Di Atile ai bunker, un cuel plen di misteris

Ve chi cualchi note interessante gjavade fûr dal articul publicât inte riviste “Scientific Reports” dai 31 di Mai.
◆ La prime version scrite de liende dal çuc di Udin fat sù dai soldâts di Atile e je dal secul XII e e je stade documentade intes cronichis di Gotifrêt di Viterbo e dal vescul Otto von Freising.
Il çuc di Udin nol è l’unic a peâ la sô origjin al non di Atile. Dongje Ligugnane al esisteve un altri mound, alt 5 metris e cuntun diametri di 20, che la int e clamave “Bastion di Atile”, ma al è stât nivelât dopo de prime vuere mondiâl. Un “Cuel di Atile” si lu cjate ancje ae fin de val de Plâf, dongje Farra di Soligo, li che te plane si jevin dôs culinis, intune posizion che no va daûr dal contest gjeologjic. Stant ae tradizion popolâr, a son stadis fatis sù dai Uns pal lôr re.
◆ I studiôs a àn scomençât a discuti de origjin dal çuc di Udin za tacant dal secul XVI. Intal 1900, Achille Tellini al è stât il prin a frontâ la cuistion daûr di une vision gjeologjiche moderne (al è stât ancje il prin a dissegnâ la plantute dal cjastelîr di Udin, che par lui al jere il plui grant in Friûl). Ta chei agns, dut câs, si crodeve che il cûr de culine al fos di cret, e che la formazion e fos il risultât di un procès tetonic o ben ce che al vanzave di dipuesits morenics.
Vie pe seconde vuere mondiâl, intal 1943, a son stâts sgjavâts 4 tunels cuintri dai avions (bande Zardin Grant, par un sgjâf fin a trente metris in orizontâl). I lavôrs a son lâts indevant par pocjis setemanis, stant che i edificis parsore de culine a tacavin a patî par vie dal sbassâsi de tiere). Al esist un altri bunker, fat simpri intal 1943, ma de bande di soreli a mont (Tunel Malignani).
◆ Chel di Udin al è il mound preistoric plui grant che al sedi stât cjatât ator pe Europe. I plui grancj (Bretagne, Polonie , Ucraine e Ongjarie) a rivin a une altece che e va dai 12 ai 19 metris (une vore di mancul rispiet ai 30 di chel furlan). ❚