Interviste cul professôr Ferruccio Tassin,
grant espert e divulgadôr
de culture dal Friûl di Soreli Jevât
Ferruccio Tassin, classe 1944, di Visc, al è stât insegnant, atîf in politiche e te vite sociâl dal Friûl Orientâl. Al è soci fondadôr e vicepresident dal Istitût di Storie Sociâl e Religjose di Gurize, deputât de Deputazion di Storie Patrie pal Friûl, soci de Deputazion di Storie Patrie pe Vignesie Julie, soci onorari dal Memorial Kärnten Koroschka di Clanfurt, membri dal Comitât diretîf de Societât Filologjiche Furlane. Al è gjornalist publicist e al à publicât une vore di libris, studis e articui, massime tal cjamp de storie sociâl e religjose. Tal 2008 i è stât assegnât il premi «Merit furlan» e il mês stât al à ricevût il premi internazionâl “Città e Cultura” di Castrovillari.
__
Ferruccio, in ce ambient sêstu vignût sù di piçul?
Jo o soi nassût a Visc ma i miei a son di Rude, e jo o feveli il furlan di Rude. O soi cressût in place, inte parochie, che e veve un grant predi che si clamave Umberto Miniussi, e cun ducj o fevelavi dome furlan. La lenghe taliane le ai scuvierte sui libris, e leìnt il gjornâi che i rivavin a gno pari – il Gazzettino e Il Popolo – za di cuant che o vevi sîs agns. Po dopo o soi lât tal seminari par doi agns e mieç – li al jere improibît e sanzionât fevelâ furlan – e po o ai continuât a Gurize cul istitût magjistrâl. Daspò, viodût che o jeri brâf a scuele, mi àn segnalât e o soi lât a Bologne tal coleç internazionâl dal gardenâl Lercaro. Li o ai fat cuatri agns cun fruts rivâts di dut il mont: une esperience maraveose. Mi soi laureât in Materiis leterariis e o soi tornât in Friûl, dulà che o ai insegnât par plui di trente agns a Palme. Cence fâ mai une ore di malatie.
E une sorte di “cussience furlane”, che il furlan al è une lenghe e chel furlan un popul, cuant ti ise vignude?
Simpri vude, in maniere naturâl, pense che li di nô il predi al faseve dôs messis la domenie: te prime al faseve la predicje par furlan. Pre Miniussi mi à lassât lis sôs cjartis, là che a son ancje i avîs de glesie di uns cuarante agns di ativitât: la plui part e je scrite par furlan. E, simpri lui, mi à dât ancje l’archivi dal fondadôr de prime Casse Rurâl Furlane, che al jere un predi di Grau, che al veve scrit une vore di predicjis in furlan. Simpri tal paîs, o vin fondât un gjornalut locâl che al è lât indevant par trente agns e che al è stât une vere palestre par scrivi in marilenghe: «La Plaze».
I ten a dî che la lenghe le ai imparade tant dai vielis, che a àn insiorât dut il gno vocabolari. A dodis agns o passavi zornadis interiis a scoltâju e a fevelâ cun lôr: ju frecuentavi! E intant che mi contavin storiis, po mi davin ancje di bevi cualchi tai di vin… a dodis agns! (al rît, ndr)
_
A proposit di leturis, ti visistu de prime volte che tu âs let alc par furlan?
No ai ricuarts particolârs di une prime volte che o ai let alc di furlan parcè che lei par furlan o par talian par me al simpri stât naturâl. Come che o disevi prime, o ai vivût intun ambient li che e zirave la lenghe furlane ancje scrite. Come autôr, il gno preferît al è pre Toni Beline, che al veve un biel furlan e ancje une scriture sauride e spiritose, ancje se no jeri simpri dacuardi su chel che al diseve.
_
E altris “mestris” de lenghe scrite?
Celso Macor sedi pe prose che pe poesie, invezit pe poesie Renato Iacumin e Galliano Zof. Fra chei plui resints al è brâf pe prose Gianluca Franco di Caprive. Po dopo o citarès Anna Bombig, che o ai ancje curade la sô opera omnia, e un che al è cognossût pôc: Franco de Girocoli, un miedi famôs che al jere ancje poete, e che al doprave un biel furlan, tant fin e elegant.
Pe sagjistiche, lis antologjiis e i studis di Gianfranco D’Aronco e Dino Virgili. Di Virgili mi visi il so «La flôr (letteratura ladina del Friuli)».
Un altri che al à fat une vore pe leterature furlane al è Hans Kitzmüller, cu la sô cjase editore Braitan, dedicade ae riscuvierte dai autôrs plui impuartants slovens, furlans e carinzians. E ju à fats “dialogâ” fra di lôr tradusintju fra chestis lenghis. Par esempli al à publicât par todesc une grande cuantitât di leterature furlane. O ai gust di nomenâ Giorgio Faggin che al à fat tornâ a scuvierzi tancj autôrs, come Zuan Minut, il poete socialist dal Friûl di Soreli Jevât.
