La “bufule meloniane” e la autonomie inte glacere

“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì di Otubar i furlans si son jevâts ducj mussolinians, e duncje vuê nus è lade ancje ben. Lant dut câs a analizâ i numars e la tindince pandude dal eletorât, par sigûr no si pues no rifleti su la percentuâl grandonone di vôts e la grande fiducie che e je madressude ancje in Friûl intor de prime femine che si prepare a deventâ presidente dal Consei de Republiche taliane. Saraie une fiducie che e dure? O une “bufule”, come che tai ultins agns al è stât il morosament dai furlans (e dai talians) cun Berlusconi prin, e po cun Renzi, Grillo, Salvini…
◆ La opinion publiche furlane e je simpri plui balarine, instabile. Chest al fâs pensâ. Democristians par 40 agns, leghiscj par 20, i eletôrs di chenti a somein no fidâsi plui di nissun ma al è avonde clâr che il lôr judizi nol à plui nuie a ce fâ cul valôr de autonomie. No si spieghe in altre maniere il lôr afidâsi vuarp a fuarcis di orientament une vore diferent ma che a àn une sole robe in comun: il centralisim.
◆ Renzi al voleve lis macroregjons, Grillo ancje, Salvini al à fat deventâ la Leghe un partît talian dineant tantis bataiis federalistis di Bossi e Miglio, e i furlans – une volte parom – ju àn ducj jemplâts di consens. Cumò la straordenarie afermazion in Friûl dal partît talian plui centralist, che al à za fat savê urbi et orbi che “l’autonomia non è una priorità”, e fâs nassi une domande spontanie. I furlans vuelino la autonomie? Sì o no? Se i furlans aromai di un pieç a votin come i talians, cence sintî nissun sburt a tutelâ la lôr autonomie, di ce ise fate par lôr la “specialitât”?
◆ Tes setemanis prin des votazions la Leghe furlane, nasant il potenziâl sucès dai aleâts melonians, e à provât a sburtâ sul teren de autonomie. Risultât? Il partît – ancje se al veve in prime linie a Pontida ancje Fedriga, il president de Regjon IosonoFVG – al à cjapade une grande sacagnade. Ma intindìnsi. Se a Drete al è cualchidun che al vai, sul front contrari no ‘ndi è un che al rît… Ni intune Çampe dute di ricostruî, dilaniade des faidis internis, ni tal Tierç pôl – che nol à rivât a sfonderâ – e soredut tai Cinc Stelis, che a àn tacât a lâ di rive jù. Intal cjamp de oposizion i timps a son une vore strents par meti in vore une strategjie par fâi cuintri al Fedriga-bis e nol somee ancjemò madûr nissun candidât alternatîf bon di meti dongje ducj. La politiche e je la art dal pussibil, ma la realtât presinte e fevele avonde clâr. E achì nus dîs che te Vierte che e vignarà lis elezions regjonâls a laran probabilmentri a zuiâsi su tancj problemis e cussì profonts che la autonomie e cor il risi di sparî: glotude de austerity dal mont globâl e dal disinterès dai furlans, chest Invier e vignarà metude inte glacere e forsit e restarà alì une vore a dilunc. ❚