CULTURE – E-MARILENGHE. Web – politiche dai popui

Pe rubriche di chest mês us proponìn une selezion di sîts di partîts politcs des minorancis europeanis, par capî trope impuartance che e ven dade ae rêt e a lis diviersis lenghis tes campagnis eletorâls e te comunicazion di chestis fuarcis politichis.
PARLAMENT EUROPEAN
European Free Alliance www.e-f-a.org
La EFA e je il partît che al dì di vuê al rapresente un trop di 35 partîts autonomiscj e indipendentiscj europeans. Il sît al è dut par inglês, cun dome une pagjine di benvignût voltade par 27 lenghis (si cite talian, sardegnûl e, joi…nuie furlan).
STÂT TALIAN
Südtiroler Volkspartei www.svpartei.org
Il sît dal partît dai todescs e ladins sudtirolês, cuntune grafiche essenziâl ma curade, al è fûr par fûr par todesc, cun dome une pagjinute di presentazion voltade par talian, inglês e ladin.
Slovenska Skupnost www.slovenskaskupnost.net
La Union Slovene, partît presint in Friûl-VJ, al à un sît une vore puar, essenziâl te grafiche e tai contignûts, dut par sloven cun dome l’organigram dal partît disponibil par talian e inglês.
Union Valdôtaine www.unionvaldotaine.org
Il sît dal prin partît de Val di Aoste al è bielonon, dinamic, moderni e dut par francês.
Partito Sardo d’Azione www.partitosardo.it
Chest al è l’unic sît di une minorance dal Stât talian cun version bilengâl simetriche talian/sardegnûl tal almancul il 90% dai contignûts.
FÛR DAL STÂT TALIAN
Enotna Lista www.elnet.at
Il partît dai slovens te Carinzie austriache al è une vore biel e curât, cun version bilengâl todesc/sloven di ducj i siei contignûts (ancje i filmâts).
Sinn Féin www.sinnfein.ie / Social Democratic and Labour Party www.sdlp.ie
I doi partîts republicans plui impuartants dal Ulster no dan masse impuartance al gaelic tai lôr sîts. Sinn Féin al ignore la lenghe irlandese, il SDLP al à pôcs contignûts voltâts.
Frysk Nasjonale Partij www.fnp.nl
Il Partît Nazionâl Frison si presente par frison, olandês e inglês, cuntune cure particolâr pe version frisone.
Plaid Cymru www.plaidcymru.org
Il storic partît galês al è disponibil sedi par inglês sedi par galês in ducj i siei contignûts.
Eusko Alskartasuna www.euskoalkartasuna.org / Euzkadi Buru Bazarra www.eaj-pnv.eu
I principâi partîts indipendentiscj bascs a son fûr par fûr par basc cun versions plui o mancul speculâts in castilian e francês.
Fasint lis sumis, l’esempli plui negatîf lu partin i partîts dal stivâl. Un viaç in chestis pagjinis al podarès dal sigûr jessi bon par ispirâ ancje i nestris rapresentancj metintju in vuaite cuintri il cjapâ sot gjambe l’aspiet de comunicazion, vierzintsi ancje a un ipotetic visitadôr no-eletôr.
Michele Calligaris