Bant restaur, par salvâ la identitât plui sclete des piçulis comunitâts

Il gnûf Bant Restaur mandât fûr de Fondazion Friûl al è indreçât a sostignî il recupar e la valorizazion dal patrimoni culturâl locâl che al rapresente la identitât plui sclete des piçulis comunitâts. Lis novitâts de edizion 2025, che e je la otave cul jutori diret di Intesa Sanpaolo, a son stadis presentadis dal president Giuseppe Morandini intal Palaç Antonini-Stringher a Udin: e intal incuintri a jerin presints la sorintendente Valentina Minosi e il vicepresident de Regjon e assessôr ae Culture Mario Anzil.
◆ Morandini al à ricuardât che “chest bant al vûl dâ continuitât a une ativitât che la Fondazion Friûl e puarte indevant za de sô nassite tal 1992, e che in ducj chescj agns e à compagnât la realizazion di passe 1.100 intervents. Dal 2018 incà o vin vude la pussibilitât di gjoldi, in gracie di Intesa Sanpaolo, di 3 milions di euros par vuardiâ il nestri patrimoni storic, artistic e culturâl e i contribûts a àn metût in vore un moltiplicadôr di 8 voltis: di fat si calcole che i progjets interessâts a vedin mot 22,4 milions di euros pe colaborazion virtuose che si è metude in vore jenfri Fondazion, ents publics e teritori. Dut tal non de identitât”.
◆ Une declinazion origjinâl dal bant, che si è afermade cul timp, e je chê dal recupar di spazis e edificis bandonâts o no doprâts che a vegnin destinâts a centris di agregazion sociâl e comunitarie. Par esempli Oplon, une associazion di zovins creade a Tramonç Disot, e à recuperade une cjase coloniche tal mieç di un bosc di 4 etars sù pe cueste de mont Rope Bufon. Stant che il puest al è dome a 20 minûts a pît des pocis smeraldinis, che a stan deventant un sît turistic preseât, il progjet al à fat nassi une base pai turiscj, cuntune forestarie, e al pues sburtâ ancje in minime part la economie di cheste valade.
◆ La dotazion dal bant e je di 500 mil euros a pro di iniziativis di restaur e valorizazion di bens mobii e imobii di rilêf e pal recupar di struturis tes provinciis di Pordenon e Udin. Istituzions, ents publics, ents religjôs, parochiis, fondazions e associazions a puedin jessi i beneficiaris par meti in vore lavôrs che a varan di tacâ dentri di un an e sierâsi intune dade di timp no plui lungje di 18 mês. ❚