Irlande dal Nord: la vitorie dal Sinn Féin, e il prin intervent par gaelic fat tal Parlament

Chê dai 5 di Mai di chest an si à dal sigûr di calcolâle une date impuartante inte storie de Irlande dal Nord. In chê dì i citadins des sîs conteis de isule che no fasin part de Republiche di Irlande ma che a son dentri dal Ream Unît, a son stâts clamâts aes urnis pe elezion dal parlament e la maiorance di lôr e à votât pal Sinn Féin (SF). Di cuant che si àn istituzions autonomis pes sîs conteis irlandesis sot aministrazion britaniche, e je la prime volte che un partît nazionalist irlandês al è prin pal numar des preferencis e dai deputâts elets.
◆ Il sucès pai nazionaliscj progressiscj al è stât net: il SF al à cjapât il 29% dai vôts, in cressi dal 1,1% rispiet aes elezions stadis, e al à vût elets vincjesiet parlamentârs. La afermazion dal partît vuidât di Michelle O’Neill (foto) e jere almancul in part za previodude dai osservadôrs, che a vevin ricognossût tant che elements di fuarce dal SF la sô plateforme programatiche in chel istès pragmatiche e radicâl, cuntune grande atenzion pes tematichis sociâls (sanitât, lavôr, cuistion abitative e cost de vite) e il so jessi un partît a trazion zovine e feminine. Il risultât finâl al è lât ancje plui innà des previsions, ancje par vie de pierdite di consens dal prin partît unionist, il DUP (Democratic Unionist Party), che cul 7% dai vôts in mancul rispiet aes elezions stadis al è sbrissât jù al 21,3% cun vincjecinc elets. Un altri element che al à marcât la gnove tornade eletorâl al è chel de incressite dai consens pal Alliance Party, partît che no si ricognòs ni tant che unionist e nancje tant che nazionalist, cumò tierce fuarce cul 13,5% dai vôts (+4,5%) e disesiet deputâts (nûf in plui di chei di prime).
Daûr si son plaçâts, cul 11,2% dai consens (-2,9%) e nûf elets (un di mancul), i unioniscj dal UUP e i nazionaliscj moderâts dal SDLP (cun vot deputâts), intant che i unioniscj de Traditional Unionist Voice (TUV) e la çampe radicâl di People Before Profit a àn cjapât une sente par om e i puescj de Assemblee di Stormont che a restavin ju àn cjapât doi candidâts indipendents.
◆ La vitorie dal SF di une bande e torne a vierzi la prospetive di unificazion de Irlande, cuntun che par plui motîfs no je par sigûr al ordin dal dì, e di chê altre e riscje di no vê nissun impat imediât sul guvier de Irlande dal Nord. Il sisteme di guvier nordirlandês si fonde sul compromès tra il prin dai partîts de aree unioniste e il prin di chê nazionaliste. Daûr dai risultâts dai 5 di Mai, a vuidâ la Irlande dal Nord tant che prime ministre e varès di jessi Michelle O’Neill dal SF, compagnade di un prin ministri vicjari nomenât dal DUP. Intes legjislaturis stadis, cuant che par solit a rivavin seconts, i republicans a vevin simpri rispietât chest sisteme di guvier compartît, i unioniscj invezit a àn declarât daurman che no lu fasaran, almancul che no si meti mans sul cussì clamât protocol pe Irlande dal Nord che al regole i rapuarts doganâi cu la Union Europeane e, in primis, cu la Republiche di Irlande dopo de jessude dal Ream Unît de UE.
◆ Cheste posizion si à palesade ai 13 di Mai, in ocasion dal insediament dal gnûf Parlament nordirlandês, cuant che il DUP al à impedît la elezion dal ufici di presidence de Assemblee, che par chel nol pues funzionâ in maniere regolâr. Guvier e Assemblee a son cussì blocâts e tignûts in ostaç dal DUP. Cuintri di chel che si pues clamâlu ostruzionisim dal DUP a àn cjapât posizion dutis lis fuarcis politichis, fale che la TUV.
◆ In spiete di viodi se e cemût che si disblocarà la situazion, al merete ricuardât un altri fat che al segnât la prime riunion dal gnûf Parlament nordirlandês: il prin intervent uficiâl par gaelic irlandês, che al è stât fat de deputade dal Sinn Féin, Aisling Reilly,e duncje l’inviament dal gnûf servizi di interpretariât garantît de Assemblee par chê lenghe e pe varietât di scots che si fevele tal Ulster. ❚