Dal Istât al Atom, si fâs fieste cu la musiche
E fâs trente agns la cjase museu La Mozartina di Paulâr, fondade uficialmentri dal compositôr Giovanni Canciani (1936 – 2018) tal 1993. Cumò di Mozartinis a ’nd è dôs, e la seconde – screade tal 2005 – e fâs part dal contest ecomuseâl “I Mistîrs”. Ma nô cumò si concentrìn su la prime, chê che e je in vie Jacopo Linussio, prontade e curade in ogni detai dal Mestri de Cjargne inte cjase “Scala” dai prins dal Sietcent. Si sa che e je une residence che ducj chei che a amin la musiche e lis bielis arts a varessin di visitâ, une tape obleade par cui che al va in Cjargne, inte val di Incjaroi. E à dentri une colezion straordenarie di struments ducj sonants, o ben che si puedin sunâ, che no son sot veri come che al sucêt in tancj museus. In chest sens, ancje pe raritât dai manufats, al è il prin in regjon cun cimelis sunants che a van dal orghin portatîf-positîf Testa, un bombon databil tor dal 1650, al moderni piano a grancode Steinway & Sons, passant par dute une schirie di altris struments a tast: virgjinâi, spinetis, clavicembai, fortepiano. Ma no dome: violins, arpis, struments esotics, liûts, ghitaris, un cimbalon ongjarês, struments a flât, a ’nd è di ogni sorte, dongje di une grande colezion di libris, telis, operis di art figurative, mobii di alt artesanât.
◆ Par tignî vîf e funzionant dut chest grant patrimoni – curât come pes visitis dal erêt e fi adotîf dal amât Canciani, Daniel Prochazka, insiemi cu la associazion dai Amîs de Mozartine cun a cjâf Matteo Macoratti e cu la direzion artistiche dal violinist di fame Guido Rimonda e di me che o scrîf – al è un grant dafâ, cun oparis di restauri su struments une vore delicâts fatis di maestrancis competentis.
◆ In chest sens, La Mozartine e festeze il so trentenâl cuntune schirie di events estîfs indulà che si screaran struments che a son a pene passâts sot des mans di artesans specializâts, cembalârs tal specific: i fradis Michele e Alessandro Leita di Prât di Cjargne e Ulisse Tonon di Codroip, grancj amîs e colaboradôrs dal complant Mestri Canciani che al jere, in plui che un compositôr, ancje lui stes restauradôr. Al veve imparât cheste art di tratâ il len, no dome in famee – lui, fi di marangons – ma ancje intes buteghis e laboratoris de zone di Turin, indulà che al à vivût par plui di 40 agns. Tancj struments de colezion a vegnin propit di li, in plui che di variis parts de Europe.
◆ A son cuatri i concierts dal inovâl, tra Jugn e Lui, prin di screâ la edizion numar 21 dai Concierts di Sant Martin in Cjargne, rassegne storiche che si fâs tai mês di Novembar e di Dicembar a Tumieç, Paulâr, Çurçuvint, Davâr e Verzegnis.
◆ I prins doi concierts estîfs a son a La Mozartina 2 in Borc di Sant Antoni, in rêt cun altris realtâts culturâls; invezit chei altris doi a son a La Mozartina 1. Anìn par ordin. Ai 24 di Jugn aes 18 e je stade la volte dal conciert dal brâf pianist Raffaele D’Angelo in colaborazion cun “Musei Aperti” dal Museu Cjargnel di Tumieç. Ai 9 di Lui aes 20.30, pal Festival Darte, al sarà il conciert dal “Estroverso Consort” cun senis ancje di microteatri, une novitât. Al anticipe il conciert la visite aes 8 sot sere de cjase museu numar 2, indulà che a son conservâts intun stîl tra tart Votcent e Liberty une vore di struments ben colocâts, in plui che une mostre su panei dedicade ai orghins de Cjargne.
◆ Ai 15 e ai 22 di Lui, infin, in ocasion de metude in sun dai struments restaurâts, o ben i fortepiano Wopaterni & Sohn, Kaeferle Sohne e Erard, un trio di cjamare cun Carlo Rizzi aes tastieris, Matteo Macoratti ai violin, Jasna Noacco al violoncel, cu la partecipazion straordenarie dal violinist di nomee internazionâl Guido Rimonda, a sunaran tocs gjavâts dal patrimoni Baroc de musiche di cjamare.
◆ Lis fiestis par La Mozartina a van indenant ancje in gracie des colaborazions cul Ent par Turisim dal Friûl-Vignesie Julie pes “Rotte musicali in Carnia”, che a permetin di cognossi l’artesanât artistic incuintrant lis cjasis liutariis dai Fratelli Rossitti, e lis maestriis di Giovanni Canciani che nus à lassât une grande, impuartante e uniche ereditât artistiche che no ’nd è di compagnis inniò. ❚
