FurlRun une maratone pe marilenghe…

Interessante la iniziative de Associazion Sportive Furlane che, in ocasion de Fieste de Patrie, e à inmaneât une corse no competitive dulà che ducj a podevin partecipâ par puartâ ae atenzion gjenerâl la impuartance de lenghe furlane che no je ancjemò pupilade come che si dêf, ancje se a son passâts zaromai plui di 25 agns dal ricognossiment de bande dal Stât talian cu la leç 482/1999.
◆ Copiade un pôc de Korrika che ogni doi agns – za dal 1980 incà – e passe par plui di 2500 chilometris tal Paîs Basc de France e de Spagne par valorizâ l’euskera, la prime edizion de FURLRUN e je partide de glesie mari di Aquilee par rivâ, dopo di 120 chilometris e dilunc 26 comuns, a Glemone, capitâl dal taramot e des iniziativis par memoreâ l’inovâl dai cincuante agns dal scjas.
◆ Grande partecipazion, par numar di podiscj e pal calôr popolâr dilunc dut il percors. Adesion di cuasi ducj i comuns dulà che e je passade la corse: (al lusive, in negatîf, il comun di Buie che al à refudât il patrocini, par vie che i vigjii de sô polizie locâl no capissin il furlan…), une vore i prins citadins che a àn corût puartant adiriture il testemoni: Aquilee, Çarvignan, Visc, Trivignan, Bicinins, Sante Marie la Lungje, Cjampfuarmit, Puçui, Pasian di Prât, Feagne, Rivis Darcjan, Dartigne, Glemone, Murùs dulà che je stade screade une targhe par ricuardâ Marc l’ultin vessilifar dal Patriarcjât, tancj assessôrs comunâi e plui di cualchi conseîr regjonâl. Une grande fieste di popul in sane ligrie cui sbandieradôrs di Spilimberc, i Furlans a Manete, Sdrindule e la magnifiche coreografie zale e blu di Pinte e Spalti.
◆ O vin di marcâ ancje cualchi assence: no si à viodût nissun sorestant de ARLeF, po stâi impegnâts ae Fieste dal Friûl a Dartigne e Montenârs o forsit par vie che la corse no passave par Pantianins.
◆ No vin viodût nancje la assessore Zilli, la cisilute di Glemone, che e veve sigurade la presince, forsit ancje je strache pes iniziativis dal 949m inovâl de Patrie o forsit impedide par vie che dopo la elezion dal segretari provinciâl tal congrès de “Lega per Salvini” plui che cisilute di Vierte (furlane) e je deventade une razute çuete… e duncje no jere in stât di cori. ❚