Un viaç par imagjinis su ôr dal cunfin di Drencje
Par dut il mês di Avost, il Circul Fotografic Furlan al metarà in mostre a Drencje il risultât di une esplorazion di cinc artiscj che a àn documentade la bielece di chest teritori salvadi e dismenteât. Il president dal Circul Dario Buttazzoni nus spieghe il parcè de Mostre “Provinciale45” che e restarà vierte fintremai ai 27 di Avost inte vecje scuele elementâr dal plui piçul dai Comuns dal Friûl.
◆ Lis stradis e i lôr nons a vegnin metûts cuasi simpri dongje dai numars, in maniere semplice ma frede; in realtât la lôr nature primarie e à a ce fâ cul viaç e cu lis destinazions. E il viaç al evoche daurman une sdrume infinide di pinsîrs e di emozions interiôrs; al è normâl parcè che la vite di ognidun di noaltris e je segnade dai viaçs e dai percors che a deventin metaforis de vite, e dai siums, des sperancis, des fadiis e dai dolôrs che e puarte cun se. A contin dai aspiets che a dan forme ae umanitât, a contin storiis di amicizie, di libertât, di amôr e di muart.
◆ E cussì, ancje se par pôcs mês – di Otubar dal 2022 al Jugn di chest an – sîs fotografs dal Circul Fotografic Furlan a son stâts impegnâts intun viaç fotografic cul obietîf di documentâ il comprensori teritoriâl dal Comun di Drencje. Chest viaç al è deventât un incuintri cu lis personis e cun culturis e tradizions diviersis e lontanis di chês dal rest de nestre regjon; e al è deventât cussì la scuvierte di une tiere, de sô nature, de sô architeture spontanie e de sô spiritualitât. Il viaç al è stât curt, e par sigûr nol baste par contâ secui di une storie segnade di tragjediis intal passât lontan e in chel plui resint: ma o vin podût ancje tornâ a rivivi la vite di ogni dì, segnade dai ritmis des zornadis e des stagjons, dal lavôr faturôs tai cjamps e intes stalis, des fiestis religjosis e paianis, dal isolament gjeografic di une aree di frontiere e dal dramatic spopolament provocât de vite moderne.
◆ Lis fotografiis di cheste mostre a son testemoneance di chest percors che ducj a puedin fâ dilunc de Strade provinciâl 45, traviersant lis frazions che a componin il Comun di Drencje. A son imagjins che a cirin di rapresentâ, cence retoriche false, chest teritori, la bielece che ti creve de sô nature, i lûcs de Prime vuere che lu àn segnât in maniere dramatiche. E po lis cjasis, lis stalis e i toblâts, purtrop dispès bandonâts e in ruvine: e ancjemò i lûcs di agregazion, i monuments, i lûcs di cult, i capitei votîfs e i crucifìs che a contornin lis stradis.
◆ A son imagjins che a vuelin jessi un piçul e umil tribût e contribût ae storie di chescj lûcs dismenteâts e no valorizâts come che a mertaressin, un invît a visitâju, un sburt a abitants e istituzions par che cheste zone e altris a fasin madressi un cambiament, lant in direzion contrarie de modernitât dispès esasperade che e caraterize i timps che o vivìn. ❚
