A son passâts cuatri agns dal sucès di “Mondonuovo”, vincidôr dal Premi Hip Hop MEI tal 2022, e dopo une incursion stilistiche cul EP “Biancoscuro” realizât cun Dee Jay Park tal 2025, Doro Gjat al torne cuntun lavôr che al segne un cambiament profont.
◆ Il gnûf album di un dai nestris “Fradis” plui innomenâts, jessût ai 5 di Jugn pe etichete La Grande Onda, nol è dome une racuelte di cjançons: al è un manifest di resilience e cussience, un viaç viers une identitât che no fâs plui cuintri al flus dai events, ma lu imbrace. Disponibil su dutis lis plateformis digjitâls e in formât fisic, chest disc al segne un moment di svolte inte cariere dal artist cjargnel.
◆ Lu cognossìn za ben. Nassût a Tumieç tal 1983, Luca Dorotea, alias Doro Gjat, al à simpri costruît la sô art su chel teritori di mont che lu à viodût cressi. Daspò vê scomençât cul coletîf Carnicats puartant il furlan inte sene taliane, al à saldade la sô posizion soliste cun albums come “Vai fradi” e “Orizzonti verticali”, dimostrant une capacitât uniche di miscliçâ la narazion locâl a temis universâi. Ma cun “Dharma”, il so cuart lavôr di solist, al rive a une maturitât che e passe i confins dal rap tradizionâl.
◆ Il titul, “Dharma”, al à une fuarce simboliche grande. La cuviertine, firmade dal fotograf furlan Davide Paderni, e je il ritrat di un munic in posizion di polse, une atmosfere oniriche ma cussiente. E conte cussì une storie precise: chel rapper al à molât di cori daûr ae aprovazion dal rap moderni par vivi la sô veretât. Une acetazion ative, no rassegnade. Doro al esprim dute la so autenticitât, dant acet a ce che si è pardabon.
◆ Al centri de opare e je la lenghe, tant il furlan che il talian, no doprâts come un garbeç, ma come imprest vîf par une narazion glocal. Tal toc “Inshallah”, il rapper al conte il drame dai migrants dilunc la “rote balcaniche”, trasformant il Friûl, tiere di confin, intun palc di une storie universâl. In “Controvento” al lance un atac lucit aes contradizions de societât di vuê; in “Cramârs” e je la partecipazion dal cjantadôr Alvise Nodale e dal so colaboradôr storic, ven a stâi «chel che al è pardabon, di trente agns incà (fale chel biologjic), me fradi» Dek ill Ceesa, al cjante dut par furlan, un brindis intens e atmosferic. Ma nol mancje ancje il toc plui solâr: “Ciaomandi”, omaç al salût tipic furlan, costruît suntun rangjament funk-pop strissinant, impreziosît di El Armando.
◆ Chest lavôr al rapresente il so progjet plui ambiziôs e personâl. Dîs tocs che a traviersin impegni civîl, lidrîs teritoriâls e ricercje interiôr. Il sun al è organic, curât in dut e par dut dai musiciscj de sô live band, Luca Moreale e Giacomo Santini, che a abandonin il stîl dal rap contemporani par imbraçâ une sonoritât plui naturâl e vivude. Ogni strument al fâs vôs, ogni note e devente respîr.
◆ Cun “Dharma”, Doro Gjat al consegne ai scoltadôrs un vêr manifest di resilience, confermantsi un peraulant e musicist di ecezion. L’artist al dimostre che par jessi universâi nol covente dismenteâ di dulà che o vignìn, ma savêlu contâ cun voi gnûfs. Cheste jessude e segne la metamorfosi artistiche definitive di Luca Dorotea: no plui dome rap, ma musiche di autôr che e covente. Un Friûl che al berle, che al riflet, che al cjante, puartant la sô vôs dentri e fûr dal Paîs cuntune coerence che si cjate da râr. “Dharma” nol è dome un disc, al è la fotografie di un om che al à cjatât il so puest tal mont, e nus invide a fâ la stesse robe.
◆ L’album al è disponibil su Spotify, Apple Music, Tidal e intes buteghis fisichis. Par scoltâlu, savê là che a son i siei concierts e savê di plui, lait a viodi i siei sociâl @dorogjat (https://linktr.ee/dorogjat) ❚
