Sfuei Mensîl Furlan Indipendent
Archivi de Patrie

LA FABRICHE DAI… LIBRIS. Di Dino Virgili il prin vêr romanç

............

«S’o vignîs une dì su par ca, ‘o lin a sentâsi dongjelatris sul rivâl grant dal Luri, in cueste di soreli, a sintî cemût ch’e cjante l’aghe vive de mê tiare furlane. No ‘nd’è aghe al mont ch’e cjanti cussì ben!
Stàit in scolte: il Luri, chenti, al cjante di frut ljendis vieris di agnorums; e i pôi, cui pîs croz ta l’aghe, a’ sintin dut e po’ a’cjantin ancje lôr, cun chês fueutis in forme di cûr te bavesele che si dismôf sù par là…»
Al è l’incipit dal prin vêr romanç in lenghe furlane, L’aghe dapît la cleve, scrit di Dino Virgili intal 1949 e editât, par cure de riviste La Panarie, cul avôt de Filologjiche furlane, in forme complete intal 1957, daspò che al jere jessût a puntadis su «La patrie dal Friûl», a scomençâ dal 1951 in devant.
Un libri di ben 320 paginis, dividudis in trê parts: La strade dai siums, Il distin al va dilunc e I pôi tal cîl e te tiare. Al è organizât tant che une narazion sul gjenar di chês dai cjantestoriis di une volte, romanç corâl, intal sens che al cjape part dut un paîs cu lis sôs miseriis e gjondis, viodût intal passaç dai grancj gambiaments storics che dut il Friûl al à scugnût lâ incuintri.
Impussibil che no sedin ancje des pagjinis malvualivis intune opare cussì impegnative; ma a son ancje moments di grande intensitât e di poesie (da rest l’autor al jere ancje poete), contâts cuntun vocabolari une vore svareât e vivarôs.
Grande la figure dal vieli Cuesim, che si pues viodile tant che une personificazion dal vieri Friûl, cui siei valôrs che no si à mai di tocjâju, i valôrs de famee, de tiere, dal paîs, de tradizion, de cjase.
E grant ancje il fi, Guri, che al vûl cirî di une altre bande la sô strade, ma che al manten dut il so rispiet pal pari.
Un episodi che al somee rapresentâ cheste crisi di passaç di une civiltât a une altre al è chel di Agnulin, un frut smacaiât dal tren, scuasi un simbul di un element gnûf che al ven a savoltâ il lâ pacific de vite di paîs
Josef Marchet, che al preseave il libri ancje par vie che al jere un tentatîf di dâur une unitât a lis variantis dal furlan, midiant di une koinè gnove, al à vût scrit:
«E je la prime volte che la nestre lenghe e ven doprade intun lavôr cussì impegnatîf… Si trate di une robe che e segne un grant scjalin te nestre storie leterarie e che e pues lâ a pâr cun cualsisedi narative moderne».
Laurin Zuan Nardin

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +