LA FABRICHE DAI… LIBRIS. La saghe de tradizion orâl

Glesie furlane, inte golaine, Cjargnei cence dius, e da dongje chestis vincjeune leiendis, che a jerin saltadis fûr su la Patrie dal Friûl intai agns ’80 dal secul stât.
I merts di chest librut di scjarsis cent pagjinis a son plusôrs.
Prime di dut chel di vê metudis adun un biel mac di leiendis de tradizion furlane plui ferbinte e ancje plui antighe. E di vêlu fat cuntune lenghe vivarose e dispès sclopetante. Cualchi esempli: «puare tant che il pedoli», «meti alc sot des gramulis», «pierdi gustâ e mirinde». Chest aspiet al è une vore impuartant, par une lenghe che e à di sfrancjâsi, di mostrâ di sedi in stât di inricjî di une sorte di valôr zontât i contignûts che e tramande. E Cargnello le parone ben, la lenghe, ben une vore, e al sa tirâ fûr di jê colôr e espressivitât.
Impuartante e je ancje la presentazion di Roberto Dapit, professor di lenghe e leterature slovene inte universitât furlane. Dapit al aprofondìs il sens des contis, lu met in relazion cun contis parelis di altris tradizions culturâls ator pe Europe (evident l’intersgambi cu la aree slovene e cravuate di une bande e carintiane di chê altre) e al cîr la origjin di personaçs e contis in moments de storie dai popui che ju àn fats nassi.
Si pues, cussì, cjatâ une origjin mitologjiche ancje a la famose frase che e piture il Frûl tant che struc dal univiers. O ben capî la origjin di ciertis etimologiis popolârs (no varès mai pensât che Dimponç al ves alc a ce fâ cun Pilât, sì propi chel che si à lavât lis mans…).
E po o cjatìn mîts che ducj a cognossin e che a àn nudride la inmaginazion popolar secui dilunc e che ancjemò a son vîfs. Naturalmentri la frecuence di riferiments a Atile e a Aquilee e je li par mostrâ cetant impuartants pe storie furlane che a son stâts sevi il re Un, sevi la citât mari prime romane e po cristiane.
E po, al di là dai rimants a altris tradizions, a son i temis stes des leiendis che a metin in moviment pinsîrs e considerazions interessantis. Par un esempli a p. 27 (La Madone di mont) l’autor al conte di ce maniere che la buine novele dal Cristianesin e veve puartade tante bontât intes tieris di Cividât che i siorats a jerin parfin bogns di lassâ libars i sclâfs…O ben ancjemò la impuartance dal Concei di Trent, tant che moment di roture inte storie. Di ultin a son di segnalâ i dissens di Gianni Di Lena, che a insiorin ancjemò di plui il libri. Dissens tipics di un stîl che al misclice elements e ancje materiâi difarents. Cussì intal dissen di p. 16, la cubie dai zovins e je piturade cuntune precision scuasi fotografiche, mentri che il rest dal dissen si risolf in sugjestions plui che no in descrizions.
Laurin Zuan Nardin