Sfuei Mensîl Furlan Indipendent
Archivi de Patrie

«A cualchidun i somearà brut dîlu, ma il Friûl nol è calcolât avonde»

Dree Venier
Marco Vittori

Interviste a Marco Vittori, sindic di Segrât
Par cheste gnove pontade des intervistis ai sindics dai Comuns che a fasin part de ACLiF- Assemblee de comunitât linguistiche furlane, o lin intune zone di misturis culturâls che plui di cussì no si pues, fra furlans, bisiacs, slovens e pôc lontan di Triest.
O intervisti il sindic di Segrât, che mi torne a clamâ lui subit dopo che i vevi telefonât, ma no mi veve rispuindût. «Che mi scusi» mi dîs Marco Vittori «o jeri su la pacare e no ai sintude la clamade».
Vittori al è un “sindic operari”, come che lu àn clamât di resint, e al stave doprant la sô terne par comedâ un toc di strade dal so Comun. O sin di sabide, a nûf di matine.
__
Sabide a buinore, il sindic al lavore. Si podarès fâ un proverbi…
Al pues dîlu: jo come sindic o tachi aes vot di matine e la plui part des voltis o voi vie aes vot di sere. Ancje parcè che mi plâs fâ lis robis intune cierte maniere. Stant che lu fâs di mistîr, o soi il responsabil de manutenzion dal Comun di Gardiscje, o dopri cheste esperience par meti a puest ben ancje il teritori dal gno Comun. E cussì, o jeri ca cu la terne.
__
Cuant sêso jentrâts te Assemblee e cun trope motivazion?
O sin jentrâts tal 2016. Par me e je une cuistion di apartignince. Jo o soi braurôs di jessi furlan, mê mari e je di Romans, e chest, pûr jessint un teritori cun tantis particolaritâts, al è dal sigûr furlan. E duncje o vin volût mostrâ la nestre apartignince a cheste culture, dongje di chês slovene e bisiache. Dutis culturis che jo o consideri une oportunitât e no une dificoltât.
__
Secont lui, la Assemblee aie dome un rûl culturâl o varessie di vê ancje un compit plui politic, in chest moment li che i ecuilibris a somein lâ ducj a pro di Triest, cul gnûf asset istituzionâl cence provinciis?
E varès di vê un rûl politic e nol sarà mai masse adore. Par cualchidun al sarà brut dîlu parcè che esponisi al è dificil, ma par me al è clâr che il Friûl nol è calcolât avonde. Si podarès partî fevelant dal TG Regjonâl che nol cjacare mai dal Friûl se no che par cualchi fat di croniche, ma chest al è dome l’aspiet comunicatîf. Jo o soi apassionât de Cjargne, e par esempli si dîs simpri che la mont e je trascurade, ma no si fâs mai nuie, i bêçs si doprin di altris bandis. E, in gjenerâl, o viôt cheste tindince in masse robis che a sucedin.
__
Ce vuelial dî autonomisim par lui?
Autonomisim al volarès dî jessi plui libars di gjestîsi il teritori cence tantis regulis che ti vegnin di fûr. O pûr, cun regulis plui elastichis che a tegnin cont des particolaritâts dai diviers teritoris. No si pues fâ une regule masse strente che e à di valê pal centri di Udin e pal paisut cun tante campagne. Al covente vê plui fiducie e delegâ plui podês aes piçulis autoritâts locâls.
Par esempli, nô chest an o presentarìn il Plan pal paisaç, e in Regjon o sin dome in doi che o vin rivat adore a fâlu. Nô e Manzan. Po ben, jessint i prins lis regulis no jerin ben definidis e o vin fat dut un lavôr cu la Regjon. Però, a ogni pas, dopo nus domandavin altris verifichis burocratichis in plui.
Mi ven di dî: o stin fasint un lavôr insiemi, a un ciert pont molimi, no? Dami fiducie cence tantis cjartis burocratichis e regulis centralizadis.
__
In specific su la lenghe furlane, lui ce pensial dal insegnament a scuele? Isal dacuardi? E sui cartei bilengâi?
Dal dut dacuardi sul insegnament a plen de lenghe furlane a scuele. Savê une lenghe in plui e je une grande oportunitât di sfrutâ e i da mût ai zovins di no dismenteâsi di dulà che o sin rivâts. Jo ogni matine che mi svei o pensi a chel: che o soi part di un popul, part di une storie e che o ai di rispietâlis cu la mê azion pratiche.
Sui cartei, jo che o soi intune zone trilengâl o soi plui dubiôs propit par un fat di spazi fisic. Cul principi però o soi dacuardi, e di fat li che lis lenghis a son dôs lu pensi fatibil e dovût.
__
Il vuestri al è un teritori segnât de storie de Grande Vuere. Cemût vivêso chest rûl? Ce àno dât lis manifestazions pal inovâl de Prime vuere mondiâl intal 2018?
