3. Di Dael a Cormons. La ocasion di scuvierzi miôr cui che o sin cjalant il Friûl cun altris voi

Ai 26 di Març dal 2025. “Cjaminâ nol è dome une ativitât fisiche ma al pues jessi, anzit, al varès di jessi, ancje un percors interiôr”. Chest al sarès, in struc, il risultât de nestre cjacarade fate te tape de volte prime, chê di Aquilee fin a Dael. Cumò, simpri cun Emanuela e Mara, o sin tornâts sul Troi di Aquilee o Cammino Celeste, o sin daûr a fâ la seconde tape di Dael a Cormons, 18 chilometris, e il confront su lis motivazions dal cjaminâ al va indenant tra di noaltris.
◆ Mara e bat che fâ a pît un troi come chest, scjavaçâ spazis e confins, cjatâsi no dome tra di nô ma ancje cun chei che si cjatin vie pe strade, ancje cun int diferente, nus permet, intant che si smicje al travuart, ven a stâi ae destinazion dal nestri cjaminâ, di disblocâ dutis chês rigjiditâts che o vin dentri tal nestri jessi plui font.
“E je vere – e zonte Emanuela – cuant che tu ti confrontis di persone e no in mût virtuâl, come che o sin daûr a fâ cumò, si usisi a interagjî, la cognossince e devente plui vere, a colin i prejudizis, lis ideis balordis, dut ce che dispès o costruìn dentri di nô, incjocâts de propagande o de ideologjiis.” “Sigûr – o dîs jo – cjatantsi cun chei altris o vin la ocasion di scuvierzi miôr cui che o sin, fintremai rivâ a sclarî la nestre identitât vere!”
◆ Discors masse dificii, masse pençs, al podarès dî cui che al lei. Ma us siguri che, in chel moment di “fûr dal mont”, nus son vignûts sù spontanis, cence masse filosofâ. Ancje parcè che o jerin ai 26 di Març, la Vierte e jere sclopade e o jerin intun puest bielon.
◆ Partîts aes 7 e mieze di Dael, o vin passât Crauì e la biele vile Steffaneo Roncato, un edifici grandonon. Al sarès biel podê visitâlu ma o vin di contentâsi de tabele turistiche che nus dîs che al è stât tirât sù scomençant dal 1640, che al à afrescs dal Chiarottini e che, vie pe Prime Vuere, al è stât ancje ospedâl militâr. O lin in direzion di Viarse, dulà che o rivìn dopo vê passât il puint su la Tor. Il Troi di Aquilee al lasse in bande il paîs di Celso Macor, al passe par fûr, dongje de gleseute ninine de Madone di Lorêt cul so biel afresc dal ‘500 e i stucs dal Pacassi. In chê volte no podevin figurâsi ce che al sarès capitât a Viarse tal Novembar stes: une aluvion tragjiche, la evacuazion di dute la int cui gomons e une vore di dams: un disastri.
◆ Cumò o cjaminìn su la roste dal Judri. Par un biel toc o viodìn a çampe cjamps ben sestâts, a drete la golene, largje un centenâr di metris tra l’arzin e il flum dulà che, cuant che e rive la montane, la aghe e pues slargjâsi. Achì al ven sù un bosc salvadi di rive, fat di poi, vencjârs, saûts, dal dut bandonât, plen di baraçs e arbui sglovâts. Un lûc impenetrabil e ingredeât di fâ pôre, di dulà che si spietisi dome che dibot al salti fûr un cenglâr.
◆ Passât il puint sul Judri, si rive a Migjee. Prime dal paîs e je une biele anconute cuntun piçul puarti. Parsore e je piturade la scrite “Qui transit hac via hicque dicat Ave Maria” (Cui che al passe par cheste strade che al disedi achì une Avemarie). Dopo sodisfat il sugjeriment, si sentin sul murut te ombrene dai ciprès ae jentrade dal cimitieri. E je ore di mirinde. Un pagnut cul socol di cjase, aghe de pompute e colaçs cu lis nolis.
