Matteo Grudina e la storie esemplâr dai “Invicti Lupi”
A son stâts un dai popui vuerîrs plui fuarts dai lôr timps, bogns di dâ vite a un ream indipendent in Italie che al à tignût bot par scuasit doi secui. Lis lôr impresis nus son rivadis cun rivocs gloriôs midiant dal penâl di Pauli Diacun, biel che la storiografie plui antighe ju à fats rivâ de Scandinavie, dissendents nuie di mancul che di Wotan, il diu de lungje barbe.
◆ Po dopo, il lôr sucès al è lât al mancul, fin ae mostre “I Longobardi” di Vile Manin e Cividât dai agns Novante, che e à stiçât l’interès par altris studis e ricercjis, tant che chês de Scuele di Viene.
◆ Di in chê volte, tancj a son stâts i progjets di valorizazion di cheste gjernazie (ma forsit al sarès plui just fevelâ di miscliç di plui popui) fondamentâl pe nestre tiere, no dome par chel Ducât di Forum Iulii (voltât sedi tant che “Ducât di Cividât” che come “Ducât dal Friûl”) ricuardât intai libris di storie, ma soredut par une culture che e supe inmò di chês lidrîs antighis, sedi pai rescj archeologjics che pe lenghe e pe toponomastiche.
◆ Nissun, dut câs, al veve ancjemò pensât a un prodot cinematografic, ideât di pueste par ricuardâ il leam strent cul Friûl e par marcâ la potenzialitât de storie locâl ancje a nivel turistic.
◆ In chest sens, il documentari “Langobardi. Alboino e Romans” al vierç un agâr gnûf intal cjamp de ricercje storiografiche, zontant l’intratigniment e la suspance ae impostazion academiche tradizionâl.
◆ Il docufilm, ideât di Invicti Lupi e di Matteo Grudina, cu la regjie di Simone Vrech e cu la poie di cetantis realtâts regjonâls, al à dade une biele scjassade al panorame nazionâl, tant di jessi trasmetût ancje par Rai Storia inte suaze de trasmission “a.C.d.C” par cure di Alessandro Barbero (unic documentari sui Langobarts di produzion taliane).
◆ No contents dal risultât a nivel talian, il docufilm al è daûr a fâsi une spanzade di premis par dut il mont, cuntune lungje schirie di ricognossiments ancje a Hollywood e a Los Angeles.
◆ Lis puartis dal sucès, dut câs, si son a pene spalancadis e a prometin di menâ ancjemò plui lontan il non di Romans e di dut il Friûl.
◆ Daûr dal docufilm “Langobardi. Alboino e Romans” e di “Invicti Lupi” o cjatìn Matteo Grudina, zovin apassionât di rievocazions storichis e une vore impegnât intal setôr dal associazionisim. Al è stât lui a intivâ la potenzialitât platade insot de storie langobarde di Romans dal Lusinç, cuntune necropoli di passe 300 tombis.
_
Matteo, intant i nestris compliments pal sucès dal vuestri docufilm. Cemût ise nassude la associazion Invicti Lupi?
O soi simpri stât cjapât des rievocazions storichis e cuant che o ai cognossude la realtât di Romans, ancje in gracie de associazion di ricercje “Scussons”, o soi restât striât e o ai capît subit che e podeve jessi la fonde par alc di plui grant. La associazion Invicti Lupi e je nassude intal 2011, e intal 2013 e je tacade la aventure di “Romans Langobardorum”, rievocazion che e smire ancje a jessi un sburt turistic pal paîs. Intal 2020, in gracie dal finanziament de Regjon, dal Comun e di altris ents, e je scomençade la aventure cinematografiche e, aben che nissun al sedi profete in patrie, il rivoc internazionâl nus à dade conferme dal fat che cuant che lis robis a son fatis cun passion, ancje cence grandis risorsis, si puedin pardabon fâ prodots di cualitât. Il docufilm, di fat, al è stât zirât cence grues efiets speciâi e cun comparsis interpretadis di rievocadôrs e di volontaris. Si sin impegnâts ducj al massim in chest progjet, che al mostre cemût che la nestre storie e il nestri teritori, contâts intune maniere gnove e doprant il lengaç dal cine, a podedin stiçâ l’interès ancje di bande di un public forest, in plui di jessi une strategjie par svicinâ lis gnovis gjenerazions ae scuvierte dal lôr passât.
_
Tant che associazion, di fat, o sês impegnâts a promovi il vuestri lavôr di rievocadôrs ancje intes scuelis.
Il docufilm, di fat, al è pensât tant che imprest di divulgazion storiche e al pues jessi un bon riferiment pai docents, pai museus ma ancje pal setôr turistic. Cun di plui, noaltris o colaborìn dispès cun istitûts dal teritori (e no dome) par mostrâ intal concret cemût che e jere la vite tai timps dai Langobarts. La nestre e je une maniere gnove di fâ lezion: viodisi denant un in costum tipic che ti mostre ogjets e ti conte avigniments di chê ete e je pardabon dute une altre storie, e cussì i fruts a vegnin cjapâts dentri inte materie.
_
Di dulà vêso cjapât i riferiments pai vistîts e pes ricostruzions storichis?
Il nestri al è un lavôr di ricercje continue e di studi des fonts scritis. Po dopo, bisugne ancje butâsi e sperimentâ. Il biel de storie al è che no je mai une entitât sierade e definitive, ma ben in evoluzion continue. Al pues sucedi, duncje, che cualchi interpretazion ti meni fûr dal troi e che si vedi di tornâ a scomençâ dut dal principi, come che al è stât cu la ipotesi de divignince dai Langobarts, che par agns si à pensât che a fossin popui nordics e invezit cumò si è simpri plui sigûrs che a sedin rivâts de Panonie.
_
Cuâl isal il vuestri prossim obietîf?
O vin a pene vinçût un altri finanziament regjonâl (tra i prins 20 progjets presentâts pal bant “Ripartenza Cultura e Sport 2021”) par fâ sù un vilaç archeologjic langobart inte vecje polvariere di proprietât comunâl. Cussì, daspò de realizazion dal Museu archeologjic te gnove sede (in gracie di un finanziament dal Ministeri de culture), Romans si mudarà pardabon intun pont di riferiment pe Ete langobarde. La idee e je chê di creâ un parc a teme, daûr di tancj altris presints in Europe, cu la ricostruzion dai edificis e cu la presince dai rievocadôrs, li che si podarà fâ vivi e fâ tocjâ la storie a ducj, un pont di incuintri internazionâl par podê cognossi la ete langobarde e par mostrâ cemût che la scuvierte dal passât no sedi une materie mufulide, buine dome pai academics, ma che e pues deventâ respîr pal teritori e fintremai mudâsi in alis par svolâ lontan. ❚
