Ocjo ae rabie de int scjassade de pandemie

✽✽ Provìn a predî il futûr sul destin dal Friûl in chest 2022 che no si vierç ciert te maniere miôr par ce che al tocje la situazion sanitarie. Ma ancje chê sociâl e je dificile: se al larà indenant a cressi il presit de energjie e des materiis primis, pe grande part des aziendis al sarà impussibil sostignî i coscj, rindint nui i risultâts de riprese dal an passât. Tantis impresis – soredut piçulis e mediis, a conduzion artesanâl e familiâr, fîl de schene dal nestri sisteme regjonâl – a saran obleadis a sierâ, cun consecuente casse integrazion e licenziaments: de agriculture al cumierç, ducj i setôrs produtîfs a vignaran cjapâts dentri.
✽✽ A stan za lant sù lis boletis di lûs e gas: ancje pes nestris fameis il cost di sostignî al sarà alt, par cualchidune fintremai masse. Si incrudirà duncje la rabie, la frustrazion de int, za scjassade des contradizions creadis de pandemie.
✽✽ O podês stâ sigûrs: al sarà cualchidun pront a jentrâ dentri in chest clime, alimentant la proteste intes sôs formis plui violentis, cun carateristichis similis a chês za viodudis intai corteus no vax. Antagonist principâl il Stât e lis sôs istituzions.
✽✽ Atenzion: ancje cui che si declare autonomist al à individuât intal podê centrâl l’aversari di simpri, e duncje il dubi che chest mût di intindi la bataie politiche al cjapi pît intal pinsîr di cualchi furlan al è plui che legjitim. E al sarès un erôr grues chel di crodi di podê vuidâ o influî su chest gjenar di moviment, che nol è in stât di produsi progjets e disvilup.
In chescj agns o ‘nt vin viodûts tancj, dai gjilês zâi francês ai forcjats talians, lâ in place cun sprocs menaçôs par dopo finî mangjâts di partîts e partiduts stataliscj e simpri nazionaliscj.
Cemût salvâ duncje il lavôr, se no cu la uniche ricete che il Friûl al cognòs, o ben la solidarietât? Chel sens di apartignince che al unìs di là des classis, che si ricognòs tant che popul e che tant che popul al fronte lis dificoltâts. Cui che al à di plui al varà di jessi solidari: che nissun si iludi che al basti un recovery a curâ il dam! E che la Regjon e fasi il so, no cun distribuzions a ploie di bêçs, ma cun progjets smirâts che a puedin recuperâ puescj e stipendis.
✽✽ A son ocasions che propit in chescj moments no van straçadis, dal rilanç de mont ae sistemazion idrogjeologjiche dal teritori, dai servizis aes comunitâts ae edilizie. Che e elimini burocrazie e garis al ribàs. Che e ponti su la scomesse tecnologjiche.
Ciert, se e pense che il disvilup dal Friûl al vedi bisugn de ovovie a Triest, o sin dal gjat. ❚