Sfuei Mensîl Furlan Indipendent
Archivi de Patrie

Marco Del Missier: spirt cjargnel e passion pe competizion

servizis di Francesco Tonizzo
MARCO DEL MISSIER

Al baste lei lis cronichis sportivis furlanis in dutis lis stagjons: il non di Marco Del Missier al ven fûr simpri. Il ciclocross di Invier, il schi in Fevrâr e Març, daspò la mountain bike, la corse sù e jù pes monts: il cjargnel di Dimpeç al è simpri protagonist e, une robe di marcâ, al è dispès vincidôr. Cundut che al à un lavôr di lambicâsi, une aziende di termoidrauliche di tirâ indenant, la famee e i fîs di viodi, e l’impegn cul socors alpin.
La curiositât di savê ce ativitât sportive che al à miôr e je tante: ae domande, il protagonist de storie al rispuint cun ideis avonde claris.
◆ “A contâle dute – al dîs Marco – o soi plui ciclist, se o metìn adun l’impegn cul ciclocross e cu la mountain bike. Dulinvie dal Invier al è mancul timp par gjoldi de nêf e cori cui schîs e, cul fat che massime in Dicembar e in Zenâr o soi impegnât cul ciclocross, al reste forsit Fevrâr e un tic di Març par fâ il schiadôr, cundut che o soi di Dimpeç. Pal rest dal an, o cor in biciclete o a pît in mont. Lant a pît, mi plasin soredut lis corsis clamadis “Vertical”, chês che tu ti rimpinis su la piche de mont”.
_ Fasistu dute chê ativitât sportive dome par gust o parcè che tu sês sburtât de voie di vê risultâts? “Al cent par cent o soi un agonist – al dîs – o ai la competizion tal sanc. Dutis lis voltis che o fâs cualchi gare, o cîr simpri di lâ ad implen, al massim che o pues. Che mi ricuardi jo, no ai mai fat une corse dome par jessi li e partecipâ, cence pensâ al risultât. In fin dai conts, se tu vâs a misurâti cun altris atletis, tu scuegnis fâ cussì”.
__
Cuâl isal il risultât plui preziôs che tu âs vût?
“Massime chest an al è stât une vore positîf. O ai vinçût il titul mondiâl di schi alpin inte categorie dai Master, fasint miôr di tancj aversaris di nivel alt, ancje ex professioniscj. Un titul individuâl che mi à lassât cetante sodisfazion. Prime di chel, o vevi cjapade la medaie di arint intal schi verticâl e, intal ciclisim, o ai vinçût il titul talian di ciclocross a cjase mê, in Friûl, a Varian di Basilian, intal mês di Fevrâr… Un biel ricuart”.
__
Une robe straordenarie e je la tô determinazion intal jessi simpri competitîf e in cundizion atletiche cetant buine, cundut che tu lavoris. Cemût fasistu?
“Jo no soi un atlete che al va daûr des tabelis preparadis dai alenadôrs. O voi indenant cul scoltâ lis sensazions. Par un atlete amatoriâl che a son tancj agns che al fâs cheste ativitât sportive, o pensi che e sedi la robe miôr. O viôt tante int che e va daûr di tabelis e di programs tecnics e che e dure al massim un pâr di agns, prime di sparî de circolazion. Par dî une robe, cjalìn la mê esperience. Juste vuê o ai lavorât par meti jù panei solârs sul cuviert di une cjase in Cjargne: cjaldon, fature, oris di lavôr. In plui, cuant che e jere ore di gustâ, o soi lât a fâ un socors alpin a Dimpeç, parcè che mi àn clamât. La sere o soi strac e no pues alenâmi ad implen”.
__
E duncje?
“A sburtâ simpri in chê direzion, al è il pericul di lâ fûr cul cjâf, parcè che daspò i risultâts a no rivin e tu pierdis l’ecuilibri. Dut câs, cuant che o ai timp o cîr di alenâmi simpri, ancje la buinore adore o la sere, sul tart. La setemane passade, o soi lât a durmî tal Ripâr dal Marinelli, sot dal Colians, parsore Culine, par vê la pussibilitât di adatâmi in cuote, e tirâ dentri aiar fresc: partît di cjase, o soi rivât là sù, fasint un biel alenament, e la buinore o soi tornât jù a Dimpeç par lâ a vore. In sostance, il lavôr di alenament al va daûr dal impegn professionâl”.
__
Isal un puest indulà che tu cjatis simpri il mût di cjamâti?
“Par cjatâ lis miôr sensazions, o voi simpri su la mont parsore di cjase mê, a Dimpeç, su la panoramiche. Si rive sù dome a pît e cualchi moment, cuant che al criche il dì o cuant che al ven scûr, al è pardabon biel”.
__
Dopo che tu varâs fermât di fâ garis, ce âstu voie di fâ?
“Al sarès biel deventâ alenadôr. Ma intant mi sint ancjemò un atlete e un agonist e, almancul par cualchi an ancjemò o voi indenant cussì”. ❚

…………………………………………………………………………………..

Un model perfet di indurance e di valôrs di insedâ tai zovins

“O ai tacât a vore di zovenut, une vore adore – al conte Marco Del Missier -. In famee o sin trê fradis e no vevin tancj bêçs; intai agns Novante i miei no jerin tant ben sot dal aspiet economic. Un pôc la crisi, un pôc altris robis, o ai vût di lassâ la scuele e di lâ a vore. In chê volte al jere di fâ il pas par deventâ un atlete vêr e, invezit, o ai cjapade une altre direzion. Sante scugne. Cuant che o vevi 13 o 14 agns o vincevi bielzà garis: o rivavi prin assolût, denant di atletis plui grancj”.
__
Cemût mai, cun chel valôr sportîf, no âstu vude la ocasion par deventâ un professionist?
“Al jere di jessi dentri dal zîr just. Cui sa… Biacemai se o jeri a Glemone, indulà che al jere un biel moviment pe mountain bike, forsit e vignive fûr une altre storie. Ma, tu sâs, un di bessôl, cence nissun che al sburte, cundut che o fasevi cualchi biel risultât, no ai rivât adore a cjapâ chel tren e o soi restât intal gno ambient”.
__
Vuê, un zovin come che al jere in chê volte Del Missier al sarès almancul in Nazionâl…
“In dì di vuê, ai zovins ur rive dut cence fâ fature: dut al è scontât. Mi plasarès lassâ ai fruts i valôrs, chei plui positîfs dal sport. La mê prime mountain bike serie e je stade un regâl di gno nono: intal 1996 e costave 800 mil liris, no fufignis. O ai tacât a fâ garis cun chê biciclete: le ai ancjemò. Cui prins francs vuadagnâts cul lavôr o ai rivât adore di comprâmi une biciclete di seconde man di un om dal gno paîs. Cumò, ai miei fîs ur ai comprât bicicletis di alt nivel, ma, tu sâs, cun chê che vuê i zovins a àn dut, no rivin a preseâ pardabon. Tancj a pensin di jessi campions cence vê vinçût nuie: almancul, mi plasarès che a vignissin daûr di me, fasint ce che o fâs jo, cence vê la creste di insegnâmi lis robis. O ai imparât cjalant chei plui fuarts: o tasevi e o provavi a fâ compagn”. ❚

……………………………………………………………………………………

La schede dal campion di Dimpeç

Marco Del Missier, classe 1983, al cor in biciclete, sedi mountain bike che ciclocross, cu la DP66 Giant Smp, la scuadre tirade sù di Daniele Pontoni, il comissari tecnic de Nazionâl di ciclocross e un dai plui grancj atletis furlans di simpri. Propit cun lôr al à vinçût il titul talian, in Zenâr, intal percors di Varian di Basilian, te categorie M2.
◆ Intai agns passâts al veve corût par altris scuadris: la Spezzotto Bike Team, cjapant un altri titul talian tal 2020, la Sanvitese, cul titul dal 2019 e, plui indaûr, la Kicosys di Tresesin. Ducj si ricuardin de vitorie te Pedalonga dal 2017, indulà che al à dât spetacul.
◆ Intal schi alpin al è tesserât pe Societât Sportive Fornese, Stele di arint al Merit Sportîf: il titul mondiâl 2022 dai Master al è il moment plui alt par Marco.
◆ Del Missier al fâs ancje corse in mont: al cor bessôl, cence jessi afiliât a nissune scuadre. ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +