Un biel document, ancje se no esaustîf, dal pinsîr dal poliedric architet, gjornalist, studiôs, poete, regjist, poliglot (al fevelave 15 lenghis) e soredut ativist coerent pe cause sarde Antonio Simon Mossa, muart, magari cussì no, dome a 53 agns tal 1971.
◆ Publicât pe prime volte tal 1984 par cure di un so “arlêf”, Giampiero Marra (o, miôr, Zuanne Pedru ‘e Marras, che al à scrit une introduzion dute in lenghe sarde), il libri al spieghe la sô idee di comunitât etniche, contrarie al razisim e al cjampanilisim, e la sô vision dal indipendentisim, viodût tant che vie di integrazion fra i popui dal mont e di emancipazion des minorancis tibiadis. La vore, metude adun in origjin di “S’Iscola Sarda” e “Istituto Superiore Etno-Linguistico Sardo “Antonio Sìmon-Mossa”, e je in pratiche la union di doi intervents a cunvignis indipendentistis, une dal 1967 e une dal 1969, periodi di ativitât intense pal so grup (Partidu Sardu – Partito Sardo d’Azione).
◆ La metodiche di Mossa e jere une vore interessante: e cjatave la sô fonde intun socialisim alternatîf (la ingjenue ma intrigante “vie sarde al socialisim”), internazionalist, che no veve la sô stele te burocrazie sovietiche post-staliniane o staliniane, invezit si leave a une concezion interessante di federalisim european, di costruî soredut midiant dai popui tibiâts e cence Stât (clamâts “etniis”, come che a fasevin ancje altris pensadôrs nazionalitaris dal periodi, Guy Héraud e François Fontan sore ducj), metûts in contraposizion a une Europe dai Stâts e des potencis, leantsi aes lotis anticoloniâls tal mont. Cul passâ dai agns, la sô vision e à cjapât une ande simpri plui rivoluzionarie (forsit propit su ispirazion dai modei dai popui africans, dai bascs, irlandês e vie indenant, obleâts a doprâ fintremai la sclope par sorevivi tant che nazions), finint par fondâ ancje un piçûl grup clandestin. Si lu viôt un tic ancje fasint un confront dai dôi scrits, che a fevelin ancje de lote nazionalitarie dal Partidu Sardu, dal procès di desardizazion, de nazion sarde e dal sô dirit al autoguvier (fasint une analisi storiche, gjeografiche, sociâl e economiche anticolonialiste).
◆ Si cjate ancje une liste di nazionalitâts minorizadis europeanis. Lassant di bande cualchi falope e ingjenuitât (ma si pues capî: nol esisteve Internet in chê volte), cuntune division in minorancis nazionâls e etnichis (no tant juste, viodût che a son la stesse robe). Dentri di chestis, a son ancje i slovens (dividûts jenfri chei ricognossûts des provinciis di Gurize e Triest e chei che no lu son de provincie di Udin) e i ladins, ripartîts jenfri Dolomitis e Friûl (al mancje l’ex mandament di Puart, ma a son specificadis lis provinciis di Pordenon, Udin e Gurize). Al scriveve che la uniche comunitât ladine ricognossude e je chê de provincie di Bolzan: magari cussì no, al veve e al à ancjemò reson.
◆ Dal libri:
“Noi vogliamo conquistare l’indipendenza per integrarci, non per separarci, nel mondo moderno. E la scelta non può essere che nostra, autonoma, cosciente, decisiva.”
“Se un popolo non conquista la sua indipendenza politica non può essere soggetto della sua storia, ma resterà ai margini della storia di quella nazione che lo avrà vinto e dominato. E se un popolo dovrà risorgere dal limbo nel quale si trova, dovrà avere il suo «Stato». Con la conquista dell’indipendenza il popolo sardo potrà costituire il suo Stato che avrà i poteri per promuovere il processo di riscatto e di evoluzione economico-sociale oggi impossibile, in quanto soggetto ad altra potenza che non mostra alcun interesse né alcuna buona volontà per dare alla Sardegna il posto che le compete per ragioni storiche, geografiche, etniche nel consorzio dei popoli liberi.” ❚