Tal teritori dal nestri Comun o vin il museu de Grande Vuere di San Michêl, che al è colegât a Redipulie: o cirìn di operâ in sinergjie. Intal 2018, in gracie ancje de colaborazion cu la fondazion Carigo, lu vin metût a puest e rivoluzionât. Cumò al è ancje multimediâl, e cun visôrs che tu puedis imerziti te realtât di une trincee, o pûr svolâ suntun avion di chê volte. A son un 10-12 esperiencis cussì di fâ. O cirìn di racuei un ciert turisim in cheste maniere, no vint grandis atrazions in zone. Fra lis manifestazion che o organizìn, ai 29 di Jugn o ricuardìn l’inovâl dal prin atac cui gas fat di bande dai austriacs su la mont di San Michêl.
__
Il popul furlan però nol ven fûr. Lui saial la storie di Riccardo Giusto e Eugenio Sandrigo? I prins doi muarts de Grande Vuere sul front italoaustriac, sei di bande di ca che di là, a forin furlans.
E je vere, si fevele de storie de Italie o de Austrie, ma une riflession sul Friûl, il teritori li che si è scombatût, e larès fate. Par esempli il fat che mi conte lui lu savevi, ma e je simpri une robe che ti ven di une sorte di passeperaule, no son ocasions uficiâls che a celebrin cheste storie dal popul furlan. E je une buine idee.
__
Par finî i domandi, stant che il so al è un Comun cun grandis diversitâts linguistichis dentri, se lui al sa dutis lis lenghis che si fevelin li.
No sai il sloven e mi displâs. O soi invidiôs dai fantats di cumò che a puedin imparâlu a scuele in maniere plui libare che no une volte. Chest par vie che agns fa o jerin zone di confin su la Cortina di ferro, e si veve pôre dal nemì di chê altre bande. Par fortune che chê robe li si è sfantade e cumò o podìn vivi la nestre vocazion pluriculturâl e mitteleuropeane. Nô le realizìn ancje cui zimulaments cun altris citadinis de Europe, une robe che i crôt une vore. ❚
::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Cui che al è il sindic di Segrât
Marco Vittori al è nassût a Gurize tal 1971, al è diplomât perît eletronic a Gurize. Maridât cun trê fiis, di mistîr al è tecnic comunâl. La sô cariere politiche a Segrât e je scomençade tal 1994 tant che conseîr comunâl e dopo assessôr ai lavôrs publics. Al è stât vicesindic dal paîs dal 2007, e al è stât elet sindic intal 2017 cul 61% des preferencis. ❚
::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
FOCUS. Un teritori vivarôs, ma segnât de storie de Prime vuere mondiâl
Il toponim Segrât, comun in provincie di Gurize, al ven di sagratum “sagrât di une glesie”.
◆ La sô impuartance intai timps antîcs e jere peade ae presince di un vât. Dopo de dominazion romane, intal secul VI si son insedâts i Langobarts che a àn rinfuarçât cjastelîrs e fuartecis.
◆ Lis primis notiziis scritis a rimontin al 1177: intun document a vegnin citadis lis vilis di Segrât, Petean e Sdraussine tant che donazions al Patriarcje di Aquilee, a diference de Mont di Sant Michêl e di altris localitâts dal Cjars che a restarin ae Contee di Gurize.
◆ Chestis vicendis a àn segnât il principi di une epoche di conflits e di rivendicazions fra la Contee e il Patriarcjât e po dopo tra la Republiche di Vignesie e l’Imperi asburgjic. Il paîs al è stât feut dai Strassolts e dai De Tor, e al è lât daûr des sortis di Gardiscje, apartignint prime a Vignesie, e dopo a la Austrie.
◆ Sul tacâ dal Nûfcent, il paîs al jere un centri economic vivarôs e di trafic par vie de presince de stazion feroviarie e dal puint sul Lusinç. In chest periodi si àn disvilupât la industrie de sede e la lavorazion de piere. Al deventà famôs il centri pes curis eletroterapichis li dal implant Alimonda, un edifici costruît su la fin dal Votcent. Dilunc de Prime vuere mondiâl, Segrât al è stât lûc di cinc bataiis dal Lusinç e lis sôs frazions a son deventadis un dai teatris plui sanganôs de vuere. Ai 5 di Zenâr dal 1921 al è stât anetût in maniere uficiâl al Ream di Italie.
◆ Segrât vuê al è une citadine industriose e tant ative. Dut câs, la agriculture e je praticade pôc e buine part de economie e gravite su Monfalcon e sui siei cantîrs. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +