Aziende Lorenzini a Raviei, dulà che a cressin lis vacjis highlander

Tal biel comun di Raviei, in vie Doman (za il non al promet ben) al numar civic 5/A si cjate la sede de ativitât dal zovin Sergio Lorenzini.
◆ “La stale achì in paîs le veve fate gno nono insiemi a gno pari e ai miei barbis, – al conte Sergio – dopo di gno nono e je stade puartade indevant di gno barbe e a àn simpri vût vacjis di lat, rivant a vênt ancje 40. Cualchi an indaûr gno barbe al è mancjât, lui intant al jere lât in pension e al pensave che dopo di lui nissun al varès fat nuie altri, e mi à lassât a mi la stale cun dute la sô robe.
◆ Di cuant che o soi nassût o soi simpri lât te stale, prime cun gno nono, dopo cun gno barbe e gno pari e o ai propit vivût chest ambient; la mê cjase e jere dongje e par chest o stavi pôc a lâ inte stale. O lavi simpri cuant che o podevi: dopo di scuele, di Istât, sabidis e domeniis.
◆ Finide la scuele o ai començât a lavorâ ma mi displaseve lassâ dut bandonât cussì. Vint passion dal mont dai arlevadôrs, mi soi informât su ce bestiis cjoli par che a fossin facilis di gjestî e o ai cjatât chestis vacjis highlander scozesis. O sei lât in Trentin dal prin arlevadôr in Italie che lis à tignudis e lis cognòs benon, o ai zirât un pôc e o soi tornât li di lui par comprâi lis primis trê. O soi lât indevant cussì un pôcs di agns e a son deventadis grandis. O ai clamât il fecondadôr artificiâl par començâ a vê cualchi vidiel e chês 3 a son deventadis 5 feminis. A un ciert pont o ai decidût par semplicitât di comprâ il taur. Cumò ogni an cun lui o ai nassitis (cirche 4 vidiei ad an).
◆ A son cuasi 10 agns che o ai rilevât la ativitât. Plui che altri o cîr di cjatâ di vendi i vidiei ancje se nol è sempliç. O ai provât a macelâ cualchi bestie e in famee la cjar e je stade preseade di ducj. Cumò o stoi lavorant par podê un doman vendi la cjar. O stoi preparant une stanzie par che e deventi un laboratori di lavorazion.”
◆ Sergio al è un zovin motivât e la sô passion lu à puartât tal mês di Setembar dal an passât a molâ il so lavôr fis (impleât intune aziende a Damâr) par dedicâsi dal dut a cheste ativitât.
“Inte zone – al continue – o soi l’unic che al à cheste cualitât di vacjis. Che o sepi jo a ‘nd jere un altri intun paisut dongje Davâr ma no lis à plui e dopo al jere alc vie par Pontebe. Il lavôr plui grant al è fâ il fen. Par fortune ogni an o rivi a fâ alc di plui che o pues ancje a vendi par vê cussì cualchi jentrade.
◆ Dopo o scuen stâ daûr a fâ lis spaltadis. Di Invier lôr a stan intun sierai plui piçul tor ator de stale dulà che a son lis puartis viertis e a puedin jentrâ e jessi cemût che a vuelin e dentri ur doi di mangjâ. Dal mês di Jugn lis meni in doi terens centâts plui grancj achì dongje a 4-5 km. O ‘cjamìn la mont’ in piçul. Cumò a tachin a jessi 16 animâi e pes nassitis mi dan une man gno pari e cualchi amì. I miei fîs a son contents di jessi presints a chest event.
◆ Lis vacjis a son tant buinis ancje se a àn i cuars bocons. Tra di lôr e je une cierte jerarchie: e je chê che e vûl stâ simpri devant, chê che e vûl mangjâ par prime e v.i.
Dal gno lavôr di impleât mi è vignût bon il savê doprâ il computer pe part burocratiche. Il probleme al è che tu rivis strac di sere e tu volaressis dome sierâ i voi, ma tu âs di metiti devant dal schermi a fâ robis… e dispès tu scuegnis cjapâ e lâ tai uficis di persone.”
◆ Sergio al è content de sielte fate – “Di cuant che o ai molât il lavôr, la mê vite e je cambiade in miôr, ancje se lis jentradis a son chês che a son; cumò mi stoi movint par zontâ gnovis ativitâts (manutenzions di stradis, il laboratori pe lavorazion da cjar…). O soi content che ancje i miei fîs si stan apassionant.”
Vie Doman e promet alc di bon! ❚