4. Di Cormons a Madone di Mont. Tal cûr dal Cuei, dal cjistiel di Trus ae tiere di Çorut

Aes cinc e mieze di matine dai 7 di Avost dal 2025 il solit tercet (jo, femine e fie) o partìn di Cormons pe cuarte tape dal Troi di Aquilee. La albe e je un spetacul e la zornade si prospete serene. O sin buinore par pôre dal cjalt. Cheste e je la prime tape che e bandone il plan par lâ simpri rive insù o injù pes culinis. No disnivei grancj, ma continuatîfs par 24 chilometris.
◆ Di fat la partence e je dibot su la rive de Mont Quarine, su la strade che e monte sù e subit o tachi a sfladassâ. Cuant che o sin parsore de gleseute di S. Zuan e de cente, mi fermi e o profiti par contâ che forsit achì e jere la antighe basiliche dai patriarcjis di Aquilee cuant che, dal 628 al 737, a lerin a stâ propit a Cormons, lûc plui sigûr. Ma e jere dome une scuse par cjapâ flât.
◆ Dopo dal prin tornant il pessut celest nus mande par un troi tal bosc. Un bosc di rôi grancj, dulà che o rivìn a barlumâ il cricâ dal soreli ros fra il fueam vert. O sin daûr de glesie di S. Zorç di Breçan e po, rive injù, o lin fin ae strade asfaltade che e passe sot dal cjistiel di Trus. L’aiar al è net e la lûs limpie. O profitìn par fâ cualchi foto. Nol passe nancje un cuart di ore e al sune il telefonut. “Cui isal che al romp lis citis cumò?” o pensi. Al è gno fi. “Bundì pai, o sês sot dal cjistiel di Trus!” “E tu cemût lu sâstu?” “O sês stâts viodûts. Un gno coleghe, vignint a vore, al è passât par là e ti à cognossût te. Tu no tu lu cognossis ma lui sì; al lei ce che tu scrivis e, a pene rivât, mi à dit che tu sês cun dôs feminis.” “To mari e tô sûr. – o rispuint – In Friûl no tu puedis fâ nuie che in curt lu vegnin a savê ducj. Po folc!” E dopo, fevelant ae femine che riduçave: “Âstu sintût? Prove a imagjinâti – o dîs juste par fâle rabiâ – se vuê jo o fos vignût a fâ chest pelegrinaç in compagnie di une biele amante… Timp une ore e za tu lu varessis savût!” No scrîf la rispueste…
◆ O lin dilunc cun snait, gracie ancje ae biele zornade di soreli che si prepare, passant sot di Rutârs fin a Vencò, dulà che o molìn la strade che e va in Slovenie e o montìn sù par une strade fin ae creste des culinis dal Cuei. Une altre biele fature e o sin parsore di un dai tocs plui biei dal Troi di Aquilee. O sin tal cûr dal Cuei, la zone di vins DOC plui innomenade dal Friûl. Il panorame si slargje de bande soreglade sui roncs di vignâi, cui filârs regolârs che a van daûr de cleve in rie come cjavei petenâts cuntun pietin cui dincj larcs e rârs. Lis rivis de bande di tramontane, invezit, a son maglis verdis di boscuts di agaciis e olms.
◆ Cetantis voltis che o sin vignûts di chestis bandis – al è il coment che o condividìn – Cun gno fi e i zinars o vin “visitadis” une vore di cantinis di chenti, ma simpri in machine, ancje par tornâ cjase cul baûl plen di butiliis. E o vin simpri preseât chei puescj. Ma a pît, cjaminant un pas daûr chel altri, e je dute une altre robe. La nestre no je une semplice cjaminade. E je une esperience che e zonte al moviment une scuvierte continue e il timp par rivâ a pensâ. Si rive a jentrâ in sintonie cun dut ce che al è ator. Si pues intardâsi, fermâsi, voltâsi indaûr. Si rive a cjalâ ancje detais piçui, come une rose, une fuee o un clap, come ancje gjoldi di une vualmade lungje su la plane dal Friûl. Cussì si rive ancje a sintî il cisicheç dai ucieluts, il svuacareç di un riul, la bugade di aiarin che e dispetene i cjavei. A son ocasions che la nature nus regale par judânus a ridimensionâ i problemis, par fâ polsâ il cjâf. Ancje cence intenzion si fasìn cjapâ di une meditazion che la nature e met in vore cence schemis o rituâi, che si intive propit cjaminant e che e permet di supâ la sô bielece.