_
Tu tu sês un grant studiôs di storie: cui ti aial influençât in chel cjamp?
Carlo Guido Mor, don Luigi Tavano che al veve une grande culture dal pont di viste storic e ancje sociologjic, Camillo Medeot che al à vût la idee di fondâ l’Istitût di Storie Sociâl e Religjose. Lui al è impuartant ancje parcè che al à tornât a scrivi di une storie che il nazionalisim talian al veve soterât: la storie de Contee di Gurize e Gardiscje. Le à fate tornâ a vivi. Dal pont di viste de politiche, puedistu nomenâ cualchidun che al à tignût al Friûl? Il prin che mi ven iniments al è Mario Toros, om furlanon e ruspant. Po dopo Danilo Bertoli e Giorgio Santuz. Cun lôr tu fevelavis simpri par furlan e a tignivin tant a cheste tiere. Un che mi à influençât tant dal pont di viste politic, tornant indaûr tal timp, al è Luigi Faidutti: une figure che o ai studiât tant. Al jere deputât tal parlament di Viene, al jere pe justizie sociâl e pe cooperazion, e jo o condivît lis sôs ideis. Un catolic popolâr. E mestris dal pont di viste ideologjic, che a àn difondût une biele idee di Friûl? Sigûr Renato Iacumin e Celso Macor.
_
Tu cemût ti definiressistu “filosofichementri”? Furlanist, autonomist, indipendentist…
Jo mi sint cussì, cun cheste sucession: catolic, european, furlan e talian. O auspichi un Friûl viert e plurilengâl. Dal pont di viste aministratîf, o vevi tante sperance tes Regjons, ma cumò la plui part dai contenziôs e je fra Stât e Regjon. Une delusion e un fatôr di confusion. Duncje o soi par un podê centrâl, che al pues jessi chel european o talian, e autonomie nome par cualchi materie.
_
Oltri ae leterature e ae storie, âstu cualchi passion che no vin contât e che ti plasarès nomenâmi cualchi mestri? Art, musiche…
O ai dome une passion oltri a chês che o vin dit: l’ort. Lu colti daûr di chestis percentuâls: 40% par me, 40% pai insets, 20% pai uciei. Chest parcè che no buti velens (al rît, ndr). _
E alore, âstu “mestris di ort”? Int che e à savût contâ cheste “art” tant furlane?
Par chel cont mi plasarès fâ il non di int che no je famose, ma che e veve une grande culture in chel cjamp: Antonio Tiussi, che cun lui o lavi ancje a cais di gnot, cul ferâl a carburo, e Raffaele Minut, che o ai scrit une conte su di lui. Dôs personis di Visc che mi àn insegnât dut chel che o sai de nature e des bestiis dal teritori. Ancje dal pont di viste linguistic!
Un che al sa scrivi – e tant ben! – di chestis robis al è Enos Costantini e mi onori de sô amicizie.
__
Ultime domande, un personaç o opare che par te al varès di jessi valutât di plui.
No si sa tant de figure di Enrico de Calice, che al è stât un diplomatic austroongjarês impuartant e un grant leterât. La sô famee e jere origjinarie di Paulâr. Al à vivût tra Votcent e Nûfcent e al à voltât par furlan lis plui grandis oparis mestris de leterature todescje. Federico Vidic al à scrit un biel libri su di lui. ❚
:::::::::::::::::::::::::::::::::::::::::::::::::::::::::::::::::::::
FOCUS. Il personaç
Enrico de Calice / Heinrich von Calice (Gurize, 1831 – Sant Pieri di Gurize, 1912).
Al nassè a Gurize ai 31 di Març dal 1831 intune famee di comerciants origjinarie di Paulâr, di cundizions modestis, ma che di timp e veve ricevût il titul baronâl.
Dopo dai studis fats a Gurize, Viene e Heidelberg, Enrico al tacà une cariere diplomatiche brilante tal Imperi Asburgjic. Al fo consul a Liverpool, rapresentant austroongjarês in Cine, Gjapon e Siam, e dopo ambassadôr a Costantinopoli.
Al ve un rûl impuartant tai rapuarts tra Austrie Ongjarie e Gjapon dilunc de epoche Meiji, contribuint a stipulâ acuardis comerciâi e diplomatics.
In paralêl ae ativitât diplomatiche, al coltà une passion profonde pe leterature. La sô impuartance pe culture furlane e derive soredut des traduzions dal todesc, realizadis tal furlan gurizan. Tra i tescj plui cognossûts a figurin Il çhant de la çhampana (Das Lied von der Glocke) di Schiller, Il bal dai muarz (Der Totentanz) di Goethe e cetancj Lieder (“cjants”, ndr) di Heine.
Lis sôs traduzions a dimostrarin che il furlan al podeve esprimi cun dignitât e ricjece i grancj classics europeans.
In chest sens, Enrico de Calice nol fo nome un tradutôr, ma ancje un promotôr di une vision europeane de lenghe furlane. ❚