◆ Bonade la fam, o tornìn a inviâsi. A ret de glesie parochiâl un colonel di ciment cul pessut celest nus dîs che o vin di tacâ a montâ rive insù su pe mont di Migjee. E je la prime cleve dal troi che o vin di frontâ. No je lungje ma la stradute e à une rive che e monte sù avonde erte. Le cjapìn sot gjambe a pas svelt e, dopo un pôc, o resti indaûr, sfladassant. O ai di alenâmi… Biadelore si rive tal troi che al reste simpri ae stesse cuote, passant sot de gleseute di Sant Antoni e dilunc une trincee viere, de prime vuere. Il panorame al è bielon! O sin te cueste de mont viers misdì, in batude di soreli. La mont e je dute di cret calcari, cun pocje tiere rosse, cuntune vegjetazion che e podedi resisti al sut: zenevre, baraçs, cuargnolârs, sparcs salvadis. E je ancje une vore di sclopit ma i improibìs subit a Emanuela di tacâ a cjapâlu sù, se di no no rivìn plui.
◆ La trincee e lis postazion des metraiis nus fevelin di chê vuere orende che e à fiscât il Friûl, massime cheste bande di soreli jevât. “Cheste tiere rosse – o tachi a contâ ae femine e ae fie – mi fâs vignì iniment che di piçul, cuant che mi puartavin tal Cjars, mi incjantavin cun chês frasis retorichis sculpidis te piere come “Campo della morte e della gloria” e, par convincimi, mi disevin che la tiere e jere rosse parcè che e jere imbombide dal sanc dai nestris soldâts.” “E tu i crodevistu?” “Mi fasevin colâ te vuate nazionaliste e mi vignivin fin i sgrisui par chei che a jerin muarts par diliberâ i fradis talians che a saressin stât sclâfs dai triscj austriacs. Ma o soi cressût e o ai capît che a jerin pardabon pôcs chei che a volevin jessi diliberâts, che chel maçalizi al jere stât volût di sorestants carognis par altris motîfs, e che la esaltazion dal eroisim e de “glorie” di chei puars copâts, cence mai mancjâ di rispiet ai muarts, a coventin dome par justificâ la vuere e dut ce che la vuere, che no je mai mai juste, e puarte”. Li di pôc, la visite ae Ara Pacis Mundi, il grandiôs monument ae pâs tirât sù sul colm de mont, cu la scrite: “la asse e puarte ae muart, l’amôr al da la vite” e conferme il gno pinsîr.
◆ De Ara Pacis o lin jù de mont par un troi tal bosc bande soreli jevât, plui frescje e umide. Il troi al è ripit, la tiere e je umide, si va jù svelts ma ancje si sbrisse che al è un plasê. Finît il bosc, o rivìn ae glesie semplice di Sante Foscje dal ‘400 che e je juste parsore dal biel paisut di Borgnan.
◆ Di Sante Foscje si vualme il nestri travuart: Cormons, cu la sacume inconfondibile de mont Quarine. Su la spice al è il cjistiel antigon, a mieze mont la muse blancje de glesie de Madone, plui sot la cupule verde dal tor dal domo. Al somee dongje, a voli, ma ‘nd è ancjemò di strade! O passìn dongje dal cjamp di tîr cul arc, par boschetis di vuisignârs e par une stradute lungje di glerie jenfri un mâr di vignâi che no finìs plui. Dopo dai ciprès e i pins di Angoris, o rivìn a Cormons. A misdì o sin sot dal monument dal imperadôr Massimilian I, fat sù di chei di Cormons tal 1903 par memoreâ i 500 agns de Contee di Gurize cui Asburcs. Cuant che a son rivâts i talians la statue e à vût un grum di aventuris. Prime un sac neri tal cjâf e la bandiere taliane in man, dopo sdrumade in tiere e fate la foto cul gjenerâl Cadorna e i gnûfs paron, ae fin le àn puartade a Gurize. Par no straçâ la statue, i gnûfs parons le àn ancje tornade a batiâ cul non di une glorie italiche, Cristofolo Colombo cul vistît de stesse epoche ma di mode todescje. Ae fin a pensavin ancje di disfâle par recuperâ il bronç. Bodifate che chei di Cormons, brâfs, a àn tant batût fin a tornâ a vêle e, tal 1981 a metile tal so puest in place, denant de glesie di Sante Catarine, santuari di S. Maria Rosa Mistica.
Une ultime salide fin al grant domo di Sant Adalbert, une cjalade ae statue di Sant Jacum e dopo a gustâ Alla Pergola.
◆ La tape e je stade biele, cun paisaçs diferents, e fate cence masse fature. Intant che o contentìn la bocje, i discors di Emanuela e Mara a son che il Troi di Aquilee al è pardabon une biele esperience, che al tocje la nature, il paisaç, la storie, la art, lis relazions, il benstâ dal fisic e dal cjâf, e la fede.
La prossime di Cormons a Madone di Mont. ❚
[Il mês che al ven la tape
di Cormons a Madone di Mont]