SPECIÂL. L’istitût ladin furlan al fâs 20 agns

L’Istitût Ladin Furlan “Pre Checo Placerean” al fâs vincj agns. La associazion, di fat, e je stade metude in pîts a Codroip tal 1988 par puartâ indevant cuntun spirt gnûf la lenghe e la culture furlanis.
UN NON, UNE STORIE_ “L’Istitût – al spieghe il so president, William Cisilino – za cul so non al pant a clâr lis finalitâts origjinariis de associazion: di une bande realizâ une ativitât di tutele dal furlan in linie cun ce che si jere daûr a fâ ae fin dai agns Otante tes Vals ladinis des provinciis di Trent e di Bolzan; di chê altre contribuî a puartâ indevant e a fâ cognossi i ideâi di pre Checo Placerean”.
“In chei agns – al dîs Cisilino – fevelâ di dirits linguistics e ricognossiment uficiâl dal furlan al jere considerât scuasite une blesteme. L’Istitût al à lavorât propit par fâ capî che chescj concets, tant scombatûts te nestre regjon, no dome a jerin la normalitât in altris contescj di minorance, ma a vevin judât in concret il svilup dal teritori”.
Dal 2000, la associazion e à sede li di Cjase Turoldo di Coder di Sedean. Dal 2001 e je stade ricognossude de Regjon tant che organisim culturâl di interès regjonâl e dal 2006 tant che ent di primarie impuartance pe promozion de marilenghe.
PRE CHECO E L’AUTONOMISIM_ Pre Checo al è stât une des figuris plui impuartantis dal autonomisim furlan. Al fo un dai fondadôrs di Int Furlane e dal Moviment Friûl, ispiradôr de Mozion dal clericât pal svilup sociâl dal Friûl e tradutôr, adun cun Beline, de Bibie in marilenghe. Se Glesie furlane e à puartât indevant lis sôs bataiis in cjamp gleseastic, l’Istitût al à volût svilupâ la part culturâl des rivendicazions di Pre Checo. A lui al è stât dedicât di resint ancje un numar de “Golaine di studis sul autonomisim” dulà che a son stadis aprofondidis lis personalitâts principâls dal autonomism furlan, tant che pre Josef Marchet, Pier Paolo Pasolini, Tiziano Tessitori. In curt, al sarà presentât l’ultin numar su Faustino Barbina.
LIS ATIVITÂTS LESSICOGRAFICHIS E LA SCUELE_ L’Istitût al è stât un dai prins ents a davuelzi ativitâts di ricercje tal cjamp dal lessic setoriâl in lenghe furlane publicant – massime in graciis dal grant lavôr fat di Agnul Di Spere (ma no dome) – diviers dizionaris e studis sul argoment.
Fin dai prins agns ’90, la associazion e à metût adun cors di lenghe furlane pes scuelis e cors di alfabetizazion par adults, dongje di cors di formazion su lis tematichis peadis ae promozion dal furlan e des lenghis minoritariis. La associazion e à fat ancje publicazions di caratar didatic.
I CONGRÈS INTERLADINS, LA FIESTE DE PATRIE, PUINTS_Fin de sô nassite, l’Istitût al à lavorât par rinfuarçî i leams cun chei altris popui ladins ancje organizant plusôrs congrès interladins, come chel di Codroip tal ’90, di Lignan tal ’95 e di Vile Manin (Passarian) tal 2001. Ta chest ultin congrès, pe prime volte, a àn partecipât dutis lis istituzions politichis e culturâls de aree ladine.
Di cetancj agns in ca, l’Istitût al met adun, cun altris sogjets publics e privâts e cul patrocini des Provinciis furlanis, de Regjon e des Diocesis dal Friûl, la “Fieste de Patrie dal Friûl”, par celebrâ la nassite dal Stât patriarcjâl furlan. Il clou des manifestazions si lu fâs ogni an, a rotazion, intun comun des trê provinciis furlanis.
Di siet agns in ca, infin, l’Istitût al organize la rassegne “Puints”, par promovi cun incuintris, dibatiments e spetacui la lenghe, la identitât e la autonomie furlane, cuntune voglade che vulintîr e va di là dai confins regjonâi.
INT E LENGHE.NET_ La associazion si è dedicade cun particolâr impegn ancje ae promozion de lenghe furlane intai  media, prin cul mensîl di informazion e culture “INT” e, tacant dal 2004, cul sît internet bilengâl furlan-talian www.lenghe.net.
In pôc timp Lenghe.net – direzût de gjornaliste Anna Bogaro – si è afermât come un dai sîts in marilenghe plui clicâts, in graciis di un inzornament continuatîf des gnovis sul Friûl e su la lenghe furlane, e de presince di rubrichis di aprofondiment su diviers aspiets de nestre culture.
Redazion
________________________________________________
Agnul di Spere
Agnul di Spere (Angelo Pittana) al è stât, tai ultins agns, un dai plui ferbints sostegnidôrs de interladinitât. Nassût a Sedean intal 1930, par tancj agns al veve vivût in Svuizare, dulà che al jere jentrât in contat cu la comunitât linguistiche romance. Tal 1989 al à scrivût il cjapitul “Appunti sull’identità friulana” dal libri “I Retoromanci oggi. Grigioni, Dolomiti, Friuli” publicât in Svuizare par cure di W. Catrina. So il mert dal inseriment de lenghe furlane jenfri lis lenghis uficiâls censidis te Confederazion elvetiche. Sô ancje la idee di meti dentri te L.R. 15/96 un passaç precîs su la promozion de interladinitât.
Component une vore atîf dal Istitût Ladin Furlan “Pre Checo Placerean”, Agnul al è stât ancje fondadôr e president de Union dai Scritôrs Furlans. Dai prins agns Novante al jere tornât in Friûl dulà che al è muart intal 2005.