Jessica e la recipe segrete dai cjarsons di Zuviel

“Par agns o vin partecipât ae fieste dai cjarsons di Sudri – e conte la zovine Jessica Lavina – e o vin fat cognossi il nestri cjarson di Zuviel. Par 3 – 4 agns o sin rivâts tra i prins puescj pai cjarsons plui apreçâts de fieste. Dopo si sin stufâts e no vin plui partecipât. Ma la int e je vignude a cirî i nestris cjarsons fin a Zuviel! Jo in chei timps o fasevi dut altri: o vevi viert un centri di estetiche.”
◆ Cussì tal 2019 Jessica Lavina e decît di tornâ a metisi in zûc, sierant il centri estetic e vierzint il laboratori di cjarsons a Zuviel, intun piçul paisut de Cjargne, a 921 metris sul nivel dal mâr, clamât apont “921 Zuviel”. La ativitât e rientre intal progjet regjonâl PPL (Piçulis Produzions Locâls).
◆ “Il prodot principâl che o fâs al è il cjarson di Zuviel; la recipe mi è stade tramandade de none dal gno om e e je segrete: a son ben 15 ingredients dentri, ma no si rivin a identificâ ducj e il cjarson al à un gust finâl che nol è ni dolç ni salât, cun dome une ponte di dolç. Dongje di chest prodot o fâs i rafioi cun formadi frant e coculis, cierf, barancli di mont e scuete, cavoçs, jerbis che di Istât o cjapi sù intai prâts, o cui bromps… la farse e varie daûr de stagjon e de disponibilitât dai ingredients. Une volte fats, i prodots a vegnin metûts intal abatidôr a +3° e dopo a son pronts par vendiju. A cui che al compre, i doi lis indicazions su cemût cuinçâju… dopo ognidun al fâs te sô maniere… mi è stât dit che cualchidun al à cuinçât i cjarsons cul tocj tal puest dal ont e de scuete fumade!”
◆ Jessica, in Primevere e Istât, e je impegnade a lavorâ la tiere dai siei cjamps: “cussì – e conte – o pues doprâ i prodots gjenuins de tiere par fâ la farse dai cjarsons e dai rafioi. O ten a dîle simpri, cheste robe, e o calcoli che al sedi impuartant podê doprâ prodots in pratiche biologjics, parcè che jo no dopri velens. La uniche robe che o ai di comprâ e je la farine! O scuen però ancje ritaiâmi timp pe burocrazie: o ai di fâmi dut di bessole, emeti faturis, fâ paiaments… al è ce stâ daûr.”
◆ 921 Zuviel à clients che a vegnin di Gurize, Udin e, cul passeperaule, di dute la regjon. I clients principâi a son albiercs, ripârs di mont, ristorants, ma ancje privâts.
◆ Il vinars di buinore i cjarsons frescs si puedin cjatâ inte latarie di Sudri (unic pont vendite indulà che si cjatin; se no, si puedin prenotâ e lâ a cjoli dome a Zuviel).
◆ Jessica e je contente de rispueste de int. Tra i progjets pal doman al è chel di vierzi une salute dongje dal laboratori par dâ la pussibilitât a cui che al va a Zuviel di degustâ i prodots.
Par savê alc di plui:
pagjine Facebook: https://www.facebook.com/921zovello
sît: https://www.921zovello.com/ ❚