Lagrimis e glorie

Di an in an a rivin i 25 di Avrîl e la fieste di Sant Marc e cun lôr ancje la memorie dal funerâl di pre Antoni fat tal 2007 e mai smenteât. In chê sere, dopo vêlu compagnât tal cimitieri fra lis bandieris dal Friûl che a svintulavin, si jerin cjatâts, dodis di nô, tune betule come che al sucêt in chescj câs. O jerin li, cence pastôr, cidins e scuintiâts: nissun che al vierzeve bocje.
◆ Tai ultins mês lui al diseve e al ripeteve:
– Lait indenant; jo no rivi, fasêt cence di me.
Cuant che o cjali vuê la cuvierte dal so libri: “La fatica di essere prete”, o capìs: al jere plui magagnât di ce che lu viodevi, plui sfinît di ce che o imagjinavi. Cumò, fat il funerâl, o jerin ancje nô rivâts al titul di un libri che lui al veve scrit tal 1983: “Sul at di voltâ pagjine”.
– Cemût sêstu?
– Ma, al diseve pre ‘Sef, si è ducj sturnîts e che si vai.
In chestis zornadis a saran lis celebrazions pe rinassite dal Friûl a cincuante agns di chê tragjiche gnot dai sîs di Mai. No sai se pre Antoni te uficialitât lu ricuardaran; però lui, tal taramot, nus à lassât un grant patrimoni di articui e di riflessions. Vuê, fra ducj i scrits o sielzarès il proclame: “Ai furlans che a crodin” dai 11 di Mai dal 1976.
◆ I fats a son sucedûts cussì.
Il document “Ai Furlans che a crodin” lu à dât dongje pre Antoni Beline insiemi cun pre ‘Sef Cjargnel e pre Renzo Dentesan. L’itinerari al è sempliç: joibe aes nûf sore sere il taramot, vinars pre Antoni al sarà restât intrunît come ducj, sabide al scomence a rifleti, domenie dopodimisdì al è te canoniche di Guart in Cjargne e i trê predis insiemi a impastin in cualchi ore il document. Tal lunis il scrit al ven fat viodi a doi nestris rapresentants cualificâts, pre Checo Placerean e pre Pauli Varut e subit al rive a Glemone li di pre Tonin pe ultime stesure.
◆ Il timp al jere plui che curt; dut si è sierât tal martars di buinore: un taulinut fûr di cjase su la strade blancje devant dai cjamps e une ultime ocjade e batude a machine de bande di pre Tonin che subit e di galop al trotà viers Udin par rivâ in timp ae assemblee.
In assemblee al jere lât a presentâ il document pre Pieri Degan, prevost di Zui: pocjis riis e i predis a àn scomençât a fâ un grant davoi e a berlâ cuintri. Tun marilamp dut si sdrumà.
◆ La assemblee e continuà come che e podeve. Par noaltris di Glesie Furlane, une maçade. Rivade sere, o jeri distrut.
“Ai Furlans…” al sarès stât publicât su la Vite Catoliche dai 22 di Mai. Sut, cence un coment. Dongje e jere ancje une letare: “Radio Trieste non ha detto una sola parola sul documento dei preti friulani di cui hanno parlato fra gli altri anche il Corriere della Sera e la TV nazionale”. Ancje vuê, dopo cincuante agns, chest proclame al reste un monument, une perle, coordenadis unichis pe rinassite di un popul plen di vite fra lis pieris muartis dal taramot.
◆ Un passaç dal document, al numar vot al dîs: “… Cheste int e savarà cjapâ fuarce ancje cence une glesie di claps. Po ben, o domandìn che al passi dal dut in prime rie la preocupazion di tornâ a dâ un sotet dignitôs a di ogni famee, scomençant des plui puaris. Cul timp, se Diu al volarà, si podarà ancje pensâ di tirâ sù cualchi glesie, che e mostri ancje te sô struture che il Signôr al è a stâ cun nô, cence maniis di grandece e monuments che no àn parintât ni cul Signôr ni cui furlans”. La sostance e jere evidente: “Prime al è di fâ lis cjasis e dome dopo lis glesiis”, peraulis dissacratoriis, di scandul, e ancjemò scritis di trê plevans. Dome dopo, tal passâ e cambiâ dai timps, al sarès burît fûr tes predicjis e tai comizis: “Prima le fabbriche, poi le case e poi le chiese”.
Simpri a proposit dal document, al contave pre Checo che al veve vût trê voltis i carabinîrs. A volevin savê cui che al veve fat il comunicât dai predis di Glesie Furlane. Ma pre Checo ur à berlât: “Cumò mi veis stufât. Laitmi fûr di chi”.
◆ Un proclame di chê fate nol pues sedi metût jù in cualchi ore. Al jere di daûr un “tornâ cu la int” no dome par consolâle tal taramot, ma par consegnâi lis coordenadis di une autostime e dignitât che le varès fate rinassi. Di daûr al è ce che pre Antoni, pre ‘Sef e pre Renzo a vevin masanât in cûr par agns vivint dì e gnot tai borcs di une Cjargne che e steve murint.
◆ Chel document al reste ancje in zornade di vuê un “berli de perifarie”, une glorie de “teologjie furlane de liberazion”. ❚