Une flamute che no à voie di distudâsi

Mi ven di pensâ che o sin restâts in pôcs, ma in tantis altris bandis son ancjemò di mancul. In Friûl une part de popolazion e je ancjemò sane: chi no si è dal dut smavît il sens de justizie; une di chês pocjis robis restadis che e rive, a dispiet di cualchidun, a leâ la nestre int.
◆ Al è come se o vessin a ce fâ cuntune flamute che no à voie di distudâsi e che, intun moment, e ven alimentade dal soflâ dal potent di turni che, cun arogance o prepotence, prime nol rive a viodile, dopo la sotvalute e ae fin al reste scotât.
◆ Il dut si manifeste in maniere evidente, par esempli, cu lis mobilitazions di proteste che si viodin cuant che dal alt (clamìnlu alt) e ven calade la necessitât di fâ une opare di impat dal pont di viste ambientâl, che al sedi tal contest grant o tal piçul.
◆ La int lu ven a savê cuant che al è dut za definît, come se la vite des personis dal puest no valès nuie. I residents, che a varessin di jessi tutelâts, a vegnin lassâts a lôr stes.
◆ In chei moments, in maniere spontanie tancj a tornin in place, si cjapin sù lis firmis e v.i. Alore chel cualchidun al tache a sintî scloteâ la sô cjadree e a scotâ la flamute.
◆ Lis personis che si oponin a vegnin cjoltis vie e boladis come ignorantis; par sostignî dut chest, nol pues mai mancjâ che a vignedin svintulâts i studis fats dai esperts di turni. Ducj seneôs di meti la firme su la ultime opare, che no je mai stade tant grande.
◆ Purtrop chest al è ce che masse rapresentants de nestre classe dirigjente a rivin a parturî: menâ vie e mancjâ di rispiet a personis che a difindin la lôr cjase. ❚