subit un biel supuart di bande de Ersa (www.ersa.fvg.it).
LIS POTENZIALITÂTS_ Secont cheste associazion, la zone plui produtive e je chê di Torean, che di Jugn a Avost e regale produzions di un ciert nivel (te variante «tuber aestivum»), o de bande des valadis de pedemontane tra Udin e Pordenon (cun il «tuber mesentericum», chel comercialmentri plui comun). Ma grandis sodisfazions a vegnin ancje de Basse, cu la aree ator di Muçane, che si è rivelade perfete par ospitâ un «bianco pregiato» (il «tuber magnatum pico», parint stret di chel di Albe), e fintremai dal teritori lagunâr di Lignan e Bibion, o tal Friûl di Mieç, cul «tuber borchii».
LA GNOVE CUSINE_ Metìnle cussì: forsit nol sarà cussì presint tai ricetaris furlans di une volte. Ma il Friûl al è une tiere gjenerose, e propit parcè che fuarte de proprie identitât ancje a taule, buine di frontâ ancje cualchi gnûf esperiment, che al misclice vecjo e gnûf. O sin ca a spietâ cualchi ristoradôr coragjôs di frontâ, cu la doverose prudence, l’esperiment di un «frico aromatizât a la trifule». Po dopo, e sta a la bocje de int decidi se e pues jessi une strade di bati o di lassâ pierdi. In sumis, la tradizion si continue e si manten vive continuant a zuiâ tra gnûf e vecjo…
Margherita Timeus