No ducj i furlans lu san avonde ben
e no par colpe lôr
Come tancj di lôr, mi plâs zirâ pal Friûl. E, par gust, si va tai miôr puescj, là che a son robis di viodi, di scoltâ, di fâ, no covente nancje nomenâju. A mi, però, pai câs de vite – par vore a dîle dute – mi è capitât di zirâlu a lunc e a larc: di Fusinis a Fratine, di Sauris a Monfalcon, di Lignan a Paulâr, di Sacîl a Cividât, e vie indenant. Pal lavôr che o ai vût fat, o fevelavi, spes e vulintîr, cu la int di chestis borgadis. Ce gust, par me, fevelâ cun “fradis e cusins”, ognidun di lôr cu la sô fevele, simpri un tic divierse. E pûr simpri si capivin, parcè che i furlans, pûr diferents, si capissin ducj. Biel insome.
◆ Dome une robe mi displâs di dovê contâ su dut ce che o ai cjapât sù ator pal Friûl: o ai vût dispès la impression che i furlans di ca da la Aghe no savessin nuie di ce che al è di là. E o savês che il “di ca e di là” al vâl tant se si cjale di une bande che di chê altre. In sumis, si cognossìn, ma no avonde ben par tancj di lôr. A son tantis lis robutis, e lis robonis, no justis che si disin e che si crodin veris e che veris no son in cont di un, o di chel altri, tocut de regjon. E nol è dome parcè che un nol vedi vût maniere di cognossi la realtât. Al displâs dîlu, ma al è ancje e soredut parcè che “cualchidun”, par desenis di agns, al à fat di dut, doprant ogni mieç e soredut la informazion, par fânus crodi che… robis diferentis de realtât, cuintri i interès dal Friûl e dai furlans, di ca o di là te stesse misure.
◆ Al è cussì che di cierts mieç di informazion al è sparît il Friûl di soreli a mont (e no dome). Tal so puest, di agns incà, ve “il Pordenonese” o “la Destra Tagliamento”. E dai vuê, e dai doman, la gote e sbuse il clap! E pazience i vêrs pordenonês, pazience i furlans venetofons, pazience i meneghei di ogni divignince ma, in cheste maniere, si voleve fâ dismenteâ parfin ai furlanofons di soreli a mont di jessi… furlans. E “sono inmò furlans te Diestre Tiliment?” si domandaran cetancj di lôr che a son colâts te vuaite. A ‘nd è, e a ‘nd è tancj. O sin inmò maiorance, ancje se leìnt i gjornâi di chenti o scoltant la RAI, al somearès di no. Achì, un tocut par volte, o puartarìn lis provis che il Friûl di soreli a mont al è inmò furlan. O mostrarìn cualchi malefate di chei che nus volevin scancelâ e lis bataiis di chei, che invezit, a àn tignût dûr a pro de furlanetât, ancje paiant salât il lôr stâ… salts. ❚
