ATUALITÂT – Tiraitsi in bande

Vie pe ultime «convention» su «zovins e furlanetât» davuelte a Maian ai 31 di Lui, al à cjapade la peraule ancje Marco Macorigh, 50 agns origjinari di Udin, aministradôr delegât di Tradinvest, societât consulence di Londre che e prodûs ancje la web tv www.tradinvest.tv.
Tal so intervent no son mancjâts ancje passaçs avonde critics su la necessitât di sbassâ la etât medie de dirigjence di «Ente Friuli nel Mondo». Lu vin contatât par domandâi in struc cualchi sclariment.
Marco Macorigh, ancje lui al à rivendicât plui oportunitâts pai zovins: cuale ise la sô posizion?
«O premet che no mi plâs la polemiche che no jude nissun a risolvi lis cuistions. Disìn che magari o ai cirût di provocâ par costruî insieme. O seguìs «Friuli nel Mondo» di cuant che o jeri piçul e no soi mai mancjât a lis Cunvignis e altris moments impuartants. Al è di timp che si sint tabaiâ di zovins e cjatâju dome tes fotos e tai titui mi è someât masse. I zovins come simpri a fasin pôre: a son la novitât e intun mont dulà che si sberle al Gambiament ducj a àn pôre di gambiâ e partant la mê posizion e je che bisugne vê coragio e jessi coerens: se si dîs «Largo ai Giovani», cualchidun al à di tirâsi in bande».
Ce sugjerissial al President di «Ente Friuli nel Mondo»?
«O ai vude maniere di tabaiâ sedi vie pe Cunvigne che in bande cul President e i ai dite che a là di vê la fuarce di meti in consei cualchi zovin che al tabai il lengaç dai zovins (Internet, social networks, videoconference) vuê i zovins a àn modalitâts diviersis di comunicâ ma chest no vûl dî che no sedin «puartadôrs sans» di culture (inovazion e storie). Ator pal mont a son furlans di tierce e cuarte generazion, braurôs de lôr storie e famee, che a direzin Centris di ricercje (il software di control dal shuttle al è fat di un furlan) e o podarès tignîus chi par oris cun robis concretis».
Ce funzion puedial vê internet?
«Internet al à rivoluzionât il Mont e o sin dome a mieze vore – in pôcs minûts si pues imbastî une riunion cun ducj i fogolârs pal mont cuasi cence spindi (e cheste e je une robe che ai furlans ur plâs) si pues viodisi in muse cu la videoconference: si dîs che ator pal mont al è cualchi milion di furlans… ce fasìno? e sarès la plui grande lobby internazionâl za pronte… ma bisugne metile in moto no si pues ridusisi dome a cualchi incuintri e cualchi cene. La memorie e la storie a son basilârs, ma par miorâ il prossim bisugne tirâsi sù lis maniis e metisi a vore magari cuntune tastiere e sence picon, ma bisugne movi il cûl… la storie e insegne che nissun ti puarte nuie di bant su la puarte di cjase».
Lui al fâs television vie web, invezit ce pensial dal digjitâl terestri?
«A son 2 manieris di comunicâ dal dut diviersis e contrariis: Internet al è nassût par permeti a ducj di comunicâ, contâ la proprie storie, iessi economichementi a la puartade di ducj e vie indevant; il digjitâl terestri che dut câs al è un sisteme dal pont di viste tecnic za vecjo, al rive par controlâ il plui pussibul ducj… Licensis limitadis e costosis (diviersis televisions a spariran), a limitazion teritoriâl e po dopo sisteme inzegnôs par studiâ lis abitudinis des personis e preparâi a paiament i prodots esclusivementri comerciâi. Il mont de comunicazion al è gambiât e al gambiarà ancjemò stant la situazion di crisi internazionâl: lis aziendis no àn bêçs di butâ in publicitât e produsi programs al coste une vore… tai prossims mês, no agns, o viodarìn gruessis novitâts».
Christian Romanini