✽✽ No passe dì che no si delinei cun clarece il progjet FVJ, in maniere rigorose cence tratut divisori. No par câs al ripuarte il non di une liste, di un moviment, di un partît che propit di cheste concezion teritoriâl e politiche si fâs paladin e sostignidôr salt.
Cjalait cun atenzion lis fotos dal president Fedriga: simpri plui dispès si mostre cuntun cjapielut cu la scrite, apont, “Io sono FVG”. In altris ocasions, e je la sô mascarute anti Covid che e mostre il stes logo.
✽✽ A “Friuli Doc” si è rivâts po dopo al assurt: in place Sant Jacum, tal spazi dedicât aes nestris ecelencis agroalimentârs, a jerin lis cjasutis espositivis dutis cu la scrite in cuistion.
✽✽ No tornarai sul fat ridicul e depriment di assisti cuasi a une ofese al lavôr de int furlane, disprivade ancje de paternitât de produzion, come se la cualifiche de origjin furlane, la sô denominazion e fos alc di vergognâsi.
✽✽ Mi interesse invezit ribati la valence dute politiche de strade tacade di cheste Zonte regjonâl. Fevelìnsi clâr: il futûr dal Friûl nol tocje gran lis classis dirigjentis, i grups economics, i potentâts finanziaris, se no inte otiche, dal dut egoistiche, di disfrutâ i margjins di contiguitât teritoriâl cul puart di Triest e dal so futûr disvilup in clâf europeane.
✽✽ Che, capìnsi ben, nol rapresente “il mâl”, un fatôr negatîf pe regjon, ma che al devente une mine vagante pal disvilup di chestis tieris, se nol è compensât di un plan paralêl di disvilup pal rest de regjon stesse. Che e je la maiorance par abitants e superficie, par numar di Comuns e varietâts ambientâls, culturâls. Si clame Friûl e al va de Livence al Timau. ❚
