Al è timp fin ai 11 di Lui par presentâ la candidature pe amission al cors di dotorât di ricercje in Linguistiche promovût de Universitât Libare di Bolzan adun cu la Universitât dai studis di Verone e in colaborazion cu la ARLeF-Agjenzie regjonâl pe lenghe furlane. Tra lis siet borsis a disposizion, une e je dedicade al progjet su la analisi comparative des politichis di tutele dal rumanç, dal ladin e dal furlan.
La borse di studi e vignarà assegnade al progjet miôr inte aree tematiche de sociolinguistiche: l’argoment centrâl al varà di tratâ de tutele juridiche e des politichis linguistichis publichis leadis aes lenghis di minorance furlane, ladine dolomitiche e rumance dai Grisons. Il progjet al varà di previodi la analisi detaiade des normis e dai documents di planificazion che a son in vore in dì di vuê, cun chê di furnî un studi comparatîf di chestis trê realtâts.
La selezion e previôt un colocui là che si discutarà il progjet di ricercje presentât e là che si valutaran lis competencis linguistichis dal candidât, che, in plui dal talian, al scugnarà vê une competence buine dal inglês (lenghe principâl di insegnament) e dal todesc. Jessi parons dal furlan, dal ladin e dal rumanç al sarà un titul preferenziâl.
La frecuence dal cors di dotorât e je articolade in trê anualitâts e e cjaparà dentri une ativitât di ricercje specifiche di doi mês che si davuelzarà li de Agjenzie regjonâl pe lenghe furlane.
Il cors di dotorât al formarà professioniscj di nivel sientific alt e i dotorants a podaran zovâsi di metodologjiis, imprescj e risultâts disvilupâts dilunc di progjets di ricercje une vore impuartants (PRIN, DFG, SNF, PNRR). Cun di plui, al è stât firmât un acuardi bilaterâl cu la Universitât di Marburc (Gjermanie) che al previôt l’otigniment di un dopli titul di dotorât par cui che al vignarà selezionât par chest ‘International Doctoral Track’.
Dutis lis laureis specialistichis o magjistrâls a son ametudis e a puedin presentâ la domande di partecipazion al concors pe amission al dotorât. Si à di vê otignût 300 CFU (lauree magjistrâl). Dutis lis informazions a son a disposizion online su www.unibz.it