◆ Cun chestis pensadis o sin rivâts a Lonzan, juste te biele cjase dulà che al è nassût Pieri Çorut, denant de gleseute di S. Jacum. Une lapide lu memoree. E ancje a mi mi tocje memoreâ cualchi poesie plui stuzighine dal autôr dai strolics. Di Lonzan a Scriò o passin pes Zimis di Dolegne, par vignâi maraveôs, come chei de Tignude “Stella” che e à doprât i pierons dal puest par fâ, intal mieç des vîts, taulis e bancjis. O profitìn di un di chescj tinei par fâ mirinde e bevi. Il soreli al tache a scjaldâ ma, par fortune, di trat in trat si passe pal fresc di boscuts di rôi.
◆ Dopo di Scriò il troi, simpri tignintsi daprûf di chel che in dì di vuê al è il confin di Stât, al va insù e injù fin a Restocine, piçul borc mai viodût prime, cu lis vieris cjasis in schirie. Un grant arbul sglovât parsore dal troi nus bloche. No si pues sghindâlu ni a drete ni a çampe. Nus tocje passâ par sot dal tronc, a gjat e cence russac, par la jù a Mernic, dongje dal Judri. O passin il flum sul puint dal Sclopitin e o rivìn a Albane di Prepot, o passìn daur dal biel cjistiel restaurat e po, di Cente o tachìn a montà sù tal bosc. Une deviazion nus fâs slungjâ il troi di almancul doi chilometris e il cjalt si fâs sintî. O sin stracs ma di cumò al è dut in rive insù. Il bosc al è bas e râr e nol pare dal soreli alt che al pete come che al è just in Avost. Il troi al è di claps blancs di calcâr che a rondolin sot de scarpis. A ogni pas si piert un tocut che al torne indaûr. Jo o soi stuf, o ai cjalt, pocje aghe che mi tocje razionâ e al somee di no rivâ mai. Passât misdì di un toc, biadelore o rivìn a S. Pieri di Cjaçà, ancje chest un borgut mai viodût. Dentri de cente de gleseute antigone di S. Pieri, dute frescjade, e je une bancje in ombrene. O tirin fûr il nestri gustâ e o jemplìn lis nestris butiliutis ae pompute. O polsìn te frescure sot di un tei e o gjoldìn dal aiarin lizêr. Ma no podìn polsâ masse. Nus mancje une buine ultime cleve. Di bon che achì il bosc al è plui alt. I cjastinârs nus tegnin in ombrene. O brusìn i ultins chilometris e i ultins 300 metris di disnivel e, biadelore, o sin tal plaçâl di Madone di Mont. A son lis 3 e mieze. Fin cumò cheste e je stade no dome la tape plui biele ma ancje chê plui impegnative dal troi di Aquilee. O savìn che a ‘nd è di altris plui duris ma vuê il cjalt al à cjalcjât avonde. Jessi rivâts e je simpri une sodisfazion grande. Vuê o vin fat pardabon il plen di bielecis.
◆ O vin cjaminât simpri suntune tiere che e rapresente il contat e la contaminazion jenfri furlans e slovens, che dome un confin pustiç al volarès dividi. Madone di Mont o Stara Gora al è un lûc une vore simbolic sei pai furlans, sei pai slovens. Jenfri i tancj pessuts celescj che a segnin il Troi di Aquilee, Madone di Mont e rapresente un dai segnâi plui fuarts.
◆ Par cui che al crôt, il santuari al è ancje une presince concrete dal trassendent. Cussì, dopo che si sin confessâts, mi à vignût naturâl dî une preiere ae Madone Nere par dute la mê famee e un graciis al Signôr par dut il ben che o ai vût e che o ai. ❚
[Tal numar che al ven la tape di Madone di Mont a Masaruelis]