La storiche rassegne direzude di Andrea Rucli
e continue i apontaments fint al mês di Jugn
Edizion numar vincj par “Enoarmoniis”, la rassegne promovude de associazion musicâl Sergio Gaggia. La formule origjinâl e aromai ricognossude e e fâs dialogâ la musiche di cjamare cul mont dal vin, metint insiemi lûcs storics e de culture dal Friûl. La locandine 2026, par un festival che al larà indenant fint al mês di Jugn, e presente in maniere clare la anime dal progjet: «rapuarts tra la grande musiche e i miôr vins de nestre tiere», intune sinestesie sensoriâl che e medie sunôrs e savôrs, orele e bocje, viodudis sonoris e sensazions olfativis e di gust.
◆ A dâ coerence a chest percors, che al è stât il prin chenti e che tal timp al à cjatât diviers emuladôrs (ma nissun cul stes atrat), al è Andrea Rucli, diretôr artistic de associazion e curadôr de rassegne, oltri che pianist di innomine e docent al Conservatori Jacopo Tomadini. In ducj chescj agns al à trasformât “Enoarmoniis” intune esperience culturâl une vore plui largje di un cartelon di concierts. Cun lui, tal ideâ il formât, e je stade determinante sul imprin e ancjemò cumò, la presince dal musicolic Umberto Berti, tant che ideadôr dal model inedit insiemi cun Rucli. Il risultât al è un festival che nol met il vin dopo la musiche, come un corolari mondan, tant di riscjâ di risultâ nuie plui che un moment pal aperitîf intant che si scolte. Al è dut altri, tant altri. Il vin al devente un element naratîf e culturâl di prin plan, metût in relazion, in relazion strente, cul repertori, cui timbris, cu lis struturis e cul ambient che al ospite l’event, par un calendari vivarôs sparniçât intun biel toc dal Friûl. Ogni incuintri al previôt, oltri ae partecipazion di musiciscj e formazions musicâls di vere classe, in programs musicâi une vore ben resonâts, la presince di un produtôr di vins furlan, ogni volte un diferent, che al propon la degustazion di trê vins, un diviers di chel altri, che un enorelatôr, musicolic espert e divulgadôr culturâl, al presente al public fasint resonâ i compositôrs e lis composizions cui diviers cjaliçs di bevi, cence dismenteâ la storie dal lûc che al da acet al event.
◆ Cheste impostazion e fâs di “Enoarmoniis” une rassegne furlane indentri, no tal sens retoric o decoratîf dal tiermin, ma tal sens plui sostanziâl e sostanziôs. Il Friûl nol ven di fat doprât come une cuinte seniche, un element decoratîf, ma come une sostance vive che de tiere e tire sù, daûr de cure dai viticultôrs e des fameis produtoris, une sostance bevarine cun particolaritâts unichis, maridant la musiche intune esaltazion di grande sugjestion sensoriâl.
◆ Si va des aziendis viniculis dai Cuei Orientâi ae vilis storichis, des salis civichis aes gleseutis, des cantinis aes badiis. Ogni tape e met in lûs un toc de nestre gjeografie culturâl. In cheste edizion si tocjin Rutârs, Cuar di Rosacis, Colorêt, Spesse di Cividât, Buri, Cormons, Faedis, Murùs, Pavie, San Denêl, Migjee, Rosacis e Premariâs. Il festival al dissegne cussì une mape de furlanetât, dulà che il paisaç, lis produzions viniculis, la memorie storiche e la musiche culte a deventin part di un discors unic.
◆ La edizion 2026 e je partide bielzà ai 25 di Zenâr a Rutârs di Dolegne, te Aziende Jermann, cuntun apontament pensât pal dì de Memorie. A Fevrâr si jere inte Vile Nachini Cabassi, cu la art di Denis Shapovalov. L’innomenât violoncelist al à puartât un percors che al lave di Bach a Čajkovskij fintremai aes improvisazions rock, cul coment di Gabrio Taglietti e cul imbinament a vins de aziende Sergio Scarbolo. Daspò il festival si è movût intal cjistiel di Colorêt di Montalban, te sale Giovanni Melchior, tal non di Mozart. Une tape elegante e luminose, ancje par rinovâ il zimulament cul “Festival Internazionâl di Alba”, cun grancj vins des Langhis in degustazion.
◆ In Març la rassegne e à fat tape a Spesse di Cividât, te aziende Monviert, cun protagoniste la Gnove Orchestre di cjamare Ferrucio Busoni di Triest, direzude di Massimo Belli, il pianist Andrea Bacchetti e Guido Barbieri te vieste di enorelatôr. Cheste serade e à rapresentât ben un altre des vocazions plui finis dal festival, che si interesse ancje di tornâ a scuvierzi autôrs o pagjinis che il public no cjatarès cun facilitât tai solits percors. Simpri in Març si è lâts te Vile Di Toppo Florio di Buri, cu la pianiste Michelle Candotti e l’enorelatôr Marco Mauceri intun program basât su Liszt e Chopin, metût in risonance cui vins de aziende Marina Danieli. Daspò al è stât Cormons, te Sale Consiliâr, cun Gianluca Luisi tal dopli rûl di pianist e enorelatôr, cui compagnaments dai vins dal Conero. In Avrîl Enoarmoniis al jere a Faedis, te cantine Di Gaspero Flavia e Umberto, cu la Schubertiade insiemi cul Refosc, metint insiemi Aylen Pritchin al violin, Andrea Rucli al piano e Paolo Bolpagni tant che enorelatôr. Daspò al è stât Murùs, te Sala Consiliâr, cul Trio Morgen, cun me che o scrîf tant che enorelatôr. Une esperience bielissime, e i vins alc e ce de aziende Borgo Sant’Andrea, compagnant il public intun percors che al passave dal Classicisim ae tension espressive dal Nûfcent. Par dî, mi soi cjatât a dovê, e cun plasê, sielzi trê vins, che o ai vût gust di cerçâ ben prime, cjatant il paron de aziende, Daniele Berini, che mi à lassât sioris cinc butiliis di puartâ cjase, par sielzi ben. Ae fin, cun tante fadie, parcè che la sielte e proponeve vins di grande cualitât, o ai associât in cheste maniere i compositôrs cu lis bevandis di fâ cerçâ: Franz Joseph Haydn cul Pinot grîs, Ernest Bloch cu la Malvasie e Dmitri Shostakovich cuntun bon neri di caratar, neri par fuarce, che chi di nô no si dîs “ros”: il Refosc. Bielis cubiis di savôrs sonorizâts, musichis eseguidis di musiciscj une vore brâfs che a meretin nomenâts: Nicola Marvulli al violin, Camilla Patria al violoncel e Tiziana Columbro al pianoforte. Tante int e tant contente, a Murùs. Ultin apontament di Avrîl al è stât a Pavie, te Orangerie di Vile Lovaria, cun Francesco Dillon al violoncel, Lucrezia Proietti al piano e Elena Abbado te part di enorelatore. Beethoven, Fauré e Rachmaninov a àn dât vite a une serade di grande amplece stilistiche, compagnade dai vins di Vignâi da Duline.
◆ Cumò la rassegne e je spietade pai apontaments dal mês di Mai indenant, incuintris enoarmonics che us invidi a stâur daûr. Domenie ai 10 di Mai, aes 19.00, San Denêl al ospitarà pe prime volte “Enoarmoniis” te gleseute di Sant Antoni, cul program “Aponts enoics de Vuarneriane… degustant l’amaron scaligjar”. A sunaran Cecilia Radic e Roberto Pegoraro, cu lis leturis e i coments di Agnul Floramo, cu lis sinestesiis dai vins des Cantinis di Verona. L’element distintîf de serade al sarà propit chest acuardi tra patrimoni bibliografic, musiche romantiche e culture dal vin.
◆ Domenie ai 17 di Mai, aes 18.30, la cort de aziende Brumat di Migjee e ospitarà “Brindisi e Trinklieder”, cun Giovanni Bietti e Luca Caponi. La serade e promet un percors inteligjent e brilant tal repertori dai brindis musicâi, cun musichis di Bartók, Brahms, Beethoven e altris autôrs, in rapuart diret cul vin fat in chest toc di teritori dal Friûl orientâl. Bietti, colaboradôr storic de Gaggia, al rapresente ben il stamp divulgatîf, ma mai banâl, che il festival al à costruît in vincj agns.
◆ Il mês di Jugn al rapresentarà la colme artistiche e simboliche dal finâl di stagjon. Domenie ai 7, aes 11.00, te Badie di Rosacis, al rivarà “Das Musikalisches Opfer”, ven a stâi la Ufierte musicâl di Johann Sebastian Bach, cun Massimo Mercelli, Lucio Degani, Gianantonio Viero e Roberto Loreggian, e cun Mercelli ancje tant che enorelatôr. Il leam cui vins di Livio Felluga, nassûts intun dai paisaçs plui siôrs di storie dal Friûl orientâl, al fâs di chest apontament une spice culturâl, dulà che la profonditât dal repertori bachian e cjate il so ambient naturâl intune des cjasis simbul di cheste part di Friûl.
◆ Infin, sabide ai 27 di Jugn, aes 19.00, il festival si sierarà a Levrons di Premariâs, tal Parc Sculturis Braida Copetti, cun Dedalo e la Mitteleurope. Il Dedalo Ensemble, direzût di Vittorio Parisi, al eseguirà musichis di Bettinelli, Kurtág e Ligeti, cul acompagnament dai vins de aziende Perusini. Al sarà un finâl perfet: art contemporanie, riferiments mitteleuropeans, paisaçs furlans e musichis di ricercje. Une conclusion che e dîs ben il sens ultin di “Enoarmoniis”: il Friûl nol è perifarie ma un lûc bon di produsi sinestesiis culturâls altis, origjinâls, unichis.
◆ Dopo vincj agns, “Enoarmoniis” si pues calcolâ no dome un festival di sucès, ma une vere infrastruture culturâl dal Friûl. Al à insegnât, e al sta insegnant, che valorizâ i vins furlans nol vûl dî limitâsi ae promozion enogastronomiche. Nus dîs che valorizâ i lûcs nol vûl dî dome jemplâ lis agjendis di apontaments conciertistics. Nus invide invezit a considerâ che valorizâ la musiche no je une operazion elitarie, se e ven metude in rapuart vivarôs cu la comunitât. Par chest us invidi a lâ, a partecipâ, a scoltâ, a gustâ i prossims apontaments. Dutis lis informazions lis cjatais su lis pagjinis social e sul sît de associazion culturâl Sergio Gaggia.❚
