Nassite e evoluzion dal centri di ecelence
di alte formazion musicâl furlane
Chest an Udin e dut il Friûl a puedin celebrâ un inovâl di valôr civîl, culturâl e identitari fuart. Ven a stâi i dusinte agns de nassite de Societât Filarmoniche Dramatiche Udinese, il nucli de scuele publiche di musiche de citât e la semence storiche dal Conservatori di Musiche “Jacopo Tomadini”. La societât e je nassude tal 1826, in plene Restaurazion, e la sô prime sede e jere intai locâi dal plan disore de Loze Publiche, cuntun salon pai intratigniments musicâi, un palc e stanziis pes lezions. Ma la ativitât didatiche regolâr e jere scomençade dome tal 1831, cuant che, dopo fats i concors, a jerin stâts nomenâts i prins docents: Giuseppe Magagnini pe musiche e il cjant e Giacomo de Sabbata pal violin. Altri passaç decisîf al è stât tal 1837, cuant che la ativitât filodramatiche si convertìs in Istitût Filarmonic Udinês, cuntun va e ven di cambis di direzion, sospensions di lezions e concierts tai agns complicâts a cjaval tra il 1848 e il 1857. Il salt di cualitât al ven tal 1876, cuant che il Comun di Udin al cjape in man la gjestion direte de scuele, rinfuarçant in particolât l’insegnament dai struments a flât, ancje in funzion de bande citadine che e varà un grant sucès di strumentiscj e di public.
◆ Daspò de Prime vuere mondiâl, sot la direzion di Mario Mascagni, cusin dal famôs operist Luigi Mascagni, chel de “Cavalleria Rusticana”, la scuele e cambie organizazion, si trasferìs tal Palaç Otellio e , infin, tal 1922 e ven titulade a Jacopo Tomadini, deventant un istitût parificât a chei statâi. Si varà di spietâ il 1981, e duncje chest an a colin i 45 agns, par che cheste istituzion e deventi in maniere definitive il Conservatori Statâl di Musiche che o cognossìn. Dulintor de nassite de filarmoniche dramatiche udinese si movin figuris di un ciert nivel, tant che Ignazio Miraz, tra i socis fondadôrs, costrutôr di struments a flât. Dongje di lui Alberto Mazzucato, destinât a une cariere di grant nivel, tant come compositôr, diretôr dal Conservatori di Milan e critic musicâl pe Gazete Musicâl de stesse citât. Se Mascagni al pues jessi considerât il grant riformadôr de scuele musicâl, l’udinês di adozion Antonio Ricci al merete il titul di un dai insegnants plui impuartants de storie dal Liceu Musicâl Tomadini. Docent di pianoforte dal 1914 al 1953, agns une vore dificii, al è stât ancje tra i protagoniscj de vite musicâl udinese, cjapât dentri inte fondazion de Societât dai Amîs de Musiche di Udin.
◆ Di rilêf ancje Enrico De Angelis Valentini, autôr tra l’altri di un metodi par pianoforte, laudât di personalitâts tant che Alfredo Casella. Cemût no nomenâ Vittorio Fael, violinist, organizadôr culturâl e musicolic, Piero Pezzè, un vêr motôr culturâl dal Istitût, protagonist de vite musicâl furlane tal XX secul, poliedric a dî pôc. Al baste dî che dal 1939 al 1972 al à insegnât, al Tomadini, storie e estetiche musicâl, composizion, composizion organistiche, musiche di cjamare e orchestre, dant cetant ancje par fâ cressi la biblioteche dal ent.
◆ Di no dismenteâ Gilberto Pressacco, docent di esercitazions corâls dal 1981 al 1997, musicolic, predi, diretôr, studiôs dal repertori aquileiês, cuntun grant apuart al mont de musiche furlane e in lenghe furlane. Tancj di chescj che o ai nomenât a son stâts ancje lôr arlêfs di chel istitût che al deventarà il Conservatori dal Friûl. Par nomenâ altris students ecelents, tra i prins al è di fâ il non di Luigi Garzoni di Adorgnan, il “Cjantôr dal Friûl”, che tal 1925 al conseguìs il magjisteri in cjant corâl. Albino Perosa, diplomât tal 1946 in orghin e composizion organistiche, Giovanni Pigani, mestri di Perosa, Mario Montico, docent di Pezzè e Perosa, e inmò al merete ricuardât Renato Della Torre, che al deventarà docent di estetiche musicâl e bibliotecari, cuntune cariere lungje ancje come critic pal Messaggero Veneto.
◆ Angelo Stefanato al è un altri, arlêf di Vittorio Fael, deventât prin violin solist de orchestre sinfoniche de RAI di Turin e Rome e de Orchestre di Sante Cecilie. Tante robe di scrivi un libri. Par fâ un salt ae contemporaneitât, ve chi par sierâ une liste di students dal Tomadini, cuasi se no ducj furlans, che cumò a son musiciscj di fame: il pianist e compositôr di Grediscje di Sedean Glauco Venier, docent di jazz, Valter Sivilotti, udinês, ancje lui docent al Tomadini, compositôr, rangjadôr, famôs ancje pes sôs direzions al Festival di Sanremo.
◆ Il pordenonês Francesco Bearzatti, tra i jazziscj furlans plui famôs tal internazionâl, il trombonist Rocco Rescigno, di Pasian di Prât, prin trombon dai Duisburger Philharmoniker, Claudio Mansutti, clarinetist e diretôr de Fondazion Bon e de Istituzion Musicâl e Sinfoniche dal Friûl-Vignesie Julie, Gabriele Cassone, trombetist ecelent di grande nomee, Fabiana Noro, diretore dal Polifonic di Rude, Anna Maria Dell’Oste, sopran di lungje cariere ator pal mont e cumò docente di cjant al Tomadini, … e si podarès lâ indenant inmò par lunc. Ma che al basti chest, e mi scusi par chei che no soi rivât a nomenâ. Just par fânus intindi trop valôr che e à cheste istituzion dute furlane. ❚
