“La stilo di Hemingway” ai 2 di Setembar inte citât balneâr
Graciis ae ARLeF, ae associazion “Lignano nel terzo millennio” e al Teatri Stabil Furlan (Tsf), ancje a Lignan al rive il teatri in marilenghe. Une biele operazion di promozion culturâl intun lûc dal Friûl che bielzà il Trio Pakai al cjantave: “Al è tant biel cjatâsi insiemi, ducj cui pîts tal savalon, cjantâ, ridi e passâ l’ore, distirâts sot l’ombrelon”.
◆ Al sucêt alore che vinars ai 2 di Setembar, aes 18.30 tal Palapineta di Lignan Pinete, dentri de rassegne “Incontri con l’autore e con il vino”, i atôrs Fabiano Fantini e Massimo Somaglino, diretôr artistic dal Tsf, a daran vôs ae conte “La stilo di Hemingway”, voltade par furlan di Stefano Montello a partî de scriture origjinâl par talian di Pietro Spirito “La penna di Hemingway”. Une biele conte che si cjate dentri dal libri “Lignano ti racconto” (La Nuova Base Editrice, Udin 2002).
◆ Une liende che si ispire ae storiche visite dal famôs romanzîr Ernest Hemingway a Lignan, ai 15 di Avrîl dal 1954; a chê ocasion e je stade daspò dedicade sedi la cjaminade, propit indulà che il Tiliment si bute tal Mâr Adriatic, che il parc.
◆ Une novele, chê che e vignarà contade inte rassegne tra vin e leterature te sô edizion numar 24, che e esist ancje in forme cinematografiche: un curtmetraç dal 2011 curât inte regjie di Renzo Carbonera, cun Christiane Filangieri tal rûl di Claudia e Francesco Barilli in chel dal scritôr american.
◆ E je sigûr une prime, cheste dal teatri par furlan a Lignan. Dôs peraulis chestis che a fasin une biele rime, e se o volìn dî ancje dai leams tra il premi Nobel e la nestre tiere, al è ben ricuardâ, in plui de zornade che il scritôr al à passât inte pinete furlane, altris dôs curiositâts su chest cont. O ben che dôs des sôs oparis mestris, “Addio alle armi” e “Di là dal fiume e tra gli alberi”, a dan testemoneance di un alc di sintût tra lui e lis nestris tieris. La prime opare e nomene di fat il Puint dal Cjanâl dal Lusinç, dongje Gurize, e la seconde e cjape ispirazion di une sô storie di amôr cun Adriana Ivancic, cusine dai Kechler, zovine amante che al veve cognossût a Tisane tal 1948.
◆ “La Floride di Italie”, come che Hemingway al à vût mût di dî viodint une Lignan ben divierse di cemût che e je cumò, salacor plui simile in chel timp aes pinetis des Everglades, e je pronte duncje par scoltâ, de vôs di Fantini e Somaglino, la conte di fantasie sul scritôr e la citât balneâr furlane. Protagonist un naratôr cence non, apassionât di penis stilografichis, e un ciert Samuel che al dîs di vê, e le mostre, une stilo apartignude a Hemingway. Il prin al è interessât a comprâle, il secont a vendile. Dut al è ambientât dentri di une vilute di Lignan, un tinel plen di robis butadis a slas, proprietât di chest Samuel, un omenon su la cincuantine tornât in Italie di cualchi timp dopo di une vite passade in Sudafriche.
◆ La storie no le conti, parcè che e merete di sintîle dai doi brâfs atôrs, inte forme che Stefano Montello al è stât bon di ricreâ par furlan dal origjinâl di Pietro Spirito. O dîs dome che la stilo in cuistion e je une Parker ’51: «esempli concret di ecuilibri tra estetiche e funzion, la stilo screade tal ’40 ae vilie dal secont disastri mondiâl, cun consecuencis rivoluzionariis tal setôr dal design industriâl». Dut il rest al è di vivi e di scoltâ, lant duncje ai 2 di Setembar ae rassegne “Incontri con l’autore e con il vino”.
◆ Vignint invezit ae operazion cetant interessante di viertidure e ospitalitât de lenghe furlane indulà che di Istât si concentre il grues dal turisim internazionâl in Friûl, il diretôr de ARLeF Eros Cisilino nus conte che: «O vin organizât chest event cun grande passion insiemi a LignanoPineta s.p.a. che nus à contatât cualchi mês indaûr dopo di vê notât une dibisugne di cognossince fuarte e cressinte di bande dai turiscj pal teritori furlan. La nestre lenghe e je l’aspiet plui interessant di discuvierzi e di valorizâ, intune localitât di mâr che e à une grande vocazion leterarie: Lignan e je logade a mieze distance fra i confins antîcs di chel che al jere il Ducât dal Friûl, ben identificât ancje di G.A. Valvassori, e duncje e pues candidâsi a plen titul par jessi un puint leterari fra il passât e il futûr de lenghe furlane. Cheste prime colaborazion, che si davuelç sot de egjide de Regjon Friûl-Vignesie Julie, e pues vierzi lis puartis a une serie di progjets di podê inmaneâ in graciis de disponibilitât sedi dal Teatri Stabil Furlan, sedi de Societât balneâr, e sedi, o sin sigûrs, de Aministrazion comunâl a pene insediade.»
◆ Sul significât culturâl, tra autôrs, vins e teatri furlan a Lignan, il diretôr artistic dal Tsf Massimo Somaglino al marche che: «La robe plui fantasiose che si cjate dentri di cheste conte, e che mi à subite inzingarât, e je cheste indicazion dal test dulà che si dîs che il vendidôr de stilografiche al fevele cuntun fuart acent inglês. Cemût si rivaraial a rindilu par furlan? Intant, par stâ dentri te atmosfere internazionâl e americane, o ai domandât di stâ cun nô sul palc a Denis Biason, ghitarist, che al è di Morsan da lis Ocjis (no lontan di li, duncje), ma che al sune il blues compagn di un ghitarist dal Mississippi… in plene atmosfere Hemingway». ❚
