Ancje la marilenghe intal program di Trallalero, il festival di teatri pai fruts che al plâs ancje ai grancj

Chest an al è spazi ancje pal furlan intal program di chel che al è deventât intai agns il cartelon di spetacui di teatri e culture pai fruts plui biel e plui vivarôs de nestre regjon: si trate di Trallallero, festival rivât ae edizion numar 11 che si davuelç in cuatri Comuns (cun centri a Dartigne), cuntun totâl di 22 spetacui di tantis compagniis diferentis. Cun di plui, dai 8 ai 17 di Otubar laboratoris e mostris a laran a jemplâ – come in ogni altre edizion – lis ativitâts che a son indreçadis a un public sot dai 14 agns, de scuele de infanzie fintremai aes mediis di prin grât, di un aspiet didatic e educatîf di prime cualitât.
◆ In cheste ocasion al sarà ancje spazi, come dit, par une produzion furlane: un conciert spetacul che Leo Virgili e Nicole Coceancig a proponaran a Dartigne tal Teatri Lavaroni ai 15 di Otubar e che si clame “Bota e rispuesta”. Une cerce di Friûl inte suaze dai events che a tirin dongje simpri di plui operatôrs e critics dal setôr di dute Italie, ma ancje dal forest. La cognossince reciproche de int che e lavore in chest cjamp particolâr dal teatri e je une ocasion di confront e di miorament par ducj, ma soredut pai fruts e je une biele setemane par imparâ un grum di robis cun gjonde e divertiment. Tancj i apontaments une vore interessants, cun spetacui che a van di Dario Fo a Peter Pan passant pai esui  di Istrie e Dalmazie e fasint di voli ae musiche e ae formazion, une des clâfs che il Festival al à cirût di no dismenteâ mai in ogni edizion. Di fat, Teatro al Quadrato, la associazion che lu inmanee di simpri, e à une vision dal teatri pe infanzie une vore integrade te comunitât e e à simpri cjapât dentri inte sô ativitât docents des scuelis di ogni fate e di ogni grât.
◆ In gracie di cheste rêt di colaborazions, il festival al è cressût une vore tal timp: cuant che al è nassût, tal 2011, al proponeve doi dîs di spetacui par un totâl di 80 spetatôrs, ma tal 2019 al è rivât a une interie setemane di events che e à vût 1500 spetatôrs. Il Festival no si è fermât nancje l’an passât. E la incressite no si ferme, cu la poie dal Ent Regjonâl Teatrâl, dal Comun di Dartigne e dai Amîs dal Teatri di Dartigne, Fondazione Friuli, Promoturismo FVJ. Altris partners a son: Assitej Italia, Istitût Comprensîf di Tarcint, Aracon, Segni d’Infanzia (Mantue) e Straligut Teatro (Siene), Zavod Kuskus Umetniška Produkcija (Lubiane), Lutkarska Organizacija koju Fakat Trebamo – LOFT (Zagabrie), SPK Teatro (Pordenon), CICT (Tarcint), Rasmus (Dartigne) e lis Pro Loco di Segnà e di Dartigne. Il program si lu cjate su sît www.trallallerofestival.com.  ❚
Redazion