ATUALITÂT. Un gnûf Pat jenfri la Universitât dal Friûl e il so teritori

“Stant cussì lis robis, cui tais che si proviodin, timp no ‘nd è: tal 2010 il nestri ateneu al larà a Patràs. La Universitât dal Friûl e je la cuarte in Italie a jessi mancul finanziade in rapuart aes sôs cualitâts, se no si cambiin i parametris di valutazion no varìn masse strade devant di nô”. Chest il fuart apel che la retore Cristiana Compagno e à volût fâ in ocasion de firme dal Pat jenfri la Universitât e lis rapresentancis dai teritoris di riferiment; la cerimonie uficiâl si è davuelte ai 27 di Otubar a Udin li di palaç Belgrât, sede de Provincie.
LIS FIRMIS_A meti la lôr firme sul document che al ven trente agns dopo de nassite de Universitât dal Friûl il paron di cjase, il president de Provincie Pietro Fontanini, il sindic di Udin (e ex retôr) Furio Honsell che al à fevelât par cont di ducj i sindics furlans, l’arcivescul Pietro Brollo (in rapresentance ancje des diocesis di Gurize e di Concuardie-Pordenon), i presidents de Confindustrie Adriano Luci e de Cjamare di cumierç Giovanni Da Pozzo (che al à pandût ancje la poie des Cjamaris di Gurize e di Pordenon), Ferdinando Cerchia pai sindacâts. A firmâ il Pat ancje plusoris associazions culturâls e un dai paris dal nestri ateneu, Zuanfranc D’Aronco.
IL LAPSUS DE ROSOLEN_In mancjance dal president de Regjon Tondo e jere presinte ae cunvigne la assessore ae Universitât Alessia Rosolen, che e à tacât il so intervent cuntun lapsus disint di “preseâ une vore il Pat a pro de Universitât di Triest” (ma si è corezude daurman…). La Rosolen e à po sigurât che cuant che je e fevelà di fondazions no veve chê di privatizâ i ateneus e che in ogni câs jê no vûl stiçâ la competizion jenfri Udin e Triest ma metiju adun par fâ masse critiche. “O sin la prime regjon taliane a discuti in maniere integrâl il sisteme universitari locâl: stant che o fasìn part de stesse regjon us invidi a fâ un sfuarç unitari cul ateneu julian e a no viodilu dome cun seticisim”. Lis sôs peraulis no àn però convinçût dal dut la retore Compagno, che e à definît “inevitabile” la competizion cun Triest, ancje se e à pandût la volontât di evitâ doplons dai cors di lauree.
NO DOME UDIN_Un  Pat masse “Udincentric”? Stant al coordenadôr dai promotôrs Sandro Fabbro lis robis no son cussì. “Ancje se no son stâts presints culì a palaç Belgrât, i sorestants dal Comun e de Provincie di Pordenon nus àn sigurât la lôr poie. E po – al à zontât il professôr Fabbro – chi al è vignût il president de Provincie di Gurize in persone”. Dut câs Enrico Gherghetta (cuntun piçul tricolôr vert, blanc e ros te sachete de gjachete!) al à sì poiât la iniziative ma cence firmâ il Pat, lamentant la mancjance di passaçs che a fevelassin de vocazion europeane de sô Provincie.
Uniche pecje de cunvigne l’ûs mancjât de lenghe furlane. Dome Honsell al à citât une frase dite di Pre Checo Placerean dopo dal taramot dal ’76: “Il Friûl al à di saltâ fûr dal taramot cul cjâf, ven a stâi cu la universitât”. E cumò pal Friûl intîr e je la ore di difindi il so ateneu.
Alessio Potocco