Screade la gnove cjase dal Tsf, li che
si podaran fâ provis e spetacui. Bepi Agostinis: «Un grant merit i va a Pieri Fontanin»
Ai prins di Zenâr si è screade la gnove sede uficiâl dal Teatri Stabil Furlan (TSF) li dal Ente Fiera in vie della Vecchia Filatura 10 a Torean di Martignà. Ricognossût de Regjon Friûl-Vignesie Julie, il TSF al met adun realtâts culturâls impuartantis de regjon, cul obietîf di produsi e difondi spetacui teatrâi professionâi in lenghe furlane.
Pal president Lorenzo Zanon, «al è un sium deventât realtât che al esprim l’impegn di tancj furlans inte valorizazion de lenghe e de culture midiant dal teatri.»
◆ Ae inaugurazion a jerin rapresentants regjonâi e istituzionâls, tra chei l’assessôr Pierpaolo Roberti e il president dal Consei regjonâl Mauro Bordin. Fin cumò il TSF al jere ospitât de Fondazion Teatro Nuovo Giovanni da Udine, che i è stât dât un ringraciament sintût. Il president di Udine Esposizioni spa Antonio Di Piazza al à pandût la braùre di ospitâ il spazi, che al valorize ambients fin cumò doprâts pôc.
◆ La gnove sede e ospitarà une sale provis e un spazi par spetacui di dimensions piçulis e leturis senichis. Il spazi al è di podê rivâ cun facilitât e dotât di un grant parc pes machinis. Pal diretôr artistic Massim Somaglino «l’obietîf al è creâ un lûc vîf di progjets e ativitâts artistichis, pont di riferiment pe culture furlane». Chi si fasarà cuasi dal dut la cuinte stagjon dal Teatri, intitulade Savôrs, cun vot apontaments di fin Zenâr a Jugn.
◆ Un sium che al partìs di lontan: e jere une idee di Nico Pepe (atôr furlan famôs in dute Italie che al invià a Udin une prime Civiche Scuele di recitazion pal teatri furlan). Po dopo fondamentâi a son stâts l’ex sindic di Udin Pieri Fontanin che intal 2019 cul Comun al à inviât il percors e Bepi Agostinis, che o vin sintût.
«Mi vevin invidât ae scree, ma no pues plui movimi tant, par problemis di salût.»
_
Ce pas isal chest pal Teatri Stabil?
Un pas impuartant parcè che vê un puest fis dulà fâ provis e ancje spetacui piçui al è impuartanton pal lavôr. Fin cumò a jerin ospits doprant lis struturis dal Giovanni da Udine, ma no si pues fâ un lavôr seri cence une struture tô.
_
Oltri dal to lavôr di cui isal il merit par jessi rivâts a chest obietîf?
Dal sigûr un al è Nico Pepe: o jeri deventât so assistent e mi à trasmetût cheste idee. Ma il merit plui grant pe realizazion pratiche jal doi a Pieri Fontanin. L’unic politic in 30 agns che al à capît la impuartance di vê un teatri stabil. Ducj a prometevin, ma nissun si è mot pardabon, a part lui. A un ciert pont al à cjapat in man la robe e le à fate lâ indevant. ❚
