‘Adalt’, tal disc gnûf di Loris Vescovo riflessions filosofichis, poesie e sunôrs inmagants

Lu spietavin za di timp e biadelore al è rivât. A jerin almancul doi agns che si fevelave di chel che al sarès stât il gnûf disc di Loris Vescovo. La spiete e la gole a jerin fuartononis, tignint cont in gjenerâl di dute la produzion dal cjantautôr di Trivignan e in particolâr dal so cd che al jere saltât fûr tal 2014, ‘Penisolâti’, che al veve vût ancje il ricognossiment prestigjôs de ‘Targa Tenco’. Cumò chel lavôr, tant pensât (dal autôr) e tant spietât (di cui che al cognòs e che al presee il lavôr di Loris o che al à une passion specifiche pe produzion musicâl di cualitât in lenghe furlane), al è jessût.
◆ Compagn di ‘Penisolâti’, al ven dât fûr de etichete Nota, inte golaine Block Nota, e ancje par chel, ancjemò prime di scomençâ a scoltâlu, si fâs preseâ daurman pe sioretât de sô confezion: un librut di vincjesîs pagjinis cun imagjins e tescj metûts dongje cun stîl e cun coerence comunicative.
◆ Il so titul al è ‘Adalt’ e si pues calcolâlu tant che un ‘concept album’, là che dut ce che si scolte, ce che si lei, ce che si viôt e salacor ce che si imagjinisi scoltant, leìnt e viodint, al è leât di un fîl di pinsîr, di un resonament, di poesie e di emozion. Cun di plui, cemût che al conte il stes autôr, ‘Adalt’ al siere chê che si pues definîle une trilogjie ideâl, vierte cun ‘Borderline’ tal 2008 e disvilupade juste cun ‘Penisolâti’ vot agns indaûr.
◆ In cheste ocasion lis peraulis, lis musichis, lis storiis e lis visions di Vescovo, dopo vê disfiliât e scjavaçât confins reâi e imagjinaris e vê passât spazis tra tiere e aghe, a van intune altre direzion. A van adalt, cemût che al sclarìs il titul dal album, e si movin tra tiere e cîl, in maniere simboliche e concrete. «La dimension verticâl che ducj cuancj noaltris o vivìn – e che par chel nus somee alc di famee – e definìs, in fonts, il nestri limit», al marche Loris Vescovo. Al è par chel che ‘Adalt’ si alce des mapis bidimensionâls «par cirî di tradusi in musiche la altece, che e je la direzion dal fîl a plomp, che e continue in maniere ideâl viers de sfere celeste».
◆ Cheste cjalade in altece e cheste tension bande il ‘zenit’ – une peraule di divignince arabe che il so significât origjinari al è juste chel di «la vie che e sta adalt» – a son i elements che a caraterizin ducj i dîs tocs contignûts intal album. Inte dimension verticâl si dan dongje i temis de spiritualitât e dal podê, de nature e de tecniche, dal pierdisi e dal cirîsi.
Vie pes dîs cjançons a vegnin tocjâts i rapuarts tra om e divin, tra sorestants e sotans, tra Nord e Sud dal mont, ma ancje la cuistion dal limit, sedi cu la cussience e la necessitât di fermâsi che cu la dibisugne di passâ mûrs e tiermins (‘I toi cjamps’). Dilunc di chestis coordenadis di pinsîr al è ancje spazi par domandâsi ‘Nô ce vino pierdût?’, par recuperâ une poesie di Francesca Marini Barnaba (‘Perdonaimi’) e une cjançon popolâr dai Grisons (‘Songta Margriata’), par ricuardâ lis Lotis dal Cormôr e il lavôr di ducj i dîs (‘Sotans’), pal omaç pal poete Raff BB Lazzara (‘Riff Raff’), pe resistence linguistiche (‘Criptografiis’) e ancjemò par altris diviersis declinazions de verticalitât (‘Adalt’, ‘Dome’ e ‘A plomp’).
◆ Il dut al à une vieste musicâl une vore siore e svariade, là che la forme cjançon si inricjìs di timbris, di ritmis e di sunôrs, che a san di blues, di Mediterani, di Afriche, cence dismenteâ la musiche popolâr furlane e roseane. Une anticipazion prometente di ‘Adalt’ e jere stade ufierte di Loris Vescovo tal Istât dal 2020, intune serie di concierts ator pal Friûl, adun cun Leo Virgili, Thomas Remondino e Massimo Silverio. Il disc al è stât regjistrât e produsût cun chei stes compliçs e tra ghitaris, percussions, bas, violoncel, campionaments, tastieris, guitalele e guzheng e altris struments al manten lis promessis di in chê volte e anzit al è ancjemò plui lussuôs e sverzelât, mantignint in chel istès une essenzialitât profonde e… alte. ❚