Il Friûl al è il pues just par promovi e par meti in vore la interculturalitât

Un progjet Erasmus + la che i partecipants
a rivin di vot diviers Paîs europeans
Ae fin dal mês di Setembar stât si à davuelt in Luze, tal Comun di For Davuatri, il progjet Interculturâl Playback Theatre, une iniziative inmaneade de associazion di promozion sociâl e culturâl APS KLARIS cul jutori de Union Europeane, inte suaze dal program Erasmus +.  Al jere un cors di inzornament e aprofondiment sui temis e su lis metodologjiis de educazion no formâl, de comunicazion interculturâl, de identitât e dal leam tra creativitât, comunicazion, produzion artistiche e multiculturalitât, cuntune part specifiche dedicade aes potenzialitâts espressivis, comunicativis e relazionâls de improvisazion teatrâl tant che pratiche educative.
◆ Par passe trente di lôr – operadôrs, educadôrs e rapresentants di associazions e ONG che a operin in ambit sociâl, culturâl e dai zovins – e je stade une esperience formative e umane une vore interessante, no dome pai siei contignûts e pe sô organizazion, ma ancje par efiet des particolaritâts dal contest teritoriâl là che e je stade fate.
◆ I partecipants a rivavin di vot diviers Paîs europeans: Bulgarie, Estonie, Italie, Letonie, Paîs Bas, Polonie, Spagne e Svezie. A varessin vût di partecipâ ancje operadôrs e educadôrs di Ream Unît e Turchie, ma nol è stât pussibil par vie des limitazions ae mobilitât leadis ae prevenzion e al contrast de difusion de pandemie. Intal moment de valutazion finâl, diviers di lôr a àn marcât che la cualitât  dal progjet si à zovade ancje dal contest teritoriâl e ambientâl là al è stât fat. Cemût che e ricuarde Dorota Magdalena Stromidlo, presidente de APS KLARIS «Ducj i partecipants a àn preseât il percors formatîf proponût e soredut il fat di vêlu fat intune regjon multiculturâl e multilengâl tant che il Friûl, e in cheste zone de Cjargne e des Dolomitis furlanis, tra Sapade e For Davuatri».
◆ Tra un laboratori e chel altri, i partecipants a Intercultural Playback Theatre a àn vût mût di discuvierzi, cognossi e preseâ il teritori sedi cun escursions e cjaminadis sedi in graciis dal materiâl che ur è stât metût a disposizion: dai discs de etichete Musiche Furlane Fuarte di Radio Onde Furlane, aes publicazions informativis e promozionâls su la ufierte turistiche, su la enogastronomie, su la culture e sul pluralisim linguistic, che al è stât ufiert di PromoTurismoFVG e de ARLeF-Agjenzie Regjonâl pe Lenghe Furlane.
◆ «Interculturâl Playback Theatre al è stât un sucès – cemût che e marche Stromidlo – no dome pal cors in se e pes pussibilitâts di gnovis colaborazions che a podaran saltâ fûr tal avignî, ma ancje parcè che i partecipants a cheste iniziative, tornâts a cjase, a àn dât e a daran cont de lôr esperience, descrivint la bielece dai lûcs, la ospitalitât vude e lis particolaritâts de nestre regjon, che par plui resons si conferme ‘cûr di Europe’ e contest ideâl par promovi e praticâ il dialic interculturâl». ❚