ATUALITÂT. Sandra Pupatello, Ministre pal Disvilup economic e pal cumierç, Provincie dal Ontario

Sandra Pupatello e je stade elete tal parlament dal Ontario tal 1995 e rielete tal 1999, 2003 e 2007. Dal 2006 e je Ministre pal Disvilup economic e pal cumierç. In precedence e jere stade titolâr dal Ministeri de Istruzion e dal Ministeri pai Servizis sociâi e comunitaris, e ancje Ministre responsabile pes cuistions feminîls.
Sot de sô vuide, il setôr de istruzion al à cognossût un miorament des infrastruturis scolastichis cun ristruturazions impuartantis in dute la provincie; cun di plui, cu la introduzion dai gnûfs diplomis di alte specializazion, i students des scuelis superiôrs a àn vût la pussibilitât di adatâ il lôr percors scolastic daûr des lôr dibisugnis. Tant che Ministre pal Disvilup economic e pal cumierç, Sandra Pupatello e à savût consolidâ il sucès des politichis governativis, atirant puescj di lavôr di competence elevade, clamant dongje gnûfs investiments e svilupant gnovis oportunitâts pai lavoradôrs dal Ontario.
Sandra Pupatello si è ativade cun energjie a pro de sô comunitât e de provincie, contribuint in maniere significative a miorâ lis cundizions di vite dai setôrs plui debui de societât. Leade une vore a strent ae sô comunitât di origjin, Sandra Pupatello e je membri onorari dal Rotary Club de citât di Windsor e de Paul Harris Fellowship; tal 1996 e je stade nomenade Italian of the Year pe contee di Essex-Windsor. Tal 2001 la Universitât di Windsor i à conferît il Charlie Clark Award par merits straordenaris di servizi; tal Març dal 2003 e je stade elete Windsor Woman of the Year. Tal 2007 Sandra Pupatello e à ricevût l’Athena Award pe zone di Windsor, un ricognossiment prestigjôs assegnât a oms e feminis che a rapresentin un model positîf che al puedi judâ lis feminis a svilupâ lis lôr potenzialitâts di cariere tal mont dal business.
Stefania Garlatti-Costa