AI 32 DI MAI. Il marketing dai mondiâi di balon

Forsit i furlans no stan masse atents aes cuistions di marketing e di publicitât, ma une robe a è impussibil no viodile: cuant che a vegnin dongje i mondiâi di balon, dutis lis aziendis a deventin tifosis. Une a met sù un concors par fâti vinci doi biliets pes partidis, chê altre e piture di blanc, ros e vert la confezion dai siei prodots, chê altre ancjemò ti torne indaûr i bêçs dal televisôr se la Italie e vinç. I talians, che sot dai mondiâi a àn tal cjâf nome il balon, a restin incjantâts e a comprin dut ce che tu ur fasis viodi.
Cussì, o ai pensât che il Friûl al podarès imparâ alc ancje lui, di chestis strategjiis. Ve chi alore cualchi idee par fâ marketing furlan in timp di mondiâi.
Prin di dut, bisugne vistî i prodots cun alc che al ricuardi il balon. Il frico al è bielzà taront: fasìnlu cu lis patatis esagonâls e il Montasio pentagonâl, cussì al samee ae bale.
La sgnape? Confezion speciâl pai tifôs: une butilie di sgnape aes cerniculis, une di sgnape di bessole e une di sgnape ae mente (lu sai che la sgnape ae mente no je propite une robe tipiche, ma no stin a fâ i tichignôs: cussì al va il marketing) e al ven fûr alc che al samee al tricolôr.
Ancje l’artesanât plui tradizionâl al pues pleâsi aes regulis dal marketing dal balon. Pensait ai scarpets cjargnei: parcè no meti a vendi une edizion speciâl cui tacuts? E invezit di picjâ fûr une bandiere, parcè no fâ un pocje di promozion di un altri prodot locâl fasint un mûr tricolôr cul mosaic di Spilimberc? Forsit al sarès cualchi probleme a fâlu svintulâ cuant che tu vâs ator a fâ fieste, ma par la promozion dal teritori si pues fâ ancje cun cualchi sacrifici.
I concors? In Friûl nol baste meti in pali i biliets par cjalâ une partide, ai furlans no ur plâs stâ cu  lis mans in man a cjalâ alc. Il premi ideâl? Un puest par lâ a vendi patatinis ae finâl dai mondiâi. Cussì il furlan al met dongje il biel e il bon: si cjape il viaç di rive jù e al va a lavorâ.
Ce puedial mancjâ? Cjadreis di Manzan vendudis dome in formazion 4-4-2? Persut di Sant Denêl cui paresghincs?
Ah, no! Ve chi la idee che e varâ plui sucès di dutis: la Gote di Cjargne ferbinte, in confezion di cinc litris. E je la uniche robe buine di fânus digjerî dutis lis sconfitis de «nazionâl» taliane.
Bete Di Spere