L’incjant dal svol

Al è impussibil no restâ maraveâts denant des creaturis aladis che a vongolin tal aiar, cun danzis sflandorosis e acrobaziis straordenariis che nus ricuardin cui che al è il vêr paron dai cîi, in stât di svolâ cun gracie e daûr des leçs de nature, prime che l’om al rivàs a imponisi sul ordin dal mont.
◆ Un popul dai nûi che al lassave incantesemâts pal sium dai umans di dominâ ce che al stave parsore di lôr, tramudant lis traietoriis in calcui e lis plumis in argagns di fierace e tele, tant che lis machinis aladis di Da Vinci, e tal stes timp al meteve ancje in vuaite sui pericui e sui limits dal nestri destin, cu la fragjilitât des alis di cere di Icar a segnâ la sô condane tal volê svicinâsi masse al soreli e ancje la sconfite dal inventôr e pari Dedal.
◆ Dal rest, il non latin par “uciel”, ven a stâi “avis”, al à dade vite ancje ae peraule aviazion, ancje se in dì di vuê lu peìn plui dispès ae malatie de aviarie.
◆ Il tiermin furlan, cussì come chel talian, al è une evoluzion dal diminutîf “avicellus”, che dopo tal latin volgâr al è deventât “aucellus”, dant vite ancje al francês “osieau”. Par inglês, invezit, o cjatìn “bird”, suntune evoluzion di un “brid” che intal imprin si doprave dome pai poleçuts (une ipotesi e podarès jessi il leam cun “breed”, ven a stâi “nudrî”), biel che la peraule origjinarie par “uciel” e jere “fugol” (tant che intal todesc di vuê “Vogel”), che dopo si è mudade in “fowl” par lâ a definî dome il polam. Par spagnûl o podìn cjatâ “ave”, daûr de forme latine, ma ancje “pájaro”, che al è stât slargjât a ducj i uciei, ma che al è in realtât une evoluzion dal latin “passer”, che al lave a marcâ dome il gjenar des “passaris”. Juste par curiositât, se o vessin volût voltâ il non inglês dal innomenât protagonist dai piratis dai Caraibis, o ben Jack Sparrow, o varessin vût di clamâlu “Jacum Passare”, ma forsit par furlan nol varès vût dut chel sucès.
◆ Tra i esemplârs plui grancj e maestôs a jentrin dal sigûr i rapaçs (“rapax” parcè che “a robin, a puartin vie” la prede, di chel “rapere” di li che nus rive ancje il tiermin inglês “rape”, o ben “stupri”), che par todesc a son “Raubvogel”, di “rauben” che al jere la prede o il botin e di li che nus è rivât ancje il tiermin “robâ”. Chescj uciei a son indotâts di sgrifis ben uçadis (sgrifâ, dal langobart “krampfa”, o ben “lincin”, di li che al rive ancje il verp “grampâ”), par talian “artigli”, che intune evoluzion dal latin “articulus” (“articolazion”) a son lâts a marcâ prime i dêts dal pît e po dopo lis ongulis spiçotis. Par inglês une sgrife e je un “claw”, de stesse divignince dal fradi todesc “Klaue”. Ma par puartâ vie la prede, i rapaçs a àn di vê ancje un bec impuartant, ancje clamât “rostri” (dal latin “rostri”, che al diven dal verp “rodere”, o ben “roseâ”). Il “beccus” al à un von comun in diviersis lenghis lenghis, si che duncje lu cjatìn ancje intal “beak” inglês, li che invezit par todesc o vin “Schnabel” (forsit onomatopeic).
◆ Ducj i uciei, dut câs, a son indotâts di plumis (e forsit la “pluma” latine e dave la idee di alc che al nade intal aiar, daûr dal verp grêc “pleo”, “nadâ”, juste apont), par inglês “feathers” e par todesc “Federn” (di une lidrîs gjermaniche cul significât di “svolâ”), in plui des alis (“ailes” par francês e “alas” par spagnûl, de contrazion dal tiermin latin “axilla” o ben “lesine”, che però al è peât a “axis”, o ben “as”, tal sens di centri pal moviment). Par inglês, chestis parts dai uciei si clamin “wings”, une vore dongje dal tiermin “wind”, o ben “aiar, vint”. Par todesc, o vin “Flügel”, che invezit al fâs pensâ al verp “fliegen”, o ben “svolâ”.
◆ Di là des parts anatomichis, al è interessant marcâ che i nons furlans dai uciei, dispès cussì diferents dal talian, nus puartin a diviersis considerazions sul sens pratic e su la scletece dai nestris vons intai timps lâts.
◆ No cate che il svol e il cisicâ di chescj nemâi a vedin simpri acompagnât il viaç dal om, inte culture furlane i uciei a vegnin definîts in maniere clare dome se a àn une funzion, une impuartance e soredut une rese te vite di ducj i dîs, se di no, a van a risi di jessi sconfondûts un cun chel altri o a no vê un non ben precîs.
◆ Ve che inalore in Friûl nol è nissun dubi sul non di dâi al “dindi” o “dindiat” (par talian “tacchino”, forsit onomatopeic), ancje se par juste ator pal mont e je un tic di confusion su chest uciel, che in diviersis lenghis al è peât al puest di li che si pensave che al fos origjinari. Noaltris lu clamìn cussì parcè che par nô al ven “de Indie”, compagn dal francês “dinde”, li che i olandês (e di li buine part dal Nord di Europe) lu clamavin su la fonde di un puart precîs intal Est de Indie (Calicut). I inglês a son sigûrs che al rivedi de Turchie, stant che lu clamin “turkey”, par cuintri, i portughês a declaravin che al vignìs dal Perù, intant che intai Balcans cualchidun al jere convint che al rivàs dal Egjit (“misir”), biel che altris si contentavin di savê che al rivave di cualchi bande “di là dal mâr” (tant che par albanês o par slovac).
◆ Inte culture furlane, dut câs, o cjatìn pardabon une esaltazion dai riferiments ornitologjics par definî cualitâts dal om, massime in negatîf, cul significât di stupit, indurmidît o di pôc svelt. Ve che inalore o podìn doprâ a plasê e tant che sinonims: badascule, barbezuan, catùs, cocâl, çus, dordel, gjaline, lodul, mierli, ocat, sturnel, totul e vie indevant.
◆ Se us ves di sucedi ancje a voaltris, no stait a cjapâse, ma consolaitsi pensant che lis ricercjis nus confermin simpri di plui che chestis bestiis a son une vore inteligjentis.
◆ Par chest mês, però, vonde secjâus lis mirindis: o tornarìn a cjapâ il svol tal prossim apontament. Par intant, jevait i vuestris voi e tacait a scrutinâ il cîl par lassâsi incjantâ di chestis creaturis aladis, libaris des nestris scjaipulis mentâls. ❚