La assemblee de comunitât linguistiche furlane e rive a cuote 150 comuns

La ACLiF (Assemblee de Comunitât Linguistiche Furlane) e rive al numar di 150 Comuns aderents: e je stade fate di fat la cerimonie di consegne de fasse tricolôr cul simbul da la Assemblee a Fabio Pettenà, sindic di Sante Marie La Lungje. Je à consegnâle il sindic di Caprive Daniele Sergon, president de ACLiF, che al à tirât dongje in palaç Mauroner a Tissan il diretîf de Assemblee par presentâ il program dal 2025. Presints ancje aministradôrs di altris Comuns de zone, bielzà socis de ACLiF, tant che la vicesindiche di Pavie Elena Fabbro e l’assessôr di Manzan Lorenzo Alessio, dongje di une rapresentance dal Consei comunâl e des associazions locâls.
◆ “Si respirave un aiar pardabon positîf – al à dit Sergon –e o vin podût tocjâ cun man l’entusiasim dai amîs di Sante Marie La Lungje di deventâ part de nestre Assemblee di Comunitât. Graciis al sindic Pettenà pal acet calorôs. Pardabon preseade ancje la presince di chei altris aministradôrs dai Comuns dongje, a testemoneâ che il nestri al è simpri un lavôr di scuadre che al met adun realtâts dongje e lontanis”.
◆ Come che si sa, la ACLiF e met dongje Comuns di lenghe furlane indulà che storichementri si fevele la lenghe furlane intes regjons Friûl-Vignesie Julie e Venit (mandament di Puart). Chest an 2025, par altri, e finìs 10 agns de sô istituzion.
“La riunion dal diretîf – al à zontât il president Sergon – e je stade tant che une “pidade di vie” pes diviersis ativitâts che o vin in program chest an: dal impegn par vê plui lenghe furlane in Rai ae continuazion dal percors di valorizazion dal lavôr dai Conseis Comunâi dai Fruts, fin aes iniziativis di poie al program di GO!2025 Nova Gorica e Gurize capitâl europeane de culture. Liniis programatichis che concretizarìn tirant dentri ducj i nestris 150 Comuns aderents”. ❚