Sfuei Mensîl Furlan Indipendent
Archivi de Patrie

IL FRIÛL TAL ETERE. Ma ce fasino lis musis de tv furlane tal timp libar? La fieste dai gjornaliscj!

............

Mai si saressin spietâts, i cirche 100 gjornaliscj furlans corûts ae fieste a lôr dedicade, ai 22 di Zenâr stât, di vê la poie uficiâl, adiriture dal president dal lôr Ordin. Ma cuant che a àn viodût Pieri Villotta cjapâ la jentrade, cu la femine sot braç, e sfilâ sul red carpet dal “Ombre Rosse” di Pradaman, su lis notis di “Bad Romance” di Lady Gaga, ducj a àn capît che ancje l’om de Tgr Rai, che al à indreçât il so stîl di lei lis gnovis suntun papillon, al veve dât il so personâl “endorsment”. E, in vie uficiose, ancje chê dal ent public che al rapresente. Ce bulos, i gjornaliscj furlans! Si le cjantin e si le sunin: anzit si le balin. Bessôi: rivâts ducj cun acompagnadôr al seguit (10 euros il biliet di ingrès), po dopo cualchi ore, chescj ultins si son scuasit ducj volatilizâts. E cussì a son stâts i gjornaliscj a jemplâ la piste, scjassant lis lôr chilis, cui cuntun ufici stampe, cui cun cualchi operadôr tv, cui cun cualchi anchor (man o woman).
Duncje, sul imprin cheste benedete piste di bal no voleve jemplâsi e nissun al veve intenzion di rompi la glace. Inalore, Franco Terenzani di TelePordenone al à pensât ben prime di butâsi lui di bessôl in piste e po – daspò 10 minûts che si sbraçave cence seguit – di gafâ il microfon al dj e di improvisâsi (!) animadôr: robe di fâ concorince al princip Maurice, tra un “Pompa la musica, pompa l’energia!” e un “Da qui dentro non si scappa, questa è musica che spacca”. Ae fin al è rivât adore tal so fin. E il mix di house e dance al à contagjât ducj i presints. La piste e je deventade teritori de nudride sdrume di Telefriuli, cjapitanade di Daniele Paroni, cun al seguit Filippo “Voice” Fois, Alessia Pilotto e soredut Massimo Radina e Francesca Spangaro, chescj doi vignûts jù de Cjargne cul vistît di fieste e tante voie di meti di bande balons e fûr zûcs par confrontâsi su altris plans e altris argomentazions (il stac di ancje, la coordenazion, il grât di inzessament) cui coleghis Elisa Michellut di Tele4, Anna Casasola di “Contile juste”, Omar Costantini di VideoRegione, Mauro Missana di Radio Onde Furlane. La piche di share – nancje discori – le à regjistrade Daniele Paroni cuant che lis sôs mans e i siei pîts si son smolâts pe coreografie di “YMCA”, dai Village People. E la piste si è vierte tor di lui.
Se Dagospia al fos stat presint, al varès fat man basse di senis par un servizi dai siei. Senis che si son viodudis a peton pal buffet, cuant che i convignûts a àn metût in bande il bal par assaltâ pizetis e olivis ascolanis. Aes 3 di buinore.
JAN TOTI

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +