La famee dai Conts e à vût tancj feuts jenfri Carinzie e Baviere
Culì, tor ator, ducj ti san mostrâ dulà che al è. Sì, parcè che il lûc al è maraveôs, une mete turistiche ricercjade soredut di cui che al ame la bielece dal paisaç, la ricjece de storie e la bontât gustose dai plats de tradizion. Par jessi stât in persone, o pues dî che il gjalut tal spêt al è cuasi une des provis de esistence di Diu. Cence dismenteâ la grande varietât di sopis di stagjon, une variante dute sô dal gulasch, e i dolçs de tradizion, ducj gjavâts fûr dal for di mans savis, seont lis regulis antighis, e culì ducj a parin jessi propit braurôs di chest. In fin dai conts, za di agns la filosofie, par chest teritori de Europe, e je chê di valorizâ lis specificitâts buinis di rindi uniche une regjon, un svant par chei che le abitin, un biel mût di imparâ e une ocasion di bielece par chei che invezit a vegnin a visitâle. Ancje la fevelade culì e à un gust dut so. O sin lontans de capitâl, al ven bessôl che la culture si esprimi cul acent des maris, cu lis peraulis mastiadis par gjenerazions dai antenâts che a àn savût cambiâ in musiche fin la gramatiche. Il cjistiel dai siôrs di Purcie al è un pôc il struc di dut ce che o vin dit: no dome un lûc fisic, cu la sô storie che e à cjapât il profîl di resistence de identitât, chê dal borc che cul passâ dai secui si è struturât su lis sôs lidrîs, ma ancje un spazi modernissim par organizâ events culturâi, conferencis, incuintris, concierts di musiche di ogni sorte. E la creativitât e rint: la citadine e je une vore frecuentade dai zovins. Lis gnovis gjenerazions culì a àn la pussibilitât di inventâsi senaris alternatîfs, cirint gnovis stradis di sperimentazion tai cjamps plui diviers: poesie, mode, art. Insome, Purcie e je pardabon un model esemplâr, e e merete di jessi part di chel contest teritoriâl che al pues, cun coragjo, svantâ di jessi part dal contest sielt par une “Capitâl de Culture”. Cemût? I conts no tornino? No, no feveli dai Conts di Purcie. Chei no tornin sigûr, mangjâts dal bultric de storie. O feveli dai conts intindûts come provis, fats reâi, realtâts sclaridis. No cognossêso il cuadri piturât? Ahh… ma voaltris o pensais a chê altre Purcie! Chê che e je inte provincie di Pordenon. No, no, jo o fevelavi de Porcia in Austrie, anzi, in Österreich. Dulà che il contest “gjeopolitic” al è sigûr dut diviers rispiet ae realtât omonime logade inte plane a man drete dal Tiliment. Che vuê e pâr, puare jê, mancul privilegjade e sigûr no judade come che e meretarès di chel Stât che vuê al sbandiere “le sorti felici” di une capitâl teritoriâl, rose tal boton de sô Culture, chê “nazionâl”, al è evident, espression di une apartignince par ce che si viôt sfalsade e dute inventade. Come che e mostre no dome la storie, ma ancje la gjeografie. Purcie e je plui dongje di Porcia (chê di là des Alps) che no trop che e je lontane da Rome. E par secui il so destin al è stât peât aes sortis dal Imperi. Il so non lu cjape dai dominadôrs romans: a son chei che a sostegnin che il non al fasi riferiment a une antighe “gens”, altris, in maniere plui grivie, lu lein a chel di un teritori là che a passonin i purcits. Se e fos cussì, svantâ la origjin latine, come che tancj in chescj dîs di furiis talianis si ustinin a fâ, no sarès po tant degn di onôr. Cetant plui dongje invezit i colegaments e i rapuarts cu la corone asburgjiche, che e à savût valorizâ lis risorsis dal teritori, fasint di jê ancje un svant personâl: la famee dai Conts di Purcie, pai servizis fats e gradîts des jerarchiis imperiâls, e à vût in don tancj feuts, regjons e palaçs storics jenfri Carinzie e Baviere. E il periodi di aur al è stât chel jenfri il ‘500 e il ‘600, cuant che la Patrie dal Friûl si scjafoiave sot dai fums de lagune veneziane, ma culì si cjalavisi plui ator e cun evident benefici. Testemoneance privilegjade di chestis interconessions europeanis e reste ancje vuê il Schloss Porcia, dongje de localitât carinziane di Spittal an der Drau. E se Vignesie e à slungjât lis mans sul borc furlan za dal 1418 indenant, cuasi doi agns prime che il rest dai teritoris, e je stade propit la presince di Pordenon, enclave sometude par timp lunc ai Duchis di Austrie, come che o varìn mût di contâsi inte prossime rubriche, che e à salvât i Puriliesis, tignint viert un canâl privilegjât cu lis tieris danubianis. A àn vût acet no dome i rapuarts diplomatics, ma ancje chei economics e culturâi. In fin dai conts, i siôrs di Purcie a podevin fâsi biei cul titul di “Princeps” dal Sacri Roman Imperi Gjermanic za dal 1662 indenant, par zentîl concession dal imperadôr Liopolt I di Austrie, e ancje dal prestigjôs “Toson di Aur”. In efiets a forin cetancj i membris di cheste famee a cuvierzi incarghis impuartantis par espression dal guvier di Viene: diplomatics, ministris, comandants militârs. E tal stes timp inte Purcie furlane a rivarin un grum di maestrancis des tieris di là des monts: artesans, oresins, architets, pitôrs e musiciscj. Fra i tancj, al merete nomenât Isaak Fischer il Vieli, di Auguste, che al à lavorât jenfri la fin dal ‘600 e i prins dal secul seguitîf, judant a regalâ al contest dulà che al jere atîf un profîl pardabon nordic, inte reinterpretazion dal Baroc che si presee a Nord des Alps, cu la cantorie dal domo, e la glesie di Sante Marie Assunte che a son esemplis maraveôs. La storie plui resinte, chê leade plui drete ae Italie, e gjolt sigûr di une lûs plui debile e flape. I politics “talianissims” di chescj ultins agns si son lassâts sgarfâ vie fin il prometent disvilup industriâl che cul binomi Zanussi Rex al à marcât par agnorums il so teritori, volût di une classe imprenditoriâl in cualchi maniere ancje dedite al mecenatisim. E a une classe di operaris braurose de sô identitât e apartignince, contente di vivi il lavôr come espression de sô professionalitât e bravure. Ma lis robis a cambiin: la multinazionâl svedese Electrolux e à comprât il grup Zanussi za tal 1984. E tal 2015 i à mangjât ancje il “brand” Rex. Sì, la Electrolux. Che in chescj dîs e je sot dai rifletôrs de croniche par sieltis politichis e economichis cjapadis inaltrò, no culì, no sul teritori, cul risi di causâ disocupazion e miserie. Une lûs che si distude, insome. A bon pro de capitâl taliane de culture. No varès voie di dîlu e duncje lu scrîf. Ma lu scrîf sotvôs: a distance di doi mil agns, salvade la brilante parentesi asburgjiche, vuê Purcie e riscje di tornâ a jessi chel che za Rome i veve regalât, e che la toponomastiche – talianissime! – e declare in dut il patùs dal so significât. ❚
