Ancje tal Pôl Nord si fevele par furlan cun “Horaci l’Inuit”

Il gnûf carton animât ambientât intal artic
al larà in onde su Telefriuli insiorant
la VI stagjon de trasmission par fruts “Maman!”
La regjie de version par furlan
e je stade curade di Rita Maffei
Al è dut pront pe seste stagjon di Maman!, che e acompagnarà i plui piçui ancje a scuvierzi l’Artic e i siei abitants. La trasmission televisive in lenghe furlane, risultât di une coproduzion de ARLeF – Agjenzie Regjonâl pe Lenghe Furlane e di Telefriuli, e puartarà sul piçul schermi un carton animât pardabon gnûf. Si trate di “Horaci l’Inuit”, serie catalane za voltade par spagnûl e par inglês, e cumò ancje par furlan graciis ae ARLeF che lu à produsût su licence di Videoplugger Ltd.
◆ Il carton al è stât pensât pai fruts dai 3 ai 6 agns, ma lis aventuris di Horaci e Sedna – doi piçui eschimês che a cirin di difindi il lôr ecosisteme unic, plen di ors polârs, igloos, kayaks e siamans – a savaran dal sigûr cjapâ dentri ancje i fruts plui grancj, cul biel ritmi des pontadis. La prime serie e à 35 pontadis, che inte version furlane a son stadis curadis di Delta Studios e CSS Teatri stabil di inovazion dal FVJ, sot de direzion de dopleadure di Rita Maffei.
◆ «Ce che plui mi à colpît di cheste esperience – e à rimarcât Rita Maffei – al è che o vin creât, ancje in graciis de consulence de ARLeF e dal Sportel regjonâl pe lenghe furlane, un grup di lavôr straordenari. E chest cundut che, par vie de pandemie, o vin scugnût lavorâ in grups piçui. La lenghe furlane e à funzionât benon e i atôrs a àn rivât a dâ lis vôs justis a chei personaçs tant simpatics. Preziôs dopo l’adatament di Barbara Bregant e la postproduzion di Vittorio Vella».
◆ «Horaci l’Inuit par furlan al è un sucès par ducj: pe produzion, pai autôrs, pal regjist e pe nestre aziende, che e je simpri stade sensibile aes produzions in lenghe minoritarie tant che cheste, realizade de Radiotelevision publiche de Catalogne» – al à fat savê Emanuele Galloni, aministradôr di Videoplugger.
◆ “Horaci l’Inuit” nol sarà però la uniche novitât de seste edizion di Maman!, che e larà in onde dai 8 di Otubar ducj i vinars aes 18.30 fin in Jugn, e in repliche la domenie aes 7 e aes 13. Di fat, a son in program dôs gnovis rubrichis: “Il moment de poesie” e “La cusine Bete”. Cheste ultime e je la ecentriche e colorade “cusine” di Daria Miani (alias Daria stesse), confermade ae conduzion e acompagnade di Vigji, il so gjatut fedêl. Ma Bete e je ancje une apassionade di videotutorials e e intervignarà dilunc des pontadis par insegnâ ai fruts une vore di robis: cemût peâsi lis scarpis, fâ un braçaletut cu lis margaritis, sivilâ, fâ une strece, lavâsi i dincj, fâ un origami e tant altri. In ogni pontade, dopo, nol mancjarà un spazi fis dedicât ancje a altris cartons animâts, e un pes videocjançons tant che “Vosutis te sachete” (un progjet de Associazion musicâl Bertrando di Aquileia) e “Sacheburache” (un progjet Belka Media) par balâ e par cjantâ in furlan.
◆ No puedin mancjâ infin lis rubrichis “La pueste di Maman!” che e darà rispueste aes curiositâts dai piçui telespetatôrs; “Leìn insiemi”, un spazi che al à l’obietîf di promovi e di sburtâ la leture in lenghe furlane sedi intes scuelis che intes fameis; “Un pâr di barzaletis” e “Fasìn un zûc”. L’obietîf di Maman! al è chel di esponi i fruts – midiant dal divertiment, de narazion e dal zûc – al plurilinguisim e ai vantaçs cognitîfs comprovâts che a vegnin dal ûs di plui lenghis di picinins insù. ❚
Redazion