Tal mês di Avost une schirie di musiciscj furlans
“Fat trente, fasìn trenteun!”: il festival de mont cjargnele ae trentesime prime edizion si conferme il “festival dai festivals”, bon di meti insiemi Cjargne, Valcjanâl e Cjanâl dal Fier par une schirie di concierts (ben cuarantetrê chest an in trentecinc localitâts), tacâts ai 25 di Jugn e che a finiran ai 10 di Setembar.
◆ Une rassegne direte dal clarinetist Claudio Mansutti che al è bon di tignî salde une rêt di colaborazions in espansion continue. «Di chês consolidadis cul Ert-Ent Regjonâl Teatrâl, il festival “Nei Suoni del Luoghi”, la rassegne “La Lungje gnot des plêfs in Cjargne”, l’“Anciuti Music Festival” di Fors Disore, il progjet Interreg Italie Austrie “In cammino/Reisewege”, aes gnovis colaborazions, come cun l’“Emilia Romagna Festival”, la cooperative udinese “Simularte”, la “Cappella Altoliventina”, il festival “Vicino/lontano Mont”, “Stazione di Topolò/Postaja Topolove”, “Via Iulia Augusta Kultursommer”, par nomenâ cualchidune des realtâts che cun lôr o vin un grant acuardi».
◆ La ricete e je chê di coinvolzi storie e atualitât cjargnele, tacant dai lûcs, cun iniziativis intai comuns cjâf lûc, par rivâ aes frazions, ai borcs, e po intes glesiis, plêfs, tai cjampeis, tai museus, tes salis polifunzionâls e tai palaçs.
◆ Dut si concentre in Carniarmonie, stimul di un Istât musicâl che aromai e je une tradizion, une usance, tra lis manifestazions regjonâls plui atrativis, buine di puartâ un indot economic di un ciert pês e di sostignî lis realtâts produtivis dal teritori.
◆ I concierts dal mês Lui a son stâts cetant seguîts e chei di Avost, cuasi un par dì, a ufrissin une varietât di propuestis un grum interessantis. Sul sît carniarmonie.it e su lis pagjinis socials dal festival de mont furlane, a son indicadis dutis lis informazions e i lûcs, cence dismenteâ che ducj i concierts a son cun jentrade libare e no covente la prenotazion.
◆ Tra lis propuestis plui inceosis, o segnali lis esibizions di grups di zovins musiciscj dal nestri Friûl, formazions di cjamare di estrazion sedi classiche che jazz, che si stan fasint preseâ sedi chi di nô che tal forest. Une buine part e ven fûr dal progjet “Il Cantîr de Art” promovût de Fondazion Bon, une scuele di alte formazion artistiche direzude de professore e pianiste Federica Repini. Tulip Duo (ai 3 di Avost inte sale de parochie di Timau), Duo Molaro-Chiarato (ai 4 inte plêf di Guart a Davâr), Duo Calligaris-Ilienko (ai 21 tal Palaç Venezian di Malborghet-Valbrune) a son cualchidun di chescj ensemble che a meretin di jessi scoltâts. No mancjin i grancj interpretis e compositôrs dal Friûl, come I Mezzo Sotto (ai 7 di Avost tal Forum roman di Zui), il Duo Zigano (stesse zornade, ma la buinore, tal santuari di Raviei), Glauco Venier in cuartet (ai 12 di Avost a For di Avoltri). Juste par nomenânt cualchidun, ma a ’nd è tancj altris, ancje dilunc dal mês di Setembar. Lait a viodi e a scoltâ. ❚