Il restaur di storie, bielece e culture tant che oportunitât di cressite

La Fondazione Friuli e conferme ancje pal 2022 il sostegn pal setôr de art e architeture cul bant che al met a disposizion 600 mil euros. Il bant dedicât al restaur al è stât presentât ai 16 di Març li dal cine Visionario di Udin: chest an si risiervarà une vore di atenzion ai progjets leâts ae valorizazion di bens mobii e imobii di particolâr rilevance storiche e artistiche, e ai intervents edilizis di recupar su struturis destinadis ai centris di agregazion. Ancje in chest câs, come par chei altris bants za presentâts, la iniziative si poie su la colaborazion de Regjon e sul sostegn di Intesa Sanpaolo. «La Fondazione – al à dit il president Giuseppe Morandini – e à dât vite a une bancje dâts di ducj i intervents di restaur realizâts vie pai agns midiant di chest bant: in cheste maniere, cun schedis aprofondidis, o intindin rindi publics e fruibii ducj i detais di un patrimoni che, in gracie dal nestri sostegn, lis realtâts locâls a son rivadis a salvâ e a meti a disposizion de comunitât». Il bant al è indreçât a istituzions e ents publics, ents religjôs, fondazions e associazions cence finalitât di vuadagn e, par chel che al inten il recupar di centris di agregazion, ancje associazions iscritis tal regjistri regjonâl dal volontariât, Aps e Onlus. Lis domandis a van mandadis dentri dai 2 di Mai: i beneficiaris a varan di inviâ i lavôrs dentri di un an de notifiche de assegnazion dal contribût e finî dentri di 18 mês di cuant che a son tacâts.
◆ «Si trate – e à dit la assessore regjonâl pe culture Tiziana Gibelli – di une iniziative che e va a insiorâ il nestri patrimoni culturâl ma no dome, cualchi volte ancje a salvâlu e a preservâlu dal deteriorament. O vin la fortune di vivi intune regjon dulà che o sin circondâts di storie, bielece e culture: al è un patrimoni inestimabil che al domande l’ûs di gruessis risorsis par jessi conservât».
◆ «Al è un sostegn fondamentâl – e à dit Simonetta Bonomi de Soreintindince – par garantî la sorevivence di bens culturâls che a saressin destinâts al degrât: la varietât e la capilaritât dai intervents a son fatôrs cualificants di dute la operazion».
◆ «Ancje tal periodi di pandemie – e à fat savê Francesca Nieddu, diretore regjonâl di Intesa Sanpaolo – no vin mai trascurât lis iniziativis a sostegn de culture e de art tai teritoris, parcè che o stimìn che midiant dal recupar dal patrimoni culturâl si puedin creâ oportunitâts di cressite, benstâ pe coletivitât, coesion sociâl e recupar des tradizions». ❚