Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e dîs Chiara –. Par colpe dal Covid, la domande intal ristorant e je calade e o vin tacât a vê un esposidôr cui nestris prodots di comprâ e puartâ a cjase (paste frescje di sarasin e paste secje di spelte, biscots…). O sin in fase di cressite ancje parcè che fâ pal ristorant al è un discors, fâ robe confezionade al è un altri, e tocje slungjâ i timps di conservazion; però o vin viodût che e je une robe che e funzione. Dopo o vin pensât di slargjâ cheste idee, dant la pussibilitât di fâ i ordins vie messaç cence vignî daurman chi de Polse. O partìn cun cheste idee e e sarà une robe che o speri che e cressarà cul timp. O colaborìn pal moment cun trê aziendis agriculis: Fiorindo Mazzolini di Soclêf (che al furnìs farine di polente, spelte, forment, forment integrâl…); Uberto Pecol di Raviei (cun sirops, marmeladis…) e Devis Bonanni di Raviei (che nus garantìs verduris e ûfs di gjaline). Dopo o vin i formadis de Alte Val de Bût. Se a son produtôrs che a son interessâts a vê un intermediari par proponi i lôr prodots, a nô nus fâs plasê! O savìn che, soredut par un piçul produtôr, spes e devente une imprese vê un pont par vendi i propris prodots e no vâl la pene.”
◆ Chiara e pense che “o vin bisugne di tacâ a scuvierzi ce che o podìn vê tal nestri teritori, ancje acetant di spindi un pôc di plui. Però la cualitât e je une altre, soredut parcè che i prodots a son origjinaris di chenti!”
◆ Chiara e Matteo a àn ativât ancje il servizi a domicili, cirint di favorî la int sul teritori e siervint la zone de Cjargne e dal Friûl de Alte, rivant fin a Udin citât. Cheste esperience e je scomençade cu lis consegnis dai plats pronts a domicili tal timp dal Covid e a àn podût rodâsi cui timps di consegne.
“A nô – e conte Chiara – nus è simpri pesât un pôc il fat che par comprâ i prodots o vedin di zirâ ator par diviers puescj. In Cjargne al mancje un sogjet, consorzi o cooperative che al meti adun un unic spaç indulà cjatâ ducj i prodots di cheste tiere.”
◆ Dongje di chest servizi, Chiara e Matteo al è di trê agns che a àn in gjestion il ristorant: “i nestris plats a son chei sempliçs e tradizionâi de cusine cjargnele. O sin intun puest che al tocje vignî chi di pueste ma istès in chescj agns o vin vût une biele rispueste di bande de int”. Propit parcè che a son intun puest speciâl e plen di storie (tacant de Plêf di San Pieri di Zui che e domine sul giup), l’invît al è chel di lâ a scuvierzi chest biel contest e, parcè no, cjapâ la ocasion par gustâ ancje prodots cjargnei e puartâsai a cjase.
◆ Par ogni informazion si pues consultâ il sît https://lapolse.wordpress.com/ ❚
